Pfukelani kha mafhungo

Pfukelani kha zwi re ngomu

 NDIMA YA 30

“Ni Tshimbile Lufunoni”

“Ni Tshimbile Lufunoni”

1-3. Hu itea mini musi ri tshi edzisa tsumbo ya Yehova ya u sumbedza lufuno?

“MASHUDU a muṋei a fhira a muṋeiwa.” (Mishumo 20:35) Eneo maipfi a Yesu a ombedzela ngoho i tevhelaho: Lufuno lu si lwa tseḓa lu a vhuyedza. Naho u funwa zwi tshi ḓisa dakalo ḽihulwane, u funa, na u sumbedza vhaṅwe lufuno na zwone zwi ḓisa dakalo ḽihulwane.

2 A hu na ane a ḓivha zwenezwo khwine u fhira Khotsi ashu wa ṱaḓulu. Samusi ro zwi vhona kha ndima dzo fhiraho dza tshenetshi tshipiḓa, Yehova ndi ene ane a vha tsumbo ya lufuno u fhira vhathu vhoṱhe. A hu na we a sumbedza lufuno nga nḓila khulwane kana tshifhinga tshilapfu u fana nae. Nga zwenezwo-ha, naa zwi a mangadza uri Yehova u vhidzwa “Mudzimu o takalaho”?—1 Timotheo 1:11NW.

3 Mudzimu washu wa lufuno u ṱoḓa uri ri lingedze u fana nae, zwihuluhulu musi zwi tshi ḓa kha u sumbedza lufuno. Vha-Efesa 5:1, 2 i ri: “Ivhani vha-edzisa-Mudzimu sa vhana vha funwaho. Ni tshimbile lufunoni.” Musi ri tshi edzisa tsumbo ya Yehova ya u sumbedza lufuno, ri wana dakalo ḽihulwane ḽi bveledzwaho nga u ṋea. Nahone ri dovha ra fushea nga u ḓivha uri ri khou takadza Yehova, ngauri Ipfi ḽawe ḽi ri ṱuṱuwedzela uri ri ‘funane.’ (Vha-Roma 13:8) Fhedzi hu na zwiṅwe zwiitisi zwi itaho uri ri “tshimbile lufunoni.”

Zwi Itaho Uri Lufuno Lu Vhe Lwa Ndeme

4, 5. Ndi ngani zwi zwa ndeme uri ri sumbedze lufuno lwa u ḓiṋekedza kha vhatendi nga riṋe?

4 Ndi ngani zwi zwa ndeme uri ri fune vhatendi nga riṋe? Ndi nga ṅwambo wa uri lufuno ndi pfaneleo ya ndeme ya Vhukriste ha ngoho. Ri nga si kone u vha na vhushaka vhuhulwane na Vhakriste nga riṋe arali ri si na lufuno, nahone zwa ndeme ndi uri ri nga si ṱanganedzee phanḓa ha Yehova. Ṱhogomelani nḓila ine Ipfi ḽa Mudzimu ḽa ombedzela ngayo dzenedzi ngoho.

 5 Vhusikuni ha u fhedza musi e kha ḽifhasi, Yesu o vhudza vhatevheli vhawe zwi tevhelaho: “Ndi ni ṋea mulayo muswa wa uri ni funane vhunga nṋe ndo ni funa, uri na inwi ni funane-vho. Ndi zwiné vhathu vhoṱhe vha ḓo ḓivha ngazwo’ zwauri ni vhafunziwa vhanga arali u funana hu hone kha inwi.” (Yohane 13:34, 35) “Vhunga nṋe ndo ni funa”—ee, ri laedzwa uri ri sumbedze lufuno lu fanaho na lwe Yesu a lu sumbedza. Kha Ndima ya 29, ro ṱhogomela uri Yesu o vhea tsumbo yavhuḓisa ya u sumbedza lufuno lwa u ḓiṋekedza, o vhea phanḓa zwishaiwa na madzangalelo a vhaṅwe. Na riṋe ri fanela u sumbedza lufuno lu si lwa tseḓa, nahone ri fanela u zwi ita nga nḓila i leluwaho lune zwa ḓo vhonwa na nga vha si tshivhidzoni tsha Vhukriste. Vhukuma, u funa vhahashu ndi tshiga tshine tsha ri ṱalula sa vhatevheli vha ngoho vha Kristo.

6, 7. (a) Ri zwi ḓivha hani uri Ipfi ḽa Yehova ḽi ombedzela nga maanḓa u sumbedza lufuno? (b) Maipfi a Paulo o ṅwalwaho kha 1 Vha-Korinta 13:4-8 a ombedzela lufuno lwa mufuda-ḓe?

6 Hu pfi mini arali ri si na lufuno? Muapostola Paulo o ri: ‘Arali lufuno ndi si na, ndi nga tsimbi i lilaho, ndi nga ngoma i bvumaho.’ (1 Vha-Korinta 13:1) Ngoma i bvumaho i na phosho vhukuma. Hu pfi mini nga tsimbi i lilaho? Dziṅwe nzudzanyo dzi ri “phosho khulwane” kana “phosho i dzingisaho nḓevhe.” Zwo tea lungafhani zwenezwi zwifanyiso! Muthu a si na lufuno u fana na tshilidzo tshine tsha ita phosho, ine ya dzingisa nḓevhe. Muthu o raloho a nga ḓiphina hani nga vhushaka vhuhulwane na vhaṅwe? Paulo o dovha a ri: “Naho ndí na lutendo lwoṱhe, huné nda vhuya nda sendedza dzithavha, lufuno ndí si na, a thi tshithu.” (1 Vha-Korinta 13:2) Edzani u humbula, muthu a si na lufuno u sokou vha “muthu zwawe a sa thusi tshithu,” hu sa londwi mishumo ine a nga kha ḓi i ita! (The Amplified Bible) Naa a zwi khagala uri Ipfi ḽa Yehova ḽi ombedzela ndeme ya u sumbedza lufuno?

7 Ri nga sumbedza hani yeneyi pfaneleo kha nḓila ine ra shumisana ngayo na vhaṅwe? Uri ri fhindule yeneyi mbudziso, kha ri ṱolisise maipfi a Paulo a wanalaho kha 1 Vha-Korinta 13:4-8. Zwine zwa ombedzelwa kha dzenedzi ndimana a si nḓila ine Mudzimu a ri funa ngayo kana nḓila ine ra funa ngayo  Mudzimu. Nṱhani hazwo, Paulo u livhisa ṱhogomelo kha nḓila ine ra fanela u funana ngayo. O ṱalusa zwiṅwe zwithu zwine lufuno lwa vha zwone na zwine lwa sa vhe zwone.

Zwine Lufuno Lwa Vha Zwone

8. U sa fhela mbilu zwi nga ri thusa hani musi ri tshi tshilisana na vhaṅwe?

8 “Lufuno a lu fheli mbilu.” U sa fhela mbilu zwi amba u konḓelela vhukhakhi ha vhaṅwe. (Vha-Kolosa 3:13) Naa a ro ngo fanela u sa fhela mbilu? Nga ṅwambo wa uri ri zwivhumbiwa zwi songo fhelelaho zwine zwa shuma zwoṱhe, hu ḓo vha na zwifhinga zwine ra ḓo dinwa kana u dina Vhakriste nga riṋe. Fhedzi u sa fhela mbilu na u konḓelela zwi ḓo ri thusa uri ri sedzane na zwithu zwiṱuku zwi sinyusaho na zwi dinaho musi ri tshi tshilisana na vhaṅwe—ra sa thithise mulalo tshivhidzoni.

9. Ri nga sumbedza hani vhaṅwe u vuḓa?

9 “Lufuno lwo vuḓa.” U vuḓa hu sumbedzwa nga u ḓiimisela  u thusa na nga maipfi ane a sumbedza u humbulela. Lufuno lu ri sudzulusela u ṱoḓa nḓila dza u sumbedza u vuḓa, zwihuluhulu kha vhane vha shaya vhukuma. Sa tsumbo, mutendi nga riṋe wa mulala a nga kha ḓi vha e na vhumvumvu nahone a tshi ṱoḓa u dalelwa uri a ṱuṱuwedzwe. Mme a re eṱhe kana wahashu wa tshisadzini ane a dzula muṱani wo fhandekanaho nga zwa vhurereli a nga kha ḓi ṱoḓa thuso. Muthu ane a lwala kana o sedzanaho na maṱungu a nga kha ḓi ṱoḓa u khuthadzwa nga khonani i fulufhedzeaho. (Mirero 12:25; 17:17) Musi ri tshi dzhia vhukando u itela u thusa nga dzenedzo nḓila, ri sumbedza uri lufuno lwashu ndi lwa vhukuma.—2 Vha-Korinta 8:8.

10. Lufuno lu ri thusa hani u tikedza na u amba ngoho, na musi zwi tshi konḓa u ita nga u ralo?

10 “Lufuno . . . lu takadzana na a sí mazwifhi.” Iṅwe ṱhalutshedzelo i ri: “Lufuno . . . lu takalela u ima na mafhungo-ngoho.” Lufuno lu ri sudzulusela u tikedza mafhungo-ngoho na u amba “mafhungo-ngoho.” (Sakaria 8:16) Sa tsumbo, arali muthu ane ra mu funa o ita tshivhi tshihulwane, u funa hashu Yehova—na o khakhaho—zwi ḓo ri thusa uri ri tevhele zwilinganyo zwa Yehova nṱhani ha u lingedza u dzumba, u vhuyafhedza, kana u zwifha nga ha vhukhakhi ho itwaho. Ndi zwa vhukuma uri zwi nga kha ḓi konḓa u tenda uri eneo mafhungo ndi ngoho. Fhedzi arali ri tshi tamela mashudu muthu ane ra mu funa, ri ḓo ṱoḓa uri a wane ndayo ya Mudzimu ya lufuno nahone a i ṱanganedze. (Mirero 3:11, 12) Samusi ri Vhakriste vha re na lufuno, ri dovha ra ṱoḓa “u shuma zwavhuḓi kha zwithu zwoṱhe.”—Vha-Heberu 13:18.

11. Nga ṅwambo wa uri “lufuno . . . lu fuka zwoṱhe,” ri fanela u lwela u ita mini malugana na vhukhakhi ha vhatendi nga riṋe?

11 “Lufuno . . . lu fuka zwoṱhe.” Nga lwa thevhedzaipfi, eneo maipfi a amba uri “lu tiba zwithu zwoṱhe.” (Kingdom Interlinear) Petro ya U Thoma 4:8 i ri: “Lufuno lu fukedza vhunzhi ha zwivhi.” Ee, Mukriste ane a langiwa nga lufuno ha fhisetsheli u bvukulula u sa fhelela na vhukhakhi ha vhahawe vha Vhakriste. Kha vhuimo vhunzhi, vhukhakhi ha vhatendi nga riṋe ndi vhuṱuku nahone vhu nga fukedzwa nga lufuno.—Mirero 10:12; 17:9.

Vhathu vha Yehova vha ṱalulwa nga u funana

12. Muapostola Paulo o sumbedza hani uri u fulufhela Filemoni, nahone ri nga guda mini kha tsumbo ya Paulo?

 12 ‘Lufuno lu tenda zwoṱhe.’ Ṱhalutshedzelo ya Moffatt i amba uri lufuno “misi yoṱhe lu fhisetshela u tenda zwa khwine.” A ri humbuleli vhatendi nga riṋe, ra timatima zwiṱuṱuwedzi zwavho. Lufuno lu ri thusa “u tenda zwa khwine” nga vhahashu na u vha fulufhela. * Ṱhogomelani tsumbo kha vhurifhi ha Paulo he a vhu ṅwalela Filemoni. Paulo o vha o vhu ṅwalela u itela u ṱuṱuwedza Filemoni uri a ṱanganedze phuli ye ya vha yo shavha, ine ya pfi Onesimo, we nga tshenetsho tshifhinga a vha o no vha Mukriste. Nṱhani ha u kombetshedza Filemoni, Paulo o ambedzana nae nga lufuno. O amba uri u fulufhela uri Filemoni u ḓo ita zwo lugaho, a tshi ri: “Ndo U ṅwalela nga u fulufhela u thetshelesa hau. Na hone ndi a zwi ḓivha zwauri U ḓo ita na zwi fhiraho zwe nda amba.” (Ndimana 21) Musi lufuno lu tshi ri sudzulusela u fulufhela vhahashu, ri vha ita uri vha sumbedze pfaneleo dzavho dzavhuḓi vhukuma.

13. Ri nga sumbedza hani uri ri fulufhela uri vhahashu vha ḓo ita zwa khwine?

13 ‘Lufuno lu fulufhela zwoṱhe.’ Samusi lufuno lu tshi ita uri ri fulufhele vhaṅwe, lu dovha lwa ita uri ri vhe na fulufhelo nga havho. Musi ri tshi ṱuṱuwedzwa nga lufuno, ri ḓo fulufhela uri vhahashu vha ḓo ita zwa khwine. Sa tsumbo, arali wahashu a “kanganyedzwa, a vhuya a khakha,” ri vha na fulufhelo ḽa uri u ḓo aravha zwavhuḓi vhuḓidini ha lufuno ha u mu khakhulula. (Vha-Galata 6:1) Ri dovha ra vha na fulufhelo ḽa uri vha re na lutendo lu tseka-tsekaho vha ḓo lu khwaṱhisa. A ri fheleli mbilu vhathu vho raloho, ri ita zwi re maanḓani ashu u itela u vha thusa uri vha khwaṱhe lutendoni. (Vha-Roma 15:1; 1 Vha-Thesalonika 5:14) Naho arali muthu ane ra mu funa a pambuwa, a ri fhelelwi nga fulufhelo ḽa uri ḽiṅwe ḓuvha u ḓo ḓihumbula nahone a vhuyelela kha Yehova, u fana na murwa wa ḽihwarahwara wa kha tshifanyiso tsha Yesu.—Luka 15:17, 18.

14. U konḓelela hashu hu nga lingiwa hani ngomu tshivhidzoni, nahone lufuno lu ḓo ri thusa uri ri aravhe hani?

 14 ‘Lufuno lu konḓelela zwoṱhe.’ U konḓelela hu ita uri ri kone u ima ro khwaṱha musi ro sedzana na zwithu zwi nyabwisaho kana maṱhupho. U konḓelela hashu a hu lingiwi nga vhathu vha re nnḓa ha tshivhidzo fhedzi. Nga zwiṅwe zwifhinga ri nga lingiwa na nga vhathu vha re tshivhidzoni. Nga zwiṅwe zwifhinga vhahashu vha nga kha ḓi ri kula nungo nga ṅwambo wa u sa fhelela. Ri nga kha ḓi pfiswa vhuṱungu nga maipfi a ṱhavhaho. (Mirero 12:18) Khamusi maṅwe mafhungo tshivhidzoni ho ngo dzudzanywa nga nḓila ye ra vha ro humbula ngayo. Ri nga kha ḓi sinyuswa nga matshilele a muṅwe wahashu a ṱhonifheaho, zwa ita uri ri ḓivhudzise uri, ‘Ndi ngani Mukriste a tshi ita zwithu zwo raliho?’ Musi ro sedzana na vhuimo ho raloho, naa ri ḓo ḓisendedza kule na tshivhidzo nahone ra litsha u shumela Yehova? Ri nga si ite zwenezwo arali ri na lufuno! Ee, lufuno lu ḓo ri thivhela uri ri sa livhise ṱhogomelo yashu kha vhukhakhi ha wahashu lune ra sa tsha vhona naho tshi tshini tshavhuḓi khae kana tshivhidzoni tshoṱhe. Lufuno lu ri ita uri ri dzule ri tshi fulufhedzea kha Mudzimu nahone ri tikedze tshivhidzo hu sa londwi zwine zwa ambiwa kana u itwa nga vhaṅwe vhathu vha songo fhelelaho.—Psalme ya 119:165.

Zwine Lufuno Lwa Sa Vhe Zwone

15. Vivho ndi mini nahone lufuno lu ri thusa hani uri ri iledze enea maḓipfele a re na khombo?

15 “Lufuno a lu na vivho.” (NW) Vivho ḽi nga ita uri ri tame zwine vhaṅwe vha vha nazwo—thundu dzavho, ndugelo dzavho, kana vhukoni havho. Vivho ḽo raloho ḽi bveledzwa nga tseḓa, ḽi na khombo ngauri arali ḽa sa ṱhogomelwa ḽi nga thithisa mulalo wa tshivhidzo. Ndi mini zwine zwa ḓo ri thusa u lwisana na ‘muya wo fhaṱelaho wa vivho’? (Yakobo 4:5, vhambedzani NW.) Ndi lufuno. Yeneyi pfaneleo yavhuḓi i ḓo ri ita uri ri takale na vhane zwithu zwa vhonala zwi tshi khou vha tshimbilela zwavhuḓi vhutshiloni. (Vha-Roma 12:15) Lufuno lu ri thusa uri ri sa khukhulisee musi muṅwe muthu a tshi khoḓiwa nga ṅwambo wa vhukoni hawe kana nga zwithu zwi swayeaho zwe a zwi swikelela.

16. Arali ri tshi funa vhahashu ngangoho, ndi ngani ri tshi fanela u iledza u zuwa nga ha zwine ra zwi ita tshumeloni ya Yehova?

 16 “Lufuno . . . a lu fhafhaḓi [“zuwi,” NW], a lu ḓi-kukumusi.” Lufuno lu ri ita uri ri sa ṱongise vhukoni hashu kana mishumo yashu. Arali ngangoho ri tshi funa vhahashu, naa ri nga dzulela u zuwa nga ṅwambo wa u bvelela hashu vhuḓinḓani kana nga ndugelo dzashu tshivhidzoni? U zuwa ho raloho hu nga nyabwisa vhaṅwe, ha vha ita uri vha ḓipfe vhe si tshithu. Lufuno a lu ri iti uri ri ḓikukumuse nga ṅwambo wa ndugelo dza tshumelo dze ra ṋewa nga Mudzimu. (1 Vha-Korinta 3:5-9) Zwiṅwe hafhu, lufuno “a lu ḓi-kukumusi,” kana nga nḓila ye zwa ambiwa ngayo kha The New Testament in Modern English, a lu “ḓidzhieli nṱha.” Lufuno lu ri ita uri ri sa ḓivhone ri vha khwine u fhira vhaṅwe.—Vha-Roma 12:3.

17. Lufuno lu ri sudzulusela uri ri humbulele vhaṅwe nga nḓila-ḓe, nahone ri fanela u iledza u ḓifara ha mufuda-ḓe?

17 “Lufuno . . . a lu na tseḓa.” Muthu a re na tseḓa u ita zwithu nga nḓila i songo teaho kana i sinyusaho. Buḓo ḽo raloho a si ḽa lufuno, ngauri ḽi sumbedza uri muthu ha londi maḓipfele na mutakalo wa vhaṅwe. Zwo fhambanaho na zwenezwo, lufuno lu re na vhuthu lu ri sudzulusela u humbulela vhaṅwe. Lufuno lu ita uri ri vhe na mikhwa yavhuḓi, matshilele a u ofha Mudzimu, nahone ri ṱhonifhe vhatendi nga riṋe. Nga zwenezwo, lufuno lu nga si ri tendele uri ri ṱanganele kha “zwo vhifhaho”—vhukuma, lu nga si ri ite uri ri ḓifare nga nḓila ine ya ḓo ofhisa kana u khukhulisa vhahashu vha Vhakriste.—Vha-Efesa 5:3, 4.

18. Ndi ngani muthu a re na lufuno a sa kombetshedzi uri zwithu zwi itwe nga nḓila yawe?

18 “Lufuno . . . a lu ḓi-ṱoḓeli zwalwo.” Revised Standard Version hafha i ri: “Lufuno a lu fareleli kha ḽa uri zwithu zwi itwe nga nḓila yalwo.” Muthu a re na lufuno ha kombetshedzi uri zwithu zwi itwe nga nḓila ine a funa ngayo, zwa vho tou nga mavhonele awe ndi one o teaho misi yoṱhe. Ha kombetshedzi vhaṅwe vhathu, a shumisa maanḓa awe u itela u kandeledza vha re na mavhonele o fhambanaho na awe. Tshipimbi tsho raloho tshi ḓo sumbedza u ḓihudza, nahone Bivhili i ri: “Tshi-tevhela-mazuwo  ndi u wa; tshi-tevhela-u-ḓi-hudza ndi u khukhuliwa.” (Mirero 16:18) Arali vhukuma ri tshi funa vhahashu, ri ḓo ṱhonifha mavhonele avho, nahone arali zwi tshi konadzea, ri ḓo tendelana na zwiimo. Muya wa u tendelana na zwiimo u tshimbidzana na maipfi a Paulo ane a ri: “Hu so ngo vha na ané a ḓi-ṱoḓela zwawe ene muṋe, muthu nga a vhavhalele muṅwe.”—1 Vha-Korinta 10:24.

19. Lufuno lu ri thusa uri ri aravhe hani musi vhaṅwe vha tshi ri khakhela?

19 “Lufuno . . . a lu sinyukani . . . , a lu dzuli lu tshi vhalela muthu vhuvhi.” Lufuno a lu ṱavhanyi u sinyuswa nga zwine vhaṅwe vha zwi amba kana u zwi ita. Ndi ngoho uri nga nzulele ri a sinyuwa musi vhaṅwe vhathu vha tshi ri khakhela. Fhedzi naho hu na tshiitisi tshi pfalaho tsha u sinyuwa, lufuno a lu ri tendeli uri ri dzule ro sinyuwa. (Vha-Efesa 4:26, 27) Ri nga si vhulunge maipfi kana zwiito zwi vhaisaho, zwa tou nga ro zwi ṅwala kha bugu ya milandu uri ri sa zwi hangwe. Nṱhani hazwo, lufuno lu ri sudzulusela u edzisa Mudzimu washu wa lufuno. Samusi ro zwi vhona kha Ndima ya 26, Yehova u a hangwela musi hu na tshiitisi tshi pfalaho tsha u ita zwenezwo. Musi a tshi hangwela, u a hangwa, ndi uri ha nga ḓo ri ṱarafela zwivhi zwashu tshifhingani tshi ḓaho. Naa a ri takaleli uri Yehova ha ri vhaleli vhuvhi?

20. Ri fanela u ita mini musi mutendi nga riṋe o ita tshivhi nahone a dzhena khomboni nga ṅwambo wa zwenezwo?

20 “Lufuno . . . a lu takaleli vhutshinyi.” Kha haya mafhungo The New English Bible i vhalea nga u rali: “Lufuno . . . a lu pembeli musi vhaṅwe vha tshi wela zwivhini.” Ṱhalutshedzelo ya Moffatt i ri: “Lufuno a lu vhuyi lwa takala musi vhaṅwe vha tshi pambuwa.” Lufuno a lu takaleli vhutshinyi, nga u ralo a ri sokou ṱanzwa maṱo ra lavhelesa musi ri tshi vhona vhuaḓa naho vhu vhufhio. Ri ita mini musi mutendi nga riṋe a tshi ita tshivhi nahone a dzhena khomboni nga ṅwambo wa zwenezwo? Lufuno a lu nga ḓo ri ita uri ri takale, zwa tou nga ri ri ‘Koṱo! Zwo mu tea!’ (Mirero 17:5) Nṱhani hazwo, ri a takala musi wahashu we a khakha a tshi dzhia vhukando ho teaho u itela u fhaṱa vhumuya hawe.

 “Maitele A Fhiraho Hayo Kule-kule”

21-23. (a) Paulo o vha a tshi khou amba mini musi a tshi ri “lufuno na lini na lini a lu lovhi”? (b) Ri ḓo haseledza mini kha ndima ya u fhedza?

21 “Lufuno na lini na lini a lu lovhi.” Paulo o vha a tshi khou amba mini nga eneo maipfi? Samusi ro zwi vhona kha vhubvo ha mafhungo, o vha a tshi khou haseledza zwifhiwa zwa muya zwe Vhakriste vha u thoma vha vha vhe nazwo. Zwenezwo zwifhiwa zwo vha zwi zwiga zwa uri Mudzimu u a ṱanganedza tshivhidzo tshine tsha kha ḓi tou bva u vhumbiwa. Fhedzi a si Vhakriste vhoṱhe vhe vha vha vha tshi fhodza, porofita, kana u amba nga dzindimi. Naho zwo ralo, zwenezwo zwo vha zwi sa dini ngauri zwifhiwa zwa vhuṱolo zwo vha zwi tshi ḓo fheleledza zwo guma. Fhedzi ho vha hu tshi ḓo sala tshiṅwe tshithu tshine Mukriste muṅwe na muṅwe a nga tshi ṱahulela. Tsho vha tshi tshithu tshi swayeaho, tshine tsha ḓo fhedza tshifhinga  tshilapfu, u fhira zwifhiwa zwoṱhe zwa vhuṱolo. Zwi re zwone ndi uri Paulo o tshi vhidza “maitele a fhiraho hayo kule-kule.” (1 Vha-Korinta 12:31) “Maitele a fhiraho hayo kule-kule” o vha e afhio? O vha e lufuno.

Lufuno lu ri sudzulusela u fulufhela vhahashu

22 Vhukuma, lufuno lwa Vhukriste lwe Paulo a lu ṱalusa “na lini na lini a lu lovhi,” ndi uri lu nga si vhuye lwa guma. U swika na ṋamusi, vhatevheli vha ngoho vha Yesu vha ṱalulwa nga lufuno lwa vhurathu na vhukomana lwa u ḓiṋekedza. Naa a ri vhoni lufuno lwo raloho zwivhidzoni zwa vhagwadameli vha Yehova ḽifhasini ḽoṱhe? Lwonolo lufuno lu ḓo vha hone lini na lini, ngauri Yehova u fulufhedzisa u ṋea vhashumeli vhawe vha fulufhedzeaho vhutshilo vhu sa fheli. (Psalme ya 37:9-11, 29) Kha ri bvele phanḓa ri tshi ita zwi re maanḓani ashu nga u ‘tshimbila lufunoni.’ Arali ra ita zwenezwo, ri ḓo wana dakalo ḽihulwane ḽi bveledzwaho nga u ṋea. Zwiṅwe hafhu, ri nga bvela phanḓa ri tshi tshila—ee, ri ḓo bvela phanḓa ri tshi funana—lini na lini, ri tshi edzisa Yehova, Mudzimu washu wa lufuno.

23 Kha ino ndima ine ya ṱhaphudza tshipiḓa tshine tsha amba nga lufuno, ro haseledza nḓila ine ra nga sumbedza ngayo lufuno. Fhedzi samusi lufuno lwa Yehova lu tshi ri vhuyedza nga nḓila nnzhi—nahone ri tshi vhuyelwa nga maanḓa awe, khaṱulokwayo yawe, na vhuṱali hawe—ri fanela u ḓivhudzisa uri ‘Ndi nga sumbedza hani Yehova uri ngangoho ndi a mu funa?’ Yeneyo mbudziso i ḓo haseledzwa kha ndima yashu ya u fhedza.

^ phar. 12 Naho zwo ralo, lufuno lwa Vhukriste a lu fhurei nga hu leluwaho. Bivhili i a ri ṱuṱuwedza: “Hone ndi a ni kwengweledza, vharathu vhanga, uri ni sedze vha itaho dziphiringanyo na zwikhukhuliso [“ni vha iledze,” NW].”—Vha-Roma 16:17.