Pfukelani kha mafhungo

Pfukelani kha zwi re ngomu

 NGUDO 25

Thebenekele Ya Vhurabeli

Thebenekele Ya Vhurabeli

Musi Mushe e Thavhani ya Sinai, Yehova o mu vhudza uri a fhaṱe dennde ḽo khetheaho, ḽi vhidzwaho thebenekele, hune Vhaisiraele vha ḓo kona u mu rabela hone. Vho vha vha tshi ḓo kona u hwala yeneyo thebenekele musi vha tshi khou bvela phanḓa na lwendo.

Yehova o ri: ‘Vhudzani vhathu uri vha ṋeele nga zwine vha nga kona u itela u fhaṱa thebenekele.’ Vhaisiraele vha ṋeela nga musuku, siliva, khopha, matombo a thengo khulu na dzidzhuwele. Vho dovha vha ṋeela nga malabi, ḽinene, mikumba na zwiṅwe zwithu zwinzhi. Vho ṋeela nga zwinzhi lwe Mushe a vhuya a ri: ‘Zwo no ḓalesa! Ni songo tsha ḓisa zwiṅwe.’

Vhanna na vhafumakadzi vhanzhi vha re na vhutsila vho thusa kha u fhaṱa thebenekele. Yehova o vha ṋea vhuṱali uri vha kone u ita wonoyu mushumo. Vhaṅwe vho luka thambo, u runga malabi kana u a khavhisa. Vhaṅwe vho vhaḓa matombo, u shuma nga musuku kana u vhaḓa thanda.

Vho fhaṱa thebenekele u ya nga he Yehova a vha laedza ngaho. Vho ita na xaradeni ḽo nakaho ḽa u fhandekanya thebenekele, ya vha na fhethu Hukhethwa na Hukhethwa-khethwa. Fhethu Hukhethwa-khethwa ho vha hu na mbulungelo ya mulanga, yo itwaho nga thanda dza muunga na nga musuku. Fhethu Hukhethwa ho vha hu na tshiṱomambone tsha musuku, ṱafula na aletare ya zwioro. Muṱani ho vha hu na sambelo ḽa khopha na aletare khulwane. Mbulungelo ya mulanga yo vha i tshi humbudza Vhaisiraele nga fulufhedziso ḽe vha ita ḽa uri vha ḓo thetshelesa Yehova. Ni a ḓivha uri mulanga ndi mini? Ndi fulufhedziso ḽo khetheaho.

 Yehova o khetha Aroni na vharwa vhawe uri vha shume thebenekeleni vhe vhotshifhe. Vho vha vho tea u i ṱhogomela na u itela Yehova zwiṱhavhelo henefho. Ndi Aroni, tshifhe muhulwane fhedzi, we a vha o tendelwa u dzhena fhethu Hukhethwa-khethwa. U dzhena henefho luthihi nga ṅwaha u itela u ṋekedza tshiṱhavhelo tsha zwivhi zwawe, zwa muṱa wawe na zwivhi zwa lushaka lwoṱhe lwa Isiraele.

Vhaisiraele vho fhedza thebenekele nga murahu ha ṅwaha vho bva Egipita. Zwino vha na fhethu hune vha rabela hone Yehova.

Yehova a ḓadza thebenekele nga vhugala hawe nahone ya vha na gole nṱha hayo. Vhaisiraele vho vha vha songo tea u tshimbila arali gole li tshee nṱha ha thebenekele. Fhedzi musi gole ḽi tshi takuwa, vho vha vha tshi zwi ḓivha uri ndi tshifhinga tsha uri vha ṱuwe. Vho vha vha tshi athulula thebenekele nahone vha tevhela hune gole ḽa ya hone.

“Nda pfa ipfi ḽihulu ḽi tshi bva kha khuluṋoni ḽi tshi ri: ‘Asiyo! Nnḓu ya mulanga ya Mudzimu vhukati ha vhathu, huno u ḓo dzula navho, nahone vha ḓo vha vhathu vhawe. Mudzimu ene a vha navho.’”​—Nzumbululo 21:3