Pfukelani kha mafhungo

Pfukelani kha zwi re ngomu

 NGUDO 21

Ṱhamu Ya Vhufumi

Ṱhamu Ya Vhufumi

Mushe o fulufhedzisa Farao uri ha tsha ḓo dovha a lingedza u ya khae. Musi a sa athu u ṱuwa, o vhudza Farao a ri: ‘Vhukati ha vhusiku, vhana vhoṱhe vha u thoma vha Vhaegipita , u bva kha ṅwana wa mutukana wa Farao u ya kha vhatukana vha dziphuli, vha ḓo fa.’

Yehova o vhudza Vhaisiraele uri vha ḽe zwiḽiwa zwo khetheaho. O ri: ‘Vhulahani nngu kana mbudzi ya nduna i re na ṅwaha muthihi nahone ni ḓodze malofha ayo kha fureme dzaṋu. Ṋama ni i gotshe nahone ni i ḽe na vhurotho vhu si na mbiliso. Ni ambare zwiambaro zwavhuḓi na zwienda, ni ḓilugiselele u ṱuwa. Vhusiku vhuno ndi ḓo ni vhofholola.’ Naa ni a kona u vhona uri Vhaisiraele vha nga vha vho vha vho takala lungafhani?

Vhukati ha vhusiku, muruṅwa wa Yehova o ya kha nnḓu dzoṱhe dza Egipita. Ho fa vhana vha u thoma kha nnḓu dzoṱhe dzi songo ḓodzwaho malofha kha fureme. Fhedzi muruṅwa o pfuka nnḓu dze dza vha dzo ḓodzwa malofha. Miṱa yoṱhe ya Vhaegipita, yo pfumaho na ya vhashai, yo felwa nga vhana. Fhedzi a hu na na ṅwana na muthihi wa Vhaisiraele o faho.

Na murwa wa Farao o fa. Farao o kundelwa u konḓelela honoho vhuṱungu. Nga u ṱavhanya a vhudza Mushe na Aroni a ri: ‘Vuwani. Ṱuwani hafha. Ṱuwani ni ye u shumela Mudzimu waṋu. Dzhiani zwifuwo zwaṋu nahone ni ṱuwe!’

Vhaisiraele vho ṱuwa Egipita musi ṅwedzi wo tshena, vho dzudzanywa u ya  nga miṱa na tshaka. Ho vha hu na vhanna vha 600 000 na vhafumakadzi na vhana vhanzhi. Zwiṅwe hafhu, vhathu vhanzhi vho ṱuwa navho u itela uri na vhone vha rabele Yehova. Vhaisiraele vho fhedzisela vho vhofhololwa!

U itela u humbula nḓila ye Yehova a vha tshidza ngayo, vho vha vha tshi fanela u ḽa zwenezwo zwiḽiwa zwo khetheaho ṅwaha muṅwe na muṅwe. Zwo vha zwi tshi vhidzwa Paseka.

“Ndo u litsha uri u tshile, uri ndi sumbedze maanḓa anga nga iwe, na uri dzina ḽanga ḽi ḓivhadzwe ḽifhasini ḽoṱhe.”​—Vharoma 9:17