Pfukelani kha mafhungo

Pfukelani kha zwi re ngomu

 NDIMA YA 3

“Mukhethwa, Mukhethwa, Mukhethwa Ndi Yehova

“Mukhethwa, Mukhethwa, Mukhethwa Ndi Yehova

1, 2. Ndi bono ḽifhio ḽe muporofita Yesaya a ḽi vhona, nahone ḽi ri funza mini nga ha Yehova?

YESAYA o akhamadzwa nga bono ḽe a ḽi vhona—bono ḽi bvaho ha Mudzimu. Ḽo vhonala ḽi ḽa vhukuma! Nga murahu Yesaya o ṅwala uri vhukuma ‘o vhona Yehova’ o dzula kha khuluṋoni khulu ndapfu Yawe. Phendelo dza nguvho dza Yehova dzo vha dzo ḓadza thembele khulwane ngei Yerusalema.—Yesaya 6:1, 2.

2 Yesaya o dovha a akhamadzwa nga zwe a zwi pfa—mubvumo wa u imba huhulwane lwe ha dzinginyea thembele na mitheo yayo. Ho vha hu tshi khou imba vhaserafe, zwivhumbiwa zwa muya zwa vhuimo ha nṱha vhukuma. Vho vha vha tshi khou imba mazha nga maipfi mahulwane a re na tshirunzi, vha tshi ri: “Mukhethwa, Mukhethwa, Mukhethwa ndi Yehova; shango ḽoṱhe ḽo ḓala zwi mu khoḓaho.” (Yesaya 6:3, 4) U imba uri “mukhethwa” luraru zwo ita uri lwonolwo luimbo lu vhe lwo khetheaho, nahone zwo vha zwo tea ngauri Yehova ndi mukhethwa vhukuma. (Ndzumbululo 4:8) Vhukhethwa ha Yehova vhu ombedzelwa Bivhilini yoṱhe. Ndimana dza maḓana dzi ṱumanya dzina ḽawe na maipfi “mukhethwa” na “vhukhethwa.”

3. Mavhonele o khakheaho nga ha vhukhethwa ha Yehova a ita uri vhathu vhanzhi vha furalele Mudzimu nṱhani ha u vha tsini nae nga nḓila-ḓe?

3 Nga zwenezwo-ha, zwi khagala uri zwiṅwe zwa zwithu zwihulwane zwine Yehova a ṱoḓa ri tshi zwi pfesesa nga hae ndi zwa uri ndi mukhethwa. Naho zwo ralo, vhathu vhanzhi ṋamusi vha dinwa nga wonoyo muhumbulo. Vhaṅwe vhathu vha ṱumanya nga ho khakheaho vhukhethwa na u ḓiita wo lugaho kana u ḓikumedza ho khakheaho. Vhathu vhane vha lwisana na mavhonele a u sa ḓifulufhela vha nga wana vhukhethwa ha Mudzimu vhu tshi ofhisa nṱhani ha u kunga. Vha nga kha ḓi ofha uri vha nga si vhuye vha fanelea u vha tsini na onoyu Mudzimu mukhethwa. Nga zwenezwo, vhanzhi vha furalela Mudzimu nga ṅwambo wa vhukhethwa  hawe. Zwenezwo zwi a ṱungufhadza ngauri vhukhethwa ha Mudzimu vhu fanela u ri sudzulusela u sendela tsini nae. Ndi ngani? Ri sa athu u fhindula yeneyo mbudziso, kha ri haseledze zwine vhukhethwa ha ngoho ha amba zwone.

Vhukhethwa Ndi Mini?

4, 5. (a) Vhukhethwa vhu amba mini, nahone a vhu ambi mini? (b) Yehova o “ḓifhambanya” nga nḓila dzifhio mbili dza ndeme?

4 Zwa uri Mudzimu ndi mukhethwa a zwi ambi uri u ḓiita o lugaho, u a ḓikukumusa, kana u nyadza vhaṅwe. Zwo fhambanaho na zwenezwo, u a vhenga dzenedzo pfaneleo. (Mirero 16:5; Yakobo 4:6) Nga zwenezwo, ipfi “mukhethwa” ḽi amba mini zwa vhukuma? Kha Luheberu lwa Bivhili, ḽeneḽo ipfi ḽi bva kha mubulo une wa amba u “ḓifhambanya.” Kha vhurabeli, ipfi “vhukhethwa” ḽi shuma kha tshithu tsho fhambanywaho na tsho ḓoweleaho u shumiswa, kana tshithu tshine tsha dzhiiwa tshi tshikhethwa. Hafhu ipfi ḽine ḽa ri vhukhethwa ḽi ombedzela nga ho khwaṱhaho muhumbulo wa u kuna. Ḽeneḽi ipfi ḽi shuma kha Yehova nga nḓila-ḓe? Naa zwi amba uri o “ḓifhambanya” na vhathu vha songo fhelelaho, nahone u kule na riṋe?

5 Na kathihi. Samusi e “Mukhethwa wa Isiraele,” Yehova o ḓiṱalusa sa o dzulaho “vhukati,” (NW) ha vhathu vhawe, naho vho vha vhe na tshivhi. (Yesaya 12:6; Hosea 11:9) Ngauralo vhukhethwa hawe a vhu mu iti uri a vhe kule. Nga zwenezwo o “ḓifhambanya” nga nḓila-ḓe? Nga nḓila mbili dza ndeme. Ya u thoma, o fhambana na tsiko yoṱhe lune a vha ene e eṱhe wa Ṱaḓulu-ṱaḓulu. U kuna hawe ndi ha ngoho vhukuma nahone a hu gumi. (Psalme ya 40:5; 83:18) Ya vhuvhili, Yehova o ḓifhambanya tshoṱhe na vhoṱhe vhaitazwivhi, nahone ri nga khuthadzwa nga zwenezwo. Ndi ngani?

6. Ndi ngani ri tshi nga khuthadzwa nga u fhambana tshoṱhe ha Yehova na tshivhi?

6 Ri tshila shangoni ḽi si na vhukhethwa ha ngoho. Tshiṅwe na tshiṅwe nga ha vhathu tshi re kule na Mudzimu tsho tshikafhadzwa nga iṅwe nḓila, tsho tshinyadzwa nga tshivhi na nga u sa fhelela. Roṱhe ri fanela u lwa na tshivhi tshine ra vha natsho. Nahone roṱhe ri khomboni ya u kundwa nga tshivhi arali ra sa  ḓiṱhogomela. (Vha-Roma 7:15-25; 1 Vha-Korinta 10:12) Yehova ha khomboni yo raloho. Samusi a si na tshivhi na zwiṱuku-ṱuku, a nga si vhuye a tshikafhadzwa nga tshivhi. Hezwi zwi dovha zwa khwaṱhisa maḓipfele ashu nga ha Yehova samusi e Khotsi o fhelelaho, zwi ambaho uri u a fulufhedzea tshoṱhe. U fhambana na vhokhotsi vhanzhi vha vhathu vha re na tshivhi, Yehova a nga si vhuye a kundwa u fulufhedzea, a ḓifara luvhi, kana a shengedza vhathu. Vhukhethwa hawe vhu ita uri hu sa konadzee na tshithihi tsha zwenezwo. Hu na tshifhinga tshee Yehova a vhuya a ana nga vhukhethwa hawe, ngauri vhu a fulufhedzea tshoṱhe. (Amosi 4:2) Naa zwenezwo a zwi khwaṱhisi?

7. Ndi ngani hu tshi nga ambiwa uri vhukhethwa ndi nzulele ya vhuvha ha Yehova?

7 Vhukhethwa ndi vhuvha ha nzulele ya Yehova. Zwenezwo zwi amba mini? Ri tshi tou fanyisa: Ṱhogomelani maipfi “vhathu” na “u sa fhelela.” Ni nga si ṱaluse vhathu ni sa humbuli nga ha u sa fhelela. U sa fhelela hu a ri kwama nahone hu na ṱhuṱhuwedzo kha tshiṅwe na tshiṅwe tshine ra tshi ita. Zwino ṱhogomelani maipfi mavhili o fhambanaho vhukuma—“Yehova” na “vhukhethwa.” Vhukhethwa vhu kha Yehova. Tshiṅwe na tshiṅwe khae tsho kuna nahone tsho luga. Ri nga si vhuye ra ḓivha zwine Yehova a vha zwone nga nnḓa ha u ṱhogomela ḽeneḽi ipfi ḽo dzikaho—“vhukhethwa.”

“Vhukhethwa Ndi Ha Yehova”

8, 9. Ndi mini zwi sumbedzaho uri Yehova u thusa vhathu vha songo fhelelaho u vha vhakhethwa nga nḓila yo linganyiselwaho?

8 Samusi Yehova e na pfaneleo ya vhukhethwa, hu nga ambiwa zwo tea uri ndi tshisima tsha vhukhethwa hoṱhe. Ha shumisi nga vhutshivha yeneyi pfaneleo ya ndeme; u a i ṋea vhaṅwe, nahone u i ṋea nga mafunda. Ee, musi Mudzimu a tshi amba na Mushe a tshi shumisa muruṅwa tshiṱakani tshi dugaho, na henefho fhethu ho mbo ḓi vha hukhethwa nga ṅwambo wa u vha hone ha Yehova!—Ekisodo 3:5.

9 Naa vhathu vha songo fhelelaho vha nga vha vhakhethwa nga thuso ya Yehova? Ee, nga nḓila yo linganyiselwaho. Mudzimu o ṋea vhathu vhawe vha Isiraele tshilavhelelwa tsha u  vha “lushaka lukhethwa.” (Ekisodo 19:6) O fhaṱutshedza lwonolwo lushaka nga maitele a vhurabeli e a vha e makhethwa, a si na tshika nahone o kuna. Nga zwenezwo Mulayo wa Mushe wo amba lunzhi-lunzhi nga ha vhukhethwa. Zwi re zwone ndi uri tshifhe o vha a tshi ambara kubaphathi kwa musuku nga phanḓa ha nguwane yawe nahone vhoṱhe vho vha vha tshi kona u vhona u penya hakwo musi kwu tshi vhonetshelwa nga tshedza. Kwo vha kwo koriwa maipfi ane a ri: “Vhukhethwa ndi ha Yehova.” (Ekisodo 28:36, NW) Ngauralo, zwilinganyo zwa nṱha zwa u sa vha na tshika na u kuna zwo vha zwi tshi fanela u ṱalula vhurabeli havho na matshilele avho. Yehova o vha vhudza a ri: “Ivhani vhakhethwa, ngauri Nṋe Yehova Mudzimu waṋu ndi̗ Mukhethwa.” (Levitiko 19:2) Tenda Vhaisiraele vha tshila nga nyeletshedzo ya Mudzimu nga hune vha nga kona ngaho sa vhathu vha songo fhelelaho, vho vha vha tshi ḓo vha vhakhethwa nga nḓila yo linganyiselwaho.

10. Musi zwi tshi ḓa kha vhukhethwa, ndi phambano ifhio ye ya vha i hone vhukati ha Isiraele ḽa kale na tshaka dzo vha tangaho?

10 Honohu u ombedzelwa ha vhukhethwa ho vha ho fhambana vhukuma na vhurabeli ha tshaka dzo tangaho Vhaisiraele. Dzenedzo tshaka dza vhahedeni dzo vha dzi tshi gwadamela midzimu ya mazwifhi ine ya kanganyisa, midzimu ine ya sumbedzwa sa i re na vhuvemu, vhupangwa, na u ḓifara luvhi. Yo vha i songo kuna kha masia oṱhe. U gwadamela yeneyo midzimu zwo ita uri vhathu vha si vhe vhakhethwa. Nga zwenezwo, Yehova o sevha vhashumeli vhawe uri vha ḓifhambanye na vhagwadameli vha vhahedeni na mikhuvha yavho yo tshikafhalaho ya vhurereli havho.—Levitiko 18:24-28; 1 Dzikhosi 11:1, 2.

11. Vhukhethwa ha ndangulo ya Yehova ya ṱaḓulu vhu vhonala hani kha (a) vharuṅwa? (b) vhaserafe? (c) Yesu?

11 Naho lushaka lwa Isiraele wa kale lwo khethwaho nga Yehova lwa ita zwoṱhe zwi re maanḓani alwo, lwo vha lu sa ḓo kona u sumbedza vhukhethwa vhune ha fana na ha ndangulo ya Mudzimu ya ṱaḓulu. Zwivhumbiwa zwa muya zwa dzimilioni zwine zwa shumela Mudzimu nga u fulufhedzea zwi vhidzwa “vhunzhi ha vhakhethwa” vhawe. (Doiteronomio 33:2; Yuda 14) Zwi sumbedza nga ho fhelelaho u penya, lunako lwa vhukuma lwa  vhukhethwa ha Mudzimu. Nahone humbulani vhaserafe vhe Yesaya a vha vhona bononi ḽawe. Maipfi a luimbo lwe vha lu imba a sumbedza uri zwenezwi zwivhumbiwa zwa maanḓa zwa muya zwi na mushumo wa ndeme wa u ita uri vhukhethwa ha Yehova vhu ḓivhiwe fhethu hoṱhe. Naho zwo ralo, hu na tshiṅwe tshivhumbiwa tsha muya tshine tsha fhira zwenezwi zwoṱhe—ndi Murwa mubebwa eṱhe wa Mudzimu. Yesu ndi tshifanyiso tshihulwane tsha vhukhethwa ha Yehova. Nga ho teaho, u ḓivhiwa sa “Mukhethwa wa Mudzimu.”—Yohane 6:68, 69, vhambedzani NW.

Dzina Ḽikhethwa, Muyamukhethwa

12, 13. (a) Ndi ngani zwo tea uri dzina ḽa Mudzimu ḽi ṱaluswe sa ḽikhethwa? (b) Ndi ngani dzina ḽa Mudzimu ḽi tshi fanela u khethwa?

12 Hu pfi mini nga dzina ḽa Mudzimu? Samusi ro zwi vhona kha Ndima ya 1, a si dzina zwaḽo kana tshiṱaluli. Ḽi imela Yehova Mudzimu, nahone ḽi katela pfaneleo dzawe dzoṱhe. Nga zwenezwo, Bivhili i ri vhudza uri ‘dzina ḽawe ndi ḽikhethwa.’ (Yesaya 57:15) Mulayo wa Mushe wo amba uri u shata dzitshika dzina ḽa Mudzimu zwo tewa nga lufu. (Levitiko 24:16) Nahone ṱhogomelani zwithu zwe Yesu a zwi ita zwa ndeme thabeloni: “Khotsi-ashu wa ṱaḓulu! dzina ḽau ḽi khethwe.” (Mateo 6:9) U khetha tshiṅwe tshithu zwi amba u tshi ṱalula sa tshikhethwa na u tshi ṱhonifha, na u tshi tikedza sa tshikhethwa. Fhedzi ndi ngani tshithu tsho kunaho tshoṱhe sa dzina ḽa Mudzimu tshi tshi fanela u khethwa?

13 Dzina ḽa Mudzimu ḽo vutshelwa, ḽa fhomiwa mazwifhi na u tshinywa. Ngei, Edeni, Sathane o zwifha nga ha Yehova nahone amba uri Ndi Muvhusahoṱhe a songo lugaho. (Genesi 3:1-5) U bva tsheetsho, Sathane—muvhusi wa ḽino shango ḽi songo kunaho—o ita vhungoho ha uri mazwifhi nga ha Mudzimu a ṋaṋe. (Yohane 8:44; 12:31; Ndzumbululo 12:9) Vhurereli ho ita uri Mudzimu a vhonale a si wavhuḓi, e kule kana e na tshiṱuhu. Vho amba uri u a vha tikedza kha nndwa dzavho dza u shulula malofha. Ho rendwa u bvelela ha zwithu nga khombo, kana vhubvelele, nṱhani ha u renda mishumo ya Mudzimu ya tsiko i mangadzaho. Ee, dzina ḽa Mudzimu ḽo tshinywa vhukuma. Ḽi fanela u khethwa; vhugala haḽo ho teaho vhu fanela u vusuluswa.  Ri ṱulutshelwa u khethwa ha dzina ḽawe na u lwelwa ha vhuvhusahoṱhe hawe, nahone ri takalela u vha na tshipiḓa kha yeneyo ndivho khulwane.

14. Ndi ngani muya wa Mudzimu u tshi vhidzwa mukhethwa, nahone ndi ngani u sema muyamukhethwa zwi tshivhi tshihulwane?

14 Hu dovha ha vha na tshiṅwe tshithu tshi tshimbidzanaho nga maanḓa na Yehova tshine na tshone tsha vhidzwa tshikhethwa—muya wawe, kana maanḓa a shumaho. (Genesi 1:2) Yehova u shumisa enea maanḓa mahulwane u itela u khunyeledza ndivho dzawe. Zwoṱhe zwine Mudzimu a zwi ita, u zwi ita nga nḓila ya vhukhethwa, i si na tshika nahone yo kunaho, nga u ralo maanḓa awe a shumaho a vhidzwa muyamukhethwa nga ho teaho, kana muya wa vhukhethwa. (Luka 11:13; Vha-Roma 1:4) U sema muyamukhethwa, zwine zwa katela u lwisana na ndivho dza Yehova, zwi wela kha tshivhi tshi sa hangwelwi.—Marko 3:29.

Zwi Itaho Uri Vhukhethwa Ha Yehova Vhu Ri Sendedze Tsini Nae

15. Ndi ngani u ofha Mudzimu hu nḓila yo teaho ya u sumbedza uri ri ṱhonifha vhukhethwa ha Yehova, nahone honoho u ofha hu katela na mini?

15 Nga zwenezwo, zwi a leluwa u vhona uri ndi ngani Bivhili i tshi ṱumanya vhukhethwa ha Mudzimu na nḓila ine muthu a fanela u mu ofha ngayo. Sa tsumbo, Psalme ya 99:3 i vhalea nga uri: “Dzina ḽau ḽihulu ḽi ofhisaho nga ḽi khoḓiwe. Mukhethwa ndi Ene.” Naho zwo ralo, heyi a si nyofho yo kalulaho. Nṱhani hazwo ndi u ofha ho dzikaho hune ha tshimbidzana na ṱhonifho i swayeaho. Zwo tea u ḓipfa nga yeneyo nḓila, samusi vhukhethwa ha Mudzimu vhukule na riṋe. Ho kuna vhukuma, nahone vhu na vhugala. Naho zwo ralo, a vhu ngo fanela u ri sendedza kule. Zwo fhambanaho na zwenezwo, mavhonele o teaho nga ha vhukhethwa ha Mudzimu a ḓo ri sendedza tsini-tsini nae. Ndi ngani?

Samusi lunako lu tshi ri kunga, na vhukhethwa vhu fanela u ri kunga

16. (a) Vhukhethwa vhu ṱumanywa na lunako nga nḓila-ḓe? Ṋeani tsumbo. (b) Ṱhaluso dza bono dza Yehova dzi ombedzela u kuna na tshedza nga nḓila-ḓe?

16 Bivhili i ṱumanya vhukhethwa na lunako. Kha Yesaya 63:15 ḽiṱaḓulu ḽi ṱaluswa sa ‘pfamo khethwa [“na yo nakaho,” NW] ya vhurena ha Mudzimu.’ Lunako lu a ri kunga. Sa tsumbo, sedzani  tshifanyiso kha siaṱari 33. Naa a ni takadzwi nga tshenetsho tshifanyiso? Ndi mini tshine tsha ita uri tshi takadze nga u rali? Ṱhogomelani nḓila ye maḓi a hone a kuna ngayo. Na muya u fanela u vha wo kuna, ngauri lutombo lwo tou kelengende nahone hu vhonala na tshedza tshi tshi khou penya. Arali tshenetsho tshifanyiso tsha shandukiswa—mulambo wa ḓala nga mathukhwi, miri na matombo zwa fhala-fhaliwa, na muya wa tshikafhadzwa nga ḓitsi—ro vha ri sa ḓo kungwa ngatsho; ro vha ri tshi ḓo tshi nengwa. Ri anzela u ṱumanya lunako na u kuna na tshedza. Enea maipfi a nga shumiswa u ṱalusa vhukhethwa ha Yehova. Ndi ngazwo ri tshi kungwa nga maipfi ane a shumiselwa u ṱalusa vhukhethwa ha Yehova! U penya ha tshedza, u kombodza ha matombo a thengokhulu, u penya sa mulilo kana tsimbi ya ndeme yo kunaho na i penyaho—lwonolwo ndi lunako lwa Mudzimu washu mukhethwa.—Hesekiele 1:25-28; Ndzumbululo 4:2, 3.

17, 18. (a) Yesaya o kwamea hani u thomani nga bono ḽe a sumbedzwa ḽone? (b) Yehova o shumisa hani vhaserafe u itela u khuthadza Yesaya, nahone nyito ya vhaserafe i amba mini?

17 Naho zwo ralo, naa vhukhethwa ha Mudzimu vhu fanela u ri ita uri ri ḓipfe ri vha fhasi musi ri tshi ḓivhambedza nae? Phindulo ndi ee. Naho zwo ralo, ri vhaṱuku kha Yehova—zwi tou vha khagala. Naa u ḓivha zwenezwo zwi fanela u ri sendedza kule nae? Ṱhogomelani nḓila ye Yesaya a aravha ngayo musi a tshi pfa vhaserafe vha tshi khou ḓivhadza vhukhethwa ha Yehova. “Nṋe nda ri: Yowee, ndi a lovha, ngauri nṋe ndi̗ muthu wa milomo ya dzitshikha. Thovhele Yehova wa Mavhuthu ndo mu vhona nga maṱo anga.” (Yesaya 6:5) Ee, vhukhethwa ha Yehova vhu sa gumi ho humbudza Yesaya uri u na tshivhi nahone ho ngo fhelela. U thomani onoyo munna a fulufhedzeaho o vha o hanganea. Fhedzi Yehova ho ngo mu litsha e kha honoho vhuimo.

18 Vhaserafe vho khuthadza onoyo muporofita nga u ṱavhanya. Nga nḓila-ḓe? Tshiṅwe tshivhumbiwa tsha maanḓa tsha muya tsho fhufhela aletareni, tsha bvisa simbe khayo, nahone tsha ḽi vhea kha meme dza mulomo wa Yesaya. Hezwo zwi nga pfala zwi tshi vhavha nga maanḓa u fhira u khuthadzwa. Naho zwo ralo, humbulani uri heḽi ḽo vha ḽi bono, ḽo ḓalaho nga mibulo ya pfanyisedzo. Yesaya, Muyuda a fulufhedzeaho, o vha a tshi zwi ḓivha  zwavhuḓi uri zwiṱhavhelo zwo vha zwi tshi ṋekedzwa ḓuvha ḽiṅwe na ḽiṅwe kha aletare thembeleni u itela tshipfumelelo tsha zwivhi. Nahone vhaserafe vho humbudza nga lufuno onoyo muporofita uri naho a songo fhelela, e na “milomo ya dzitshikha,” o vha a tshi nga vha na vhuimo ho kunaho phanḓa ha Mudzimu. * Yehova o vha o ḓiimisela u dzhia muthu a songo fhelelaho na a re na tshivhi sa mukhethwa—nga nḓila yo linganyiselwaho.—Yesaya 6:6, 7.

19 Zwi nga konadzea hani uri ri vhe vhakhethwa nga nḓila yo linganyiselwaho, naho ri songo fhelela?

19 Zwo tou ralo ṋamusi. Zwiṱhavhelo zwoṱhe zwo ṋekedzwaho kha aletare ngei Yerusalema zwo vha zwi mirunzi ya tshithu tshihulwane—tshiṱhavhelo tsho fhelelaho tsho ṋekedzwaho nga Yesu Kristo nga 33 C.E. (Vha-Heberu 9:11-14) Arali ra rembuluwa zwa vhukuma kha zwivhi zwashu, ra lulamisa buḓo ḽashu ḽo khakheaho, nahone ra vha na lutendo kha tshenetsho tshiṱhavhelo, ri a hangwelwa. (1 Yohane 2:2) Na riṋe ri nga ḓiphina nga u vha na vhuimo ho kunaho phanḓa ha Mudzimu. Nga zwenezwo, muapostola Petro u ri humbudza uri: “Ngauri ho ṅwaliwa ha pfi: Ivhani vhakhethwa,  ngauri nṋe ndi mukhethwa.” (1 Petro 1:16) Ṱhogomelani uri Yehova ho ngo amba uri ri fanela u vha vhakhethwa u fana nae. Ha vhuyi a lavhelela zwine ri si zwi kone. (Psalme ya 103:13, 14) Nṱhani hazwo, Yehova uri vhudza uri ri vhe vhakhethwa nga ṅwambo wa uri ndi mukhethwa. “Sa vhana vha funwaho,” ri ṱoḓa u mu edzisa nga hune ra nga kona ngaho samusi ri vhathu vha songo fhelelaho. (Vha-Efesa 5:1) Ngauralo u swikelela vhukhethwa ndi maitele a bvelaho phanḓa. Musi ri tshi aluwa muyani, ri vha ri khou shumela kha u ‘khunyeledza vhukhethwa’ ḓuvha ḽiṅwe na ḽiṅwe.—2 Vha-Korinta 7:1.

20. (a) Ndi ngani zwi zwa ndeme u pfesesa uri ri nga kuna maṱoni a Mudzimu washu mukhethwa? (b) Yesaya o kwamea hani musi a tshi ṱhogomela uri zwivhi zwawe zwo pfumelelwa?

20 Yehova u funa zwo lugaho na zwo kunaho. U vhenga tshivhi. (Habakuku 1:13) Fhedzi ha ri vhengi. Musi ri tshi dzhia tshivhi nga nḓila ine a tshi dzhia ngayo—ra vhenga zwivhi, ra funa zwivhuya—nahone ra lingedza u tevhela ṋayo dza Kristo Yesu o fhelelaho, Yehova u ḓo ri hangwela zwivhi zwashu. (Amosi 5:15; 1 Petro 2:21) Musi ri tshi pfesesa u ri ri nga vha vho kunaho maṱoni a Mudzimu washu mukhethwa, ri ḓo vhuyelwa vhukuma. Humbulani uri mathomoni vhukhethwa ha Yehova ho humbudza Yesaya nga ha u sa kuna hawe. O vhidzelela uri: “Yowee, ndi a lovha.” Fhedzi a tshi ṱhogomela uri zwivhi zwawe zwo pfumelelwa, mbonalo yawe yo shanduka. Musi Yehova a tshi humbela muthu ane a ḓo ita mushumo, Yesaya o aravha nga u ṱavhanya, naho o vha a sa ḓivhi zwine zwa ḓo katelwa kha wonoyo mushumo. O amba a ri: “Ndi nṋe, nthume.”—Yesaya 6:5-8.

21. Ri na mutheo ufhio wa u fulufhela uri ri nga ṱahulela pfaneleo dza vhukhethwa?

21 Ro sikwa nga tshifanyiso tsha Mudzimu mukhethwa, nahone ri nga kona u tshila nga nḓila yavhuḓi na u vha vhathu vha muya. (Genesi 1:26) Hu na khonadzeo ya uri roṱhe ri vhe vhakhethwa. Musi ri tshi bvela phanḓa u ṱahulela vhukhethwa, Yehova u ḓo takalela uri thusa. Nga u ya ha tshifhinga, ri ḓo sendela tsini-tsini na Mudzimu washu mukhethwa. Zwiṅwe hafhu, musi ri tshi ṱhogomela pfaneleo dza Yehova kha ndima dzine dza ḓo tevhela, ri ḓo vhona uri hu na zwiitisi zwa maanḓa zwa u sendela tsini nae!

^ phar. 18 Maipfi “milomo ya dzitshikha” o tea, samusi meme dza mulomo dzi tshi anzela u shumiswa Bivhilini nga lwa pfanyisedzo u itela u imela u amba kana luambo. Kha vhathu vhoṱhe vha songo fhelelaho, zwivhi zwinzhi zwi tshimbidzana na nḓila ine ra amba ngayo.—Mirero 10:19; Yakobo 3:2, 6.