Pfukelani kha mafhungo

Pfukelani kha zwi re ngomu

 NGUDO 19

Ṱhamu Tharu Dza U Thoma

Ṱhamu Tharu Dza U Thoma

Vhaisiraele vho kombetshedzwa u shumesa vhe dziphuli. Yehova a ruma Mushe na Aroni kha Farao vhe na hoyu mulaedza: ‘Litshani vhathu vhanga vha ṱuwe uri vha ye u nthabela sogani.’ Farao a fhindula nga u ḓikukumusa a ri: ‘A thi ṱoḓi u pfa uri Yehova uri mini nahone a thi nga tendeli Vhaisiraele vha tshi ṱuwa.’ Nga zwenezwo, Farao a ita uri vha shumese u fhira na u thomani. Yehova o vha a tshi ḓo mu pfisa vhuṱungu. Ni a ḓivha uri nga nḓila-ḓe? O rwa Vhaegipita nga Ṱhamu dza Fumi. Yehova a vhudza Mushe a ri: ‘Farao ha ṱoḓi u nthetshelesa. Nga matsheloni, u ḓo vha e Mulamboni wa Nili. Iyani khae ni mu vhudze uri samusi a sa ṱoḓi u tendela vhathu vhanga vha tshi ṱuwa, maḓi oṱhe a Nili a ḓo shanduka a vha malofha.’ Mushe a thetshelesa nahone a ya kha Farao. Farao a vhona Mushe a tshi rwa Nili nga thonga nahone mulambo wa vha malofha. Mulambo wa thoma u nukha, khovhe dza fa nahone hu sa vhe na maḓi avhuḓi a u nwa mulamboni wa Nili. Naho zwo ralo, Farao a si tendele Vhaisiraele vha tshi ṱuwa.

 Nga murahu ha maḓuvha a sumbe, Yehova a dovha a ruma Mushe kha Farao na hoyu mulaedza: ‘Egipita hu ḓo ḓala zwiḓula arali na sa tendela vhathu vhanga vha tshi ṱuwa.’ Aroni a imisa thonga yawe nahone shango ḽoṱhe ḽa ḓala zwiḓula. Vhathu vha wana zwiḓula nḓuni dzavho, kha mimbete yavho na kha zwigoḓelo zwavho. A hu na he ha vha hu si na zwiḓula! Farao a luvheledza Mushe uri a humbele Yehova uri a fhelise yeneyi ṱhamu. Farao a fulufhedzisa uri u ḓo tendela Vhaisiraele vha tshi ṱuwa. Yehova a fhelisa yeneyo ṱhamu nahone Vhaegipita vha kuvhanganya zwiḓula zwo faho, zwa vha thulwi nnzhi. Shango ḽa thoma u nukha. Fhedzi Farao a si vha tendele vha tshi ṱuwa.

Yehova a vhudza Mushe a ri: ‘Aroni kha rwe fhasi nga thonga yawe nahone buse ḽi ḓo shanduka ḽa vha vhunyunyu kana thunzhi ṱhuku dzi lumaho.’ Nga u ṱavhanya vhunyunyu ha ḓala fhethu hoṱhe. Vhaṅwe vhathu vha Farao vha mu vhudza uri: ‘Heyi ṱhamu i bva ha Mudzimu.’ Naho zwo ralo, Farao ho ngo tendela Vhaisiraele vha tshi ṱuwa.

“Ngangoho ndi hone Nṋe ndi tshi ḓo vha funza uri vha ḓivhe tshanḓa tshanga na maanḓa anga; ndi hone vha tshi ḓo ḓivha zwauri ndi pfi Yehova.”​—Yeremia 16:21