Pfukelani kha mafhungo

Pfukelani kha zwi re ngomu

 NGUDO 50

Yehova O Tsireledza Yosafati

Yehova O Tsireledza Yosafati

Yosafati, khosi ya Yuda, o fhelisa aletare dza Baali na u rabela zwifanyiso shangoni. O vha a tshi ṱoḓa uri vhathu vha ḓivhe milayo ya Yehova. Nga zwenezwo a rumela vhakololo na Vhalevi kha ḽoṱhe ḽa Yuda u itela u funza vhathu milayo ya Yehova.

Tshaka dza tsini dzo vha dzi tshi ofha u lwa na Yuda ngauri dzo vha dzi tshi zwi ḓivha uri Yehova o vha a tshi tsireledza vhathu vhawe. Dzo ita na u ḓisela Khosi Yosafati zwifhiwa. Fhedzi Vhamoaba, Vhaamoni, na vha re dzinguni ḽa Seiri vha ḓa u lwa na Yuda. Yosafati o zwi ḓivha uri u ṱoḓa thuso ya Yehova. A vhidza vhanna, vhafumakadzi, na vhana vhoṱhe uri vha kuvhangane Yerusalema. A rabela phanḓa havho vhoṱhe a ri: ‘Yehova, nga nnḓa ha thuso yau, ri nga si kunde. Ri humbela uri u ri vhudze zwine ra fanela u ita.’

Yehova a fhindula thabelo a ri: ‘Ni songo ofha. Ndi ḓo ni thusa. Khwaṱhani, ni ime, nahone ni vhone ndi tshi ni tshidza.’ Yehova o vha tshidza hani?

Nga matsheloni a tevhelaho, Yosafati o khetha vhaimbi nahone a vha vhudza u ri vha tshimbile phanḓa ha mmbi. Vha tshimbila u bva Yerusalema vha ya fhethu hune vha ḓo lwa hone hune ha pfi Thekoa.

Musi vhaimbi vha tshi khou renda Yehova vho takala nga ipfi ḽihulu, Yehova a lwela vhathu vhawe. O ita uri Vhaamori na Vhamoaba vha ḓaḓe lwe vha thoma u lwa nga tshavho, nahone vha fa vhoṱhe. Fhedzi Yehova o tsireledza vhathu vha Yuda, maswole, na vhotshifhe. Zwe Yehova a zwi ita zwa swika kha vhathu vhoṱhe vha re miḓini ya nga tsini, nahone vha zwi ḓivha uri Yehova u kha ḓi tsireledza vhathu vhawe. Yehova o tsireledza hani vhathu vhawe? Nga nḓila nnzhi. Ha ṱoḓi thuso ya vhathu u ita nga u ralo.

“U lwa navho’ henefho a si mushumo waṋu; sendelani ni ime ni lavhelese, ni vhone Yehova a tshi lamulela.”​—2 Koronika 20:17