Pfukelani kha mafhungo

Pfukelani kha zwi re ngomu

 NGUDO 20

Ṱhamu Dza Rathi Dzi Tevhelaho

Ṱhamu Dza Rathi Dzi Tevhelaho

Mushe na Aroni vho ya u vhudza Farao mulaedza wa Mudzimu vha ri: ‘Arali na sa tendela vhathu vhanga vha tshi ṱuwa, ndi ḓo rumela thunzi dzine dza luma shangoni.’ Dzenedzo thunzi dzine dza luma dza dzhena nḓuni dza Vhaegipita, vho pfumaho na vhashai. Shango ḽoṱhe ḽa ḓala thunzi dzine dza luma. Fhedzi shango ḽa Goseni, hune Vhaisiraele vha dzula hone, ho vha hu si na thunzi dzine dza luma. U thoma kha ṱhamu ya vhuṋa, dzo huvhadza Vhaegipita fhedzi. Farao a luvheledza a ri: ‘Humbelani Yehova a fhelise hedzi thunzi dzine dza luma. Vhoiwe ni nga ṱuwa zwaṋu.’ Fhedzi musi Yehova o no fhelisa dzenedzo thunzi, Farao a shandukisa muhumbulo wawe. Naa Farao u ḓo vhuya a guda?

Yehova a ri: ‘Arali Farao a sa tendeli vhathu vhanga vha tshi ṱuwa, zwifuwo zwa Vhaegipita zwi ḓo lwala nahone zwa fa.’ Nga ḓuvha ḽi tevhelaho, zwifuwo zwa thoma u fa. Fhedzi zwifuwo zwa Vhaisiraele a zwo ngo fa. Farao a dovha a ita swili, a si vha tendele vha tshi ṱuwa.

Nga zwenezwo, Yehova a vhudza Mushe uri a vhuyelele ha Farao nahone a hashele miḽora muyani. Miḽora ya vha buse ḽo ḓalaho muyani nahone ḽa nambatela Vhaegipita vhoṱhe. Ḽeneḽo buse ḽa bveledza zwilonda zwi vhavhaho kha Vhaegipita vhoṱhe na kha zwifuwo zwavho. Naho zwo ralo, Farao a si tendele Vhaisiraele vha tshi ṱuwa.

Yehova a rumela Mushe hafhu kha Farao na mulaedza wawe: ‘Naa ni kha ḓi hana u tendela vhathu  vhanga vha tshi ṱuwa? Matshelo hu ḓo na tshifhango shangoni.’ Ḓuvha ḽi tevhelaho, Yehova a rumela tshifhango, ḓumbu na mulilo. Ḽo vha ḽi ḓumbu ḽi fhiraho ḽe ḽa vhuya ḽa vha hone Egipita. Miri yoṱhe na zwimela zwa tshinyala, nga nnḓa ha zwa Goseni. Farao a ri: ‘Humbelani Yehova uri a fhelise hezwi zwithu! Nga murahu ni nga ṱuwa.’ Fhedzi musi tshifhango na mvula zwi tshi fhela, Farao a shandula muhumbulo wawe.

Nga zwenezwo Mushe a ri: ‘Nzie dzi ḓo ḽa miri ye ya si tshinyadzwe nga tshifhango.’ Guma ḽihulu ḽa nzie ḽa ḽa zwoṱhe zwe zwa vha zwo sala masimuni na kha miri. Farao a luvheledza a ri: ‘Humbelani Yehova uri a fhelise hedzi nzie.’ Na musi Yehova o no fhelisa dzenedzo nzie, Farao o dovha a ita swili.

Yehova a vhudza Mushe a ri: ‘Imiselani tshanḓa tshaṋu ṱaḓulu.’ Nga u ṱavhanya, ḽiṱaḓulu ha mbo ḓi vha na swiswi. Vhaegipita vho vha vha sa koni u vhona tshithu kana muṅwe muthu lwa maḓuvha mararu. Ndi Vhaisiraele fhedzi vhe vha vha vhe na tshedza nḓuni dzavho.

Farao a vhudza Mushe a ri: ‘Inwi na vhathu vhaṋu ni nga ṱuwa. Fhedzi siani zwifuwo zwa vhoiwe.’ Mushe a ri: ‘Ri tea u ṱuwa na zwifuwo zwashu u itela u zwi ṋekedza Mudzimu washu.’ Farao a sinyuwa vhukuma. A vhidzelela a ri: ‘Ṱuwani phanḓa hanga! Arali nda dovha nda ni vhona, ndi ḓo ni vhulaya.’

“Ndi hone ni tshi ḓo dovha na vhona, na kona u ṱalukanya muvhuya na muvhi, na kona u ṱalukanya we a shumela Yehova na we a si mu shumele.”​—Maleaxi 3:18