Pfukelani kha mafhungo

Pfukelani kha zwi re ngomu

 NGUDO 91

Yesu O Vuswa

Yesu O Vuswa

Musi Yesu o no fa, munna o pfumaho ane a pfi Yosefa o humbela Pilato uri a tsitse tshitumbu tsha Yesu kha danda. Yosefa o ḓodza tshitumbu mishonga a tshi pomba nga malabi nahone a tshi dzhenisa vhiḓani. A vala ḽeneḽo vhiḓa nga tombo ḽihulu. Vhotshifhe vhahulu vho vhudza Pilato uri: ‘Ri ofha uri vhaṅwe vha vhafunziwa vha Yesu vha ḓo dzhia tshitumbu tshawe nahone vha amba uri o vuswa.’ Nga zwenezwo, Pilato a ri: ‘Valani vhiḓa nahone ni ḽi linde.’

Nga murahu ha maḓuvha mararu, nga matsheloni-tsheloni, vhaṅwe vhafumakadzi vho ya vhiḓani nahone vha wana uri tombo ḽo phiguluswa. Nga ngomu vhiḓani, muruṅwa a vhudza vhafumakadzi a ri: ‘Ni songo ofha.’ Yesu o vuswa. Iyani ni vhudze vhafunziwa vhawe uri vha ye u ṱangana nae Galilea.’

Maria Magdalena a gidima a ya u vhudza Petro na Yohane. A vha vhudza uri: ‘Hu na muthu o dzhiaho tshitumbu tsha Yesu.’ Petro na Yohane vha gidimela henengei vhiḓani. Musi vha tshi vhona uri a hu na tshithu, vha humela mahayani avho.

Musi Maria a tshi vhuyelela vhiḓani, a vhona vharuṅwa vhavhili nahone a amba navho a ri: ‘A thi ḓivhi uri vho isa ngafhi Murena wanga.’ Nga murahu a vhona munna nahone ngauri o vha a tshi humbula uri ndi mulindi wa tsimu, a ri: ‘Muṋe wanga, mmbudzeni uri no mu isa ngafhi.’ Fhedzi musi onoyo munna a tshi ri, “Maria!” o mbo ḓi zwi ḓivha uri ndi Yesu. A mu lilela a ri: “Mufunzi!” nahone a mu kuvhatedza. Yesu a ri khae: ‘Tshimbilani ni ye ni vhudze vharathu vhanga uri no mmbona.’ Nga u ṱavhanya, Maria a gidimela kha vhafunziwa Yesu nahone a vha vhudza uri o vhona Yesu.

Musi ḓuvha ḽo no kovhela, vhafunziwa vhavhili vho vha vha tshi khou tshimbila vha tshi khou bva Yerusalema vha tshi khou ya Emausi. Ha ḓa muṅwe munna a tshimbila navho nahone a vha vhudzisa zwe vha vha vha tshi khou amba nga hazwo. Vha ri: ‘Naa a ni athu zwi pfa? Maḓuvha mararu o fhiraho, vhotshifhe vhahulu vho vhulaya Yesu. Zwino vhaṅwe vhafumakadzi vha khou amba uri u khou tshila!’ Munna a vhudzisa a ri: ‘Naa ni a fulufhela vhaporofita? Vho amba uri Kristo u  ḓo fa nahone a vuswa.’ A bvela phanḓa a tshi khou vha ṱalutshedza Maṅwalo. Musi vha tshi swika Emausi, vhafunziwa vho humbela onoyo munna uri a ṱuwe navho. Musi o no rabelela zwiḽiwa zwa nga madekwana, vho zwi ṱhogomela uri o vha e Yesu. Nga murahu, a si tsha vhonala.

Vhafunzwiwa vhavhili vha mbo ḓi gidimela nḓuni ya ngei Yerusalema he vhaapostola vha vha vho kuvhangana hone nahone vha vha vhudza zwe zwa itea. Musi vhe henefho, ngomu nḓuni, Yesu a mbo ḓi bvelela vha mu vhona vhoṱhe. Mathomoni, vhaapostola vho vha vha sa tendi uri ndi Yesu. A ri khavho: ‘Sedzani zwanḓa zwanga; mpfareni.Ho ṅwaliwa uri Kristo u ḓo vuwa vhafuni.’

“Ndi nṋe nḓila na ngoho na vhutshilo. A hu na ane a nga ḓa ha Khotsi a songo fhira kha nṋe.”​—Yohane 14:6