Pfukelani kha mafhungo

Pfukelani kha zwi re ngomu

 NGUDO 82

Yesu U Funza Vhafunziwa Vhawe Nḓila Ya U Rabela

Yesu U Funza Vhafunziwa Vhawe Nḓila Ya U Rabela

Zwoṱhe zwe Vhafarisei vha zwi ita vho vha vha tshi zwi itela u vhoniwa nga vhathu. Arali vha ita tshithu tshivhuya, vho vha vha tshi zwi itela u takadza vhathu. Vho vha vha tshi rabela khagala u itela u vhoniwa nga vhoṱhe. Vho vha vha tshi khirema thabelo ndapfu nahone vha dzi dovholola zwikoloni na zwiṱaraṱani u itela u ri vhathu vha vha pfe. Nga zwenezwo, vhathu vho mangala musi Yesu a tshi vha vhudza uri: ‘Ni songo rabela u fana na Vhafarisei. Vha humbula uri Mudzimu u ḓo takadzwa nga u kona havho u amba zwithu zwinzhi, fhedzi a zwo ngo ralo. Thabelo i tea u vha vhukati haṋu na Yehova. Ni songo dovholola zwithu zwithihi lunzhi-lunzhi. Yehova u ṱoḓa ni tshi mu vhudza nḓila ine na ḓipfa ngayo nga ngomu.

‘Ni fanela u rabela nga heyi nḓila: “Khotsi ashu wa ṱaḓulu, dzina ḽau nga ḽi itwe ḽikhethwa. Muvhuso wau nga u ḓe. Zwine wa funa nga zwi itwe  fhano kha ḽifhasi vhunga zwi tshi itwa ngei ṱaḓulu.”’ Yesu o dovha a vha vhudza uri vha tea u rabelela zwiḽiwa zwavho zwa ḓuvha ḽiṅwe na ḽiṅwe, u hangwelwa zwivhi zwavho na zwiṅwe zwithu zwa muthu nga eṱhe.

Yesu o ri: ‘Ni songo litsha u rabela. Dzulani ni tshi humbela Khotsi aṋu, Yehova, zwithu zwavhuḓi. Mubebi muṅwe na muṅwe u takalela u fha ṅwana wawe zwithu zwavhuḓi. Arali ṅwana waṋu a ni humbela vhurotho, naa ni nga mu fha tombo? Arali a humbela khovhe, naa ni nga mu fha ṋowa?’

Nga murahu Yesu o ṱalutshedza zwine zwenezwo zwa amba zwone a ri: ‘Arali ni tshi kona u fha vhana vhaṋu zwifhiwa zwavhuḓi, naa Khotsi aṋu, Yehova, a nga si ite zwi fhiraho zwenezwo nga u ni fha muya mukhethwa? Fhedzi ni tea u mu humbela.’ Naa ni a tevhela zwe Yesu a zwi amba? Ni rabela nga ha mini?

“Dzulani ni tshi humbela, ni ḓo ṋewa; dzulani ni tshi ṱoḓa, ni ḓo wana; dzulani ni tshi khokhonya, ni ḓo vulelwa.”​—Mateo 7:7