Pfukelani kha mafhungo

Pfukelani kha zwi re ngomu

 NGUDO 98

Vhukriste Vhu Phaḓalala Kha Tshaka Nnzhi

Vhukriste Vhu Phaḓalala Kha Tshaka Nnzhi

Vhaapostola vho thetshelesa mulayo wa Yesu wa uri vha huwelele mafhungo maḓifha shangoni ḽoṱhe. Nga 47 C.E., vhahashu vha Antiokia vho ruma Paulo na Baranaba uri vha ye u huwelela mashangoni o fhamba-fhambanaho. Vhenevha vhahuweleli vhavhili vha fhiseaho vho tshimbila kha ḽoṱhe ḽa Asia Minor u swika fhethu hu ngaho Derebe, Lisitara na Ikonio.

Paulo na Baranaba vho huwelela kha vhathu vhoṱhe, hu sa londwi uri vho pfuma kana ndi vhashai, ndi vhaswa kana vhalala. Vhunzhi ha vhathu vho ṱanganedza ngoho nga ha Kristo. Mudzia-manditi o lingedza u thivhela Paulo na Baranaba musi vha tshi huwelela kha Seregio Paulo, muvhusi wa Kipiro. Paulo o vhudza mudzia-manditi uri: ‘Yehova u lwa na inwi.’ Nga u ṱavhanya, onoyo mudzia-manditi a si tsha vhona. Muvhusi Paulo o mbo ḓi vha mutendi musi a tshi vhona zwenezwi.

Paulo na Baranaba vho vha vha tshi huwelela fhethu hoṱhe, nnḓu nga nnḓu, mimakete, dzibadani na zwikoloni. Musi vha tshi fhodza munna we a vha o holefhala ngei Lisitara, vhe vha vhona honoho vhuṱolo vho vha vha tshi vha dzhia vhe midzimu nahone vha lingedza u vha rabela. Fhedzi Paulo na Baranaba vho vha thivhela, vha ri: ‘Rabelani Mudzimu fhedzi! Ri vhathu vha fanaho na vhoiwe.’ Ha ḓa vhaṅwe Vhayuda nahone vha ita uri gogo ḽa vhathu ḽi shandukele Paulo. Ḽeneḽo gogo ḽo mu kanḓa nga matombo, ḽa mu kokodzela nnḓa ha muḓi nahone ḽa mu litsha henefho uri a fe. Naho zwo ralo, Paulo ho ngo fa! Nga u ṱavhanya, vhahashu vho ya vha mu tshidza nahone vha mu dzhenisa ngomu ha muḓi. Nga murahu, Paulo o vhuyelela Antiokia.

 Nga 49 C.E., Paulo o dovha a fara luṅwe lwendo. Musi o no vhona vhahashu vha Asia Minor, o huwelela mafhungo maḓifha na Yuropa hune ha vha kule vhukuma. O ya Athene, Efesa, Filipi, Thesalonika na huṅwe fhethu. Silasi, Luka na Timotheo we a vha a tshee muṱuku vho ṱuwa na Paulo. Vho shuma vhoṱhe kha u thoma na u khwaṱhisa zwivhidzo. Paulo o dzula Korinta lwa ṅwaha na hafu, a tshi khou khwaṱhisa vhahashu henengei. O huwelela, u funza na u ṅwalela marifhi zwivhidzo zwinzhi. Zwiṅwe hafhu, o vha a tshi shuma u ita madennde. Nga murahu ha tshifhinga, Paulo a vhuyelela Antiokia.

Nga murahu, nga 52 C.E., Paulo o fara lwendo lwa vhuraru, o thoma Asia Minor. O ya na devhula fhethu hu ngaho Filipi nahone nga murahu a tsela Korinta. Paulo o fhedza miṅwaha yo vhalaho e ngei Efesa a tshi khou funza, u fhodza na u thusa tshivhidzo. Zwiṅwe hafhu, o vha a tshi ṋekedza nyambo ḓuvha ḽiṅwe na ḽiṅwe holoni ya tshikolo. Vhunzhi ha vhathu vho thetshelesa nahone vha shandula matshilele avho. Mafheleloni, musi Paulo o no huwelela mafhungo maḓifha mashangoni manzhi, o ya Yerusalema.

“Nga zwenezwo, iyani ni ite vhathu vha tshaka dzoṱhe vhafunziwa.”​—Mateo 28:19