Pfukelani kha mafhungo

Pfukelani kha zwi re ngomu

 NGUDO 49

Mufumakadzi Muvhi U Dzhielwa Vhukando

Mufumakadzi Muvhi U Dzhielwa Vhukando

Musi Khosi Ahaba e fasitereni ḽa nnḓu yawe ngei Yeseriele, o vha a tshi kona u vhona tsimu ya minḓirivhe ya Nabothe. Ahaba o ṱoḓa yeneyo tsimu, nahone a lingedza u i renga kha Nabothe. Fhedzi Nabothe a hana u mu rengisela yone nga uri zwo vha zwi tshi lwisana na Mulayo wa Yehova u rengisa tsimu ya ifa. Naa Ahaba o ṱhonifha Nabothe nge a ṱoḓa u ita zwo lugaho? Hai. Ahaba o sinyuwa vhukuma. O sinyuwa lwe a hana na u bva kamarani yawe, nahone a hana na zwiḽiwa.

Mufumakadzi wa Ahaba, Isebele muvhi, o mu vhudza a ri: ‘Ni khosi ya Isiraele. Ni nga wana zwoṱhe zwine na zwi ṱoḓa. Ndi ḓo vhona uri ni a i wana heiḽa tsimu.’ A ṅwalela vhahulwane vha muḓi luṅwalo, a vha vhudza uri vha pomoke Nabothe uri o sema Mudzimu nahone vha mu kanḓe nga matombo a fe. Vhahulwane vha ita zwe Isebele a amba nahone nga murahu Isebele a vhudza Ahaba a ri: ‘Nabothe o fa. Tsimu ya minḓirivhe ndi yaṋu.’

Nabothe a si ene e eṱhe we a vhulaiwa nga Isebele e si na mulandu. O vhulaha vhathu vhanzhi vhe vha vha vha tshi funa Yehova. O vha a tshi rabela zwifanyiso na u ita zwiṅwe zwithu zwivhi. Yehova o vhona vhuvhi hoṱhe he Isebele a vhu ita. O vha a tshi ḓo ita mini nga hae?

Musi Ahaba o no fa, ṅwana wawe Yoramu a vha khosi. Yehova a ruma munna ane a pfi Yehu u itela u ṱarafa Isebele na muṱa wawe.

Yehu o gidima nga gariki yawe a ya Yeseriele, hune Isebele a dzula hone. Yoramu a ṱuwa nga gariki yawe a yo ṱangana na Yehu nahone a mu vhudzisa a ri: ‘Naa no ḓa nga mulalo?’ Yehu a ri: ‘Hu nga si vhe na mulalo arali mme aṋu, Isebele, a kha ḓi ita vhuvhi.’ Yoramu a  lingedza u rembulusa gariki yawe uri a shavhe. Fhedzi Yehu a mu ṱhavha nga musevhe, nahone a fa.

Nga murahu Yehu a ya nḓuni ya Isebele. Musi a tshi pfa uri u khou ḓa, a ḓi ḓodza zwiḓolo, a nakisa mavhudzi, nahone a mu lindela fasitereni ḽa nnḓu ya nṱha. Musi Yehu a tshi swika, ho ngo mu lumelisa zwavhuḓi. Yehu a vhidzelela vhashumeli vha Isebele vhe vha vha vho ima tsini hawe a ri: ‘Mu poseni fhasi!’ Vha sukumedzela Isebele nnḓa nga fasiṱere, a wela fhasi nahone a fa.

Nga murahu ha zwenezwo, Yehu a vhulaya vhana vha vhatukana vha Ahaba vha 70 nahone a fhelisa vhurabeli ha Baali henefho shangoni. Naa ni a vhona uri Yehova u ḓivha zwoṱhe nahone nga tshifhinga tsho teaho, u dzhiela vhukando vhane vha ita vhuvhi?

“Ifa ḽe ḽa tou gidimelwa u rangani, ngavhuya ḽi yo’ shaya phaṱutshedzo.”​—Mirero 20:21