Pfukelani kha mafhungo

Pfukelani kha zwi re ngomu

 NGUDO 96

Yesu U Khetha Saulo

Yesu U Khetha Saulo

Saulo o vha e mudzulapo wa Roma we a bebelwa Tariso. O vha e Mufarisei we a vha e na nḓivho ya Mulayo wa Tshiyuda nahone a tshi vhenga Vhakriste. O vha a tshi bvisa vhanna na vhafumakadzi vha Vhakriste miḓini yavho nahone a vha valela dzhele. O ita na u ima a ṱalela musi tshigwada tsha vhathu vho sinyuwaho tshi tshi kanḓa Stefano nga matombo u swika a tshi fa.

Fhedzi Saulo ho ngo fushea nga u fara Vhakriste vha Yerusalema fhedzi. O humbela tshifhe muhulu uri a mu rume muḓini wa Damaseko uri a kone u ṱoḓa Vhakriste vha henefho. Musi Saulo a tshi swika tsini ha muḓi, o penyelwa nga tshedza tshihulu nahone a wela fhasi. A pfa ipfi ḽi tshi ri: ‘Saulo, ndi ngani ni tshi khou ntovhola?’ Saulo a vhudzisa: ‘Ndi inwi nnyi?’ Ha pfi: ‘Ndi nṋe Yesu. Tshimbilani ni ye Damaseko nahone ni ḓo kona u ḓivha zwine na fanela u zwi ita.’ Nga u ṱavhanya, Saulo a si tsha vhona nahone a fanela u tou fhelekedzwa muḓini.

Ho vha hu na Mukriste a fulufhedzeaho ane a pfi Anania henefho Damaseko. Yesu o mu vhudza kha bono uri: ‘Iyani nḓuni ya Yudasi, nḓilani ine ya pfi Tswititi nahone ni ṱoḓe Saulo.’ Anania a ri: ‘Murena, ndi ḓivha zwinzhi nga ha hoyo munna! U khou valela vhafunziwa vhau dzhele!’ Fhedzi Yesu a ri: ‘Iyani khae. Ndo khetha Saulo uri a ye u huwelela mafhungo maḓifha kha dzitshaka.’

Nga zwenezwo Anania o wana Saulo nahone a mu vhudza uri: ‘Saulo wahashu, Yesu o nthuma uri ndi ni vule maṱo.’ Nga u ṱavhanya, Saulo o vha a tshi vho vhona. O guda nga ha Yesu nahone a mbo ḓi vha mutevheli wawe. Musi o no lovhedzwa sa Mukriste, Saulo o thoma u huwelela dzisinagogoni na Vhakriste ngae. Naa ni a vhona nga ḽiṱo ḽa muhumbulo nḓila ye Vhayuda vha vha vho tshuwa  ngayo musi vha tshi vhona Saulo a tshi khou funza vhathu nga ha Yesu? Vha ri: ‘Naa a si ene uḽa we a vha a tshi tambudza vhafunziwa vha Yesu?’

Saulo o huwelela kha vhathu vha Damaseko lwa miṅwaha miraru. Vhayuda vho vha vha tshi vhenga Saulo nahone vha ṱoḓa nḓila dza u mu vhulaya. Fhedzi vhahashu vho pfa nga ha zwenezwo nahone vha mu thusa u shavha. Vho mu dzhenisa kha manngi nahone vha mu tsitsela fhasi nga buli ḽa luvhondo.

Musi Paulo a tshi ya Yerusalema, o lingedza u ḓiṱanganya na vhafunziwa henefho. Fhedzi vho vha vha tshi khou mu ofha. Muṅwe mufunziwa a vhidzwaho Baranaba o isa Saulo kha vhaapostola nahone a vha ṱalutshedza uri Saulo o shanduka nga ngoho. Saulo o thoma u huwelela mafhungo maḓifha nga u fhisea na tshivhidzo tsha Yerusalema. Nga u ya ha tshifhinga a ḓivhiwa sa Paulo.

“Kristo Yesu o ḓa shangoni uri a tshidze vhaitazwivhi. Nṋe ndi muvhi u fhira vhoṱhe.”​—1 Timotheo 1:15