Pfukelani kha mafhungo

Pfukelani kha zwi re ngomu

 NGUDO 77

Mufumakadzi Tshisimani

Mufumakadzi Tshisimani

Ho no fhira Paseka, Yesu na vhafunziwa vhawe vha fhira nga Samaria musi vha tshi vhuyelela Galilea. Tsini na muḓi wa Sikara, Yesu a awela fhethu hu no pfi tshisimani tsha Yakobo. O ḓiawetshela henefho, vhafunziwa vhawe vha ya ḓoroboni u yo renga zwiḽiwa.

Mufumakadzi o ḓa u ka maḓi tshisimani. Yesu a ri khae: “Nkeleni maḓi ndi nwe.” Ene a ri: ‘Ndi ngani ni tshi khou nkhumbela maḓi? Ndi mufumakadzi wa Musamaria. Vhayuda a vha ambi na Vhasamaria.’ Yesu a ri: ‘Arali no vha ni tshi ḓivha uri ndi nṋe nnyi, no vha ni tshi ḓo nkhumbela maḓi nahone nṋe ndo vha ndi tshi ḓo ni ṋea maḓi a vhutshilo.’ Mufumakadzi a vhudzisa a ri: ‘Ni khou tou zwi amba hani? Huufha ni si na bakete.’ Yesu a ri: ‘Muṅwe na muṅwe ane a nwa maḓi ane nda ḓo mu ṋea one ha tsha ḓo dovha a pfa ḓora.’ Onoyo mufumakadzi a ri: “Muṋe wanga, nṋee eneo maḓi.”

Yesu a ri khae: ‘Iḓani na munna waṋu fhano tshisimani.’ Mufumakadzi a ri: “A thi na munna.” Yesu a ri: ‘Ni khou amba ngoho. No no vhingiwa luṱanu, nahone zwino ni khou dzula na munna ni songo vhinganaho nae.’ Mufumakadzi a ri: ‘Ndi khou zwi vhona uri ni muporofita. Vhathu vhahashu vha tenda uri ri nga rabela Mudzimu kha heyi thavha, fhedzi Vhayuda vha ri ri nga rabela Mudzimu ngei Yerusalema fhedzi. Ndi tenda uri musi Messia a tshi ḓa, u ḓo ri funza nḓila ine ra fanela u rabela Mudzimu ngayo.’ Yesu a mbo ḓi amba zwe a vha a sa athu u vhuya a vhudza muṅwe muthu a ri: ‘Ndi nṋe Messia.’

Mufumakadzi a gidimela ḓoroboni nahone a vhudza  Vhasamaria a ri: ‘Ndi humbula uri ndo wana Messia. U ḓivha zwoṱhe nga ha nṋe. Iḓani ni mu vhone!’ Vha mu tevhela tshisimani nahone vha thetshelesa Yesu a tshi funza.

Vhasamaria vho ramba Yesu uri a ḓe a dzule ḓoroboni yavho. Ho fhela maḓuvha mavhili, a tshi khou funza henefho, nahone vhathu vhanzhi vha tenda khae. Vha vhudza uḽa mufumakadzi wa Musamaria vha ri: ‘Ri vho ḓivha zwa vhukuma uri ndi mutshidzi wa shango, ngauri ro pfa zwe hoyu munna a amba zwone.’

“‘Iḓa!’ na a re na ḓora nga a ḓe; ane a funa nga a dzhie maḓi a vhutshilo nga fhedzi.”​—Nzumbululo 22:17