Pfukelani kha mafhungo

Pfukelani kha zwi re ngomu

 NGUDO 86

Yesu U Vusa Lazaro

Yesu U Vusa Lazaro

Yesu o vha e na khonani tharu dza tsini dze dza vha dzi tshi dzula Bethania. Dzo vha dzi Lazaro na khaladzi dzawe mbili, Maria na Marita. Ḽiṅwe ḓuvha, musi Yesu a seli ha Yorodane, Maria na Marita vha mu rumela mulaedza wo ṱavhanyiswaho vha ri: ‘Lazaro u khou lwala nga maanḓa. Ri humbela uri ni ḓe nga u ṱavhanya.’ Fhedzi Yesu ho ngo ya nga u ṱavhanya. Nga murahu ha maḓuvha mavhili, a vhudza vhafunziwa vhawe a ri: ‘Kha ri ye Bethania. Lazaro o eḓela, nahone ndi khou u ya u mu vusa.’ Vhaapostola vha ri: ‘Arali Lazaro o eḓela, zwi ḓo mu thusa u ri a fhole.’ Yesu a vha bvisela khagala a ri: ‘Lazaro o fa.’

Musi Yesu a tshi swika Bethania, Lazaro o vha o no fhedza maḓuvha maṋa o vhulungiwa. Vhathu vhanzhi vho ḓa u khuthadza Marita na Maria. Musi Marita a tshi pfa u ri Yesu o swika, a gidima a ya u mu ṱanganedza. A ri: ‘Murena, arali ni vhe ni hone, khaladzi anga ndi musi a songo fa.’ Yesu a mu vhudza a ri: ‘Khaladzi aṋu u ḓo dovha a tshila. Naa ni a zwi tenda zwenezwi, Marita?’ A ri khae: ‘Ndi a tenda uri u ḓo vuwa musi vhafu vha tshi vuswa.’ Yesu a ri: “Ndi nṋe mvuwo na vhutshilo.”

Nga murahu Marita a ya ha Maria nahone a mu vhudza uri: ‘Yesu o swika.’ Maria a gidima a ya ha Yesu, nahone vhathu vhanzhi vha mu tevhela. A gwadama milenzheni yawe, nahone a lila vhukuma. A ri: ‘Murena, arali ni vhe ni hone, khaladzi ashu o vha a tshi ḓo vha a kha ḓi tshila!’ Yesu a vhona vhuṱungu he a vha a tshi khou vhu pfa, na ene a thoma u lila. Musi vhathu vha tshi mu vhona a tshi khou lila, vha ri: ‘Vhonani nḓila ye a vha a tshi funa ngayo Lazaro.’ Fhedzi vhaṅwe vha ḓivhudzisa vha ri: ‘Ndi ngani a songo tshidza khonani yawe? U ḓo ita mini zwino?

Yesu a ya vhiḓani, ḽe muṋango waḽo wa vha wo valiwa nga tombo ḽihulu. A laedza a ri: ‘Phigulusani iḽo tombo.’ Marita a ri: ‘Fhedzi ho no fhela maḓuvha maṋa! Tshitumbu tshawe tshi ḓo nukha.’ Naho zwo ralo, vha phigulusa tombo, nahone Yesu a rabela a ri: ‘Khotsi, ndi a u livhuwa nga uri u a nthetshelesa. Ndi a zwi ḓivha uri u a nthetshelesa tshifhinga tshoṱhe, fhedzi ndi khou ambela nṱha u itela uri havha  vhathu vha zwi ḓivhe uri wo nthuma.’ Nga murahu a vhidzelela nga ipfi ḽihulu a ri: ‘Lazaro, bvelani nnḓa!’ Ha itea tshiṅwe tshithu tshi mangadzaho: Lazaro a bva vhiḓani, a tshee o pombiwa nga malabi. Yesu a ri: “Mu vhofhololeni ni mu litshe a ṱuwe.”

Vhathu vhanzhi vhe vha vhona zwenezwi vha vha na lutendo kha Yesu. Fhedzi vhaṅwe vha ya vha vhudza Vhafarisei. U bva nga tshenetsho tshifhinga, Vhafarisei vha ṱoḓa nḓila dza u vhulaha Lazaro na Yesu. Muṅwe wa vhaapostola vha 12, Yudasi Iskariote, a ya ha Vhafarisei tshiphirini nahone a vha vhudzisa a ri: ‘Ni ḓo mbadela vhugai arali nda ni thusa u wana Yesu?’ Vha tendelana u mu badela tshelede ya siliva, nahone Yudasi a thoma u ṱoḓa nḓila ya uri Vhafarisei vha wane Yesu.

“Mudzimu wa ngoho, ndi Mudzimu washu ane a tshidza; Yehova Murena Muvhusahoṱhe u a ponyokisa lufuni.”​—Psalme ya 68:20NW