Pfukelani kha mafhungo

Pfukelani kha zwi re ngomu

 NGUDO 79

Yesu O Ita Vhuṱolo Vhunzhi

Yesu O Ita Vhuṱolo Vhunzhi

Yesu o ḓa fhano kha ḽifhasi u huwelele mafhungo maḓifha a Muvhuso wa Mudzimu. U itela sumbedza uri Yesu u ḓo ita mini musi e Khosi, Yehova o mu ṋea muya mukhethwa uri a ite vhuṱolo. O vha a tshi kona u fhodza malwadze oṱhe. Hoṱhe he a vha a tshi ya, vhalwadze vho ḓa khae uri a vha thuse, nahone a vha fhodza vhoṱhe. Vho pofulaho vho vha vha tshi vho kona u vhona, vho dzingaho nḓevhe vha tshi vho pfa, vho holefhalaho vha tshi vho kona u tshimbila nahone vhe vha vha vhe na madimoni vha vhofholowa khao. Na nga u tou kwama tshiambaro tshawe fhedzi, vho vha vha tshi fhola. Vhathu vho tevhela Yesu huṅwe na huṅwe he a ya hone. Na musi a tshi ṱoḓa u vha e eṱhe, Yesu ho ngo vhuya a pandela muthu.

Ḽiṅwe ḓuvha, vhathu vho ḓisa munna o holefhalaho nḓuni ye Yesu a vha a tshi dzula khayo. Fhedzi nnḓu yo vha yo ḓala lwe vha sa kone u dzhena. Nga zwenezwo, vha phula buli kha ṱhanga nahone vha tsitsela onoyo munna ha Yesu. Yesu a ri khae: ‘Takuwa u tshimbile.’ Musi a tshi takuwa, vhathu vho vha vho mangala vhukuma.

Nga tshiṅwe tshifhinga, musi Yesu a tshi tou dzhena muḓini, vhanna vha fumi (10) vha re na mapele vho imela kule nahone vha vhidzelela vha ri: ‘Yesu, ri thuse!’ Nga tshenetsho tshifhinga, vhathu vha re na mapele vho vha vha songo tendelwa u vha tsini na vhaṅwe vhathu. Yesu o vhudza vhenevho vhanna uri vha ye thembeleni, ngauri mulayo wa Yehova wo vha u tshi ri vha ye henefho musi vho no fhodzwa. Musi vhe nḓilani ya u ya hone, vha mbo ḓi fhola. Musi muṅwe  wa vhanna vha re na mapele a tshi vhona uri o fhola, a humela murahu nahone a livhuwa Yesu a renda Mudzimu. Kha vhoṱhe vha fumi (10), ndi onoyo fhedzi we a livhuwa Yesu.

Mufumakadzi we a vha a tshi lwala lwa miṅwaha ya 12 o vha a tshi khou ṱoḓa nga maanḓa u fhodzwa. O ḓa nga murahu ha Yesu vhukati ha vhathu vhanzhi nahone a kwama tshiambaro tshawe tsha nga nnḓa. Nga u ṱavhanya, a mbo ḓi fhola. Musi zwenezwo zwi tshi itea, Yesu a vhudzisa a ri: “Ndi nnyi o nkwamaho?” Uḽa mufumakadzi o vha o tshuwa, fhedzi a ḓa phanḓa hawe nahone a mu vhudza ngoho. Yesu a mu khuthadza a ri: ‘Ṅwananga, ṱuwa nga mulalo.’

Muingameli ane a pfi Yairo o humbela Yesu a ri: ‘Dzhenani muḓini wanga! Musidzana wanga u khou lwala.’ Fhedzi Yesu a sa athu swika muḓini wa Yairo, musidzana a mbo ḓi fa. Musi Yesu a tshi swika, a wana vhathu vhanzhi vho ḓa u lila na vha muṱa. Yesu a vha vhudza a ri: ‘Ni songo lila; o tou eḓele.’ A mbo ḓi fara uḽa ṅwananyana a ri: ‘Musidzana, vuwani!’ Nga u ṱavhanya a vuwa, nahone Yesu a vhudza vhabebi vhawe uri vha mu fhe zwiḽiwa. Edzani u humbula uri vhabebi vhawe vha nga vha vho ḓipfa hani!

“Mudzimu o mu ḓodza nga muya mukhethwa nahone a mu ṋea maanda, a tshimbila a tshi ita zwivhuya shangoni ḽoṱhe na u fhodza vhoṱhe vho tsikeledzwaho nga Diabolo, ngauri Mudzimu o vha e nae.”​—Mishumo 10:38