Pfukelani kha mafhungo

Pfukelani kha zwi re ngomu

 NGUDO 39

Khosi Ya U Thoma Ya Isiraele

Khosi Ya U Thoma Ya Isiraele

Yehova o ṋea Vhaisiraele vhahaṱuli uri vha vha range phanḓa, fhedzi vhone vho ṱoḓa khosi. Vha ri kha Samuele: ‘Tshaka dzoṱhe dzo ri tangaho dzi na khosi. Na riṋe ri khou ṱoḓa yashu.’ Samuele a vhona uri zwenezwi zwo khakhea, nga u ralo a rabela Yehova nga hazwo. Yehova a ri khae: ‘Vhathu a vha khou landula inwi. Vha khou landula nṋe. Vha vhudzeni uri vha nga vha na khosi fhedzi i ḓo ṱoḓa zwithu zwinzhi khavho.’ Naho zwo ralo, vhathu vha ri: ‘Zwo luga. Ri khou ṱoḓa khosi!’

Yehova a vhudza Samuele uri munna ane a pfi Saulo u ḓo vha khosi ya u thoma. Musi Saulo a tshi yo dalela Samuele ngei Rama, Samuele a mu ḓodza uri a vhe khosi nga u mu shela mapfura kha ṱhoho.

Nga murahu Samuele a vhidza Vhaisiraele u itela u vha sumbedza khosi yavho ntswa. Fhedzi vha ṱoḓa Saulo vha si mu wane. Ni a ḓivha uri ndi ngani? Ngauri o vha o dzumbana vhukati ha mihwalo. Musi vha tshi fheleledza vho mu wana, vha mu ḓisa vhukati ha vhathu. Saulo o vha o lapfa u fhira vhathu vhoṱhe nahone o vha o naka. Samuele a ri: ‘Hoyu ndi ene we Yehova u mu nanga.’ Vhathu vha vhidzelela vha ri: ‘Khosi kha i lalame!’

Mathomoni Khosi Saulo o thetshelesa Samuele na Yehova. Fhedzi a shanduka. Sa tsumbo, khosi yo vha i songo tea u ṋekedza zwiṱhavhelo. Kha tshiṅwe tshiitea, Samuele a vhudza Saulo uri a mu lindele u khou ḓa, fhedzi Samuele a lenga u swika. Ngauralo Saulo a phetha u ṋekedza zwiṱhavhelo nga ene muṋe. Samuele o dzhia hani zwenezwo? O mu vhudza a ri: ‘No vha no fanela no thetshelesa Yehova.’ Naa Saulo o vha a tshi ḓo guda kha honoho vhukhakhi?

Nga murahu, musi Saulo a tshi ya u lwa na Vhaameleke, Samuele o vhudza Saulo uri a vhulahe vhathu vhoṱhe. Fhedzi Saulo a phetha u sa vhulaha Khosi Agaga. Yehova a vhudza  Samuele a ri: ‘Saulo o nndaṱa nahone ha nthetshelesi.’ Samuele a ṱungufhala vhukuma nahone a vhudza Saulo a ri: ‘Ngauri a ni tsha thetshelesa Yehova, u ḓo khetha iṅwe khosi.’ Musi Samuele a tshi rembuluwa uri a ṱuwe, Saulo a mu fara nahone tshipiḓa tsha tshiambaro tsha Samuele tsha kheruwa. Samuele a ri kha Saulo: ‘Yehova o ni dzhiela vhuhosi.’ Yehova o vha tshi ḓo ṋea vhuhosi muṅwe muthu ane a ḓo mu thetshelesa.

“U pfa hu fhira tshiṱhavhelo.”​—1 Samuele 15:22