Pfukelani kha mafhungo

Pfukelani kha zwi re ngomu

 NGUDO 81

Pfunzo Ya Thavhani

Pfunzo Ya Thavhani

Musi o no khetha vhaapostola vha 12, Yesu o tsa thavhani a ḓa hune ha vha na vhathu vhanzhi vho kuvhanganaho. Vho vha vha tshi bva Galilea, Yudea, Tiro, Sidoni, Siria na seli ha Yorodane. Vho ḓisa vhathu vhe vha vha vha tshi khou lwala na vhe vha vha vha tshi khou tambudzwa nga madimoni. Yesu o vha fhodza vhoṱhe. O mbo ḓi dzula henefho thavhani a thoma u amba navho. O ṱalutshedza zwine ra fanela u zwi ita arali ri tshi ṱoḓa u vha khonani dza Mudzimu. Ri fanela u ṱhogomela uri ri ṱoḓa Yehova nahone ri gude u mu funa. Fhedzi ri nga si fune Mudzimu arali ri sa funi vhaṅwe vhathu. Ri fanela u vha na vhulenda na u funa vhathu vhoṱhe, u katela na maswina ashu.

Yesu o ri: ‘A zwo ngo eḓana u sokou funa khonani dzaṋu. Ni fanela u dovha na funa na maswina aṋu na u hangwela vhathu zwi tshi bva mbiluni. Arali hu na muthu we na mu sinyusa, iyani khae ni humbele pfarelo. Farani vhathu nga nḓila ine na ṱoḓa vha tshi ni fara ngayo.’

 Yesu o dovha a ṋea vhathu nyeletshedzo nga ha zwithu zwi vhonalaho. O ri: ‘U vha khonani ya Yehova ndi zwa ndeme u fhira u vha na tshelede nnzhi. Mbava i nga tswa tshelede yaṋu, fhedzi a hu na ane a nga tswa vhukonani haṋu na Yehova. Ni songo vhilaela nga zwine na ḓo zwi ḽa, u nwa kana zwine na ḓo ambara. Sedzani zwiṋoni. Mudzimu u ita vhungoho ha uri zwi dzula zwi na zwiḽiwa zwo eḓanaho. U vhilaela zwi nga si engedze maḓuvha aṋu a vhutshilo. Humbulani uri Yehova u a ḓivha zwine na zwi shaya.’

Magogo o vha a sa athu u pfa muthu naho e ufhio a tshi amba u fana na Yesu. Vharangaphanḓa vhavho vha vhurereli vho vha vha sa athu vha funza zwenezwi zwithu. Ndi ngani Yesu o vha e mufunzi muhulwane nga u rali? Ngauri zwithu zwoṱhe zwe a zwi funza zwo vha zwi tshi bva ha Yehova.

“Hwalani dzhogo yanga, ni gude kha nṋe, ngauri ndo vuḓa nahone ndi a ḓiṱukufhadza mbiluni, mimuya yaṋu i ḓo homoloswa.”​—Mateo 11:29