Pfukelani kha mafhungo

Pfukelani kha zwi re ngomu

 NGUDO 26

Ṱholi Dza Fumimbili

Ṱholi Dza Fumimbili

Vhaisiraele vho ṱuwa Thavhani ya Sinai nahone vha tshimbila sogani ḽa Pharani vha ya fhethu hu no pfi Kadese. Henefho Yehova a vhudza Mushe a ri: ‘Rumani vhanna vha 12, muthihi kha lushaka luṅwe na luṅwe, u yo ṱola ḽa Kanana, shango ḽine nda ḓo ḽi fha Vhaisiraele.’ Nga zwenezwo Mushe a khetha vhanna vha 12 nahone a ri khavho: ‘Iyani Kanana nahone ni vhone arali ḽeneḽo shango ḽi tshi fanelea u lima zwiḽiwa. Ni sedze arali vhathu vha hone vhe magoswi kana vhe na maanḓa nahone ni sedze arali vha tshi dzula madenndeni kana miḓini.’ Ṱholi dza 12, u katela na Yoshua na Kalebe, dza livha Kanana.

Ṱholi dzo vhuya nga murahu ha maḓuvha a 40, dzi na mahuyu, maphomagiraneithi na dzinḓirivhe. Ṱholi dza ri: ‘Shango ndi ḽavhuḓi, fhedzi vhathu vha hone vha na maanḓa na mbondo dza miḓi ndi khulwane.’ Nga murahu Kalebe a ri: ‘Ri nga vha kunda. Kha ri ṱuwe zwino!’ Naa ni a ḓivha uri ndi ngani Kalebe o amba zwenezwo? Ngauri ene na Yoshua vho fulufhela Yehova. Fhedzi dziṅwe ṱholi dza fumi dza ri: ‘Hai! Vhathu vha hangei ndi vhalapfu, vha nga miswonḓa! Ri tou nga nzie khavho.’

Vhaisiraele vha kulea nungo. Vha thoma u gungula nahone vha amba nga tshavho vha ri: ‘Kha ri khethe muṅwe murangaphanḓa nahone ri vhuyelele Egipita. Ndi ngani ri tshi fanela u ya henefho fhethu nahone ri vhulawe?’ Yoshua na Kalebe vha ri: ‘Ni songo nyadza  Yehova nahone ni songo ofha. Yehova u ḓo ri tsireledza.’ Fhedzi Vhaisiraele a vho ngo ṱoḓa u pfa. Vho ṱoḓa u vhulaha Yoshua na Kalebe!

Yehova o ita mini? O ri kha Mushe: ‘Nga murahu ha zwoṱhe zwe nda itela Vhaisiraele, na zwino a vha nthetshelesi. Nga zwenezwo vha ḓo dzula henefha sogani miṅwaha ya 40 nahone vha ḓo fela henefha. Ndi vhana vhavho fhedzi na Yoshua na Kalebe vhane vha ḓo dzula shangoni ḽe nda vha fulufhedzisa ḽone.’

“Ni khou ofha mini, ndi ngani ni na lutendo luṱuku?”​—Mateo 8:26