Pfukelani kha mafhungo

Pfukelani kha zwi re ngomu

 NGUDO 56

Yosia O Funa Mulayo Wa Mudzimu

Yosia O Funa Mulayo Wa Mudzimu

Yosia o vha khosi ya Yuda musi e na miṅwaha ya malo. Misini yeneyo, vhathu vho vha vha tshi khou ita zwa manditi na u rabela zwifanyiso. Musi Yosia e na miṅwaha ya 16, o lingedza u guda nḓila yo teaho ya u rabela Yehova. Musi e na miṅwaha ya 20, a thoma u fhelisa midzimu ya zwifanyiso na dzi aletare kha shango ḽoṱhe. Nahone musi e na miṅwaha ya 26, a dzudzanya uri thembele ya Yehova i vusuluswe.

Tshifhe muhulu Hilikia a wana mupombo wa Mulayo wa Yehova thembeleni—khamusi mupombo we wa ṅwaliwa nga Mushe. Muṅwaleli wa khosi Safani a isa mupombo kha Yosia nahone a thoma u vhalela nṱha wonoyo Mulayo. Musi Yosia o thetshelesa, a ṱhogomela uri ho no fhela miṅwaha minzhi vhathu vha si tsha thetshelesa Yehova. Khosi Yosia a vhudza Hilikia a ri: ‘Yehova o ri sinyutshela vhukuma. Tshimbilani ni yo amba nae. Yehova u ḓo ni vhudza zwine ra fanela u zwi ita.’ Yehova a fhindula a tshi shumisa muporofita wa mufumakadzi ane a pfi Huluda a ri: ‘Vhathu vha Yuda vho nṱutshela. Vha ḓo pfiswa vhuṱungu fhedzi hu si zwino Yosia a kha ḓi vha khosi, ngauri o ḓiṱukufhadza.’

Musi Khosi Yosia a tshi pfa wonoyo mulaedza, a ya thembeleni nahone a kuvhanganya vhathu vha Yuda. A vhalela nṱha lushaka lwoṱhe Mulayo wa Yehova. Yosia na vhathu vha fulufhedzisa u thetshelesa Yehova nga mbilu dzavho dzoṱhe.

 Ho vha ho no fhela miṅwaha minzhi lushaka lwa Yuda lu si tsha pembelela Paseka. Fhedzi musi Yosia a tshi vhala kha Mulayo uri Paseka i tea u pembelelwa ṅwaha muṅwe na muṅwe, a vhudza lushaka a ri: ‘Ri ḓo itela Yehova Paseka.’ Nga zwenezwo Yosia a lugisela u ita zwiṱhavhelo zwinzhi nahone a dzudzanya uri hu vhe na vhaimbi thembeleni. Lushaka lwa ita Paseka, ha tevhela Vhuṱambo ha Tshinkwa tshi si na Mbiliso, he ha fhedza maḓuvha a sumbe. Paseka yo raloho yo guma misini ya Samuele. Vhukuma Yosia o vha a tshi funa Mulayo wa Mudzimu. Naa ni a takalela u guda nga ha Yehova?

“Fhungo ḽau ndi ḓenzhe ḽa milenzhe yanga, ndi tshedza tsha nḓila yanga.”​—Psalme ya 119:105