Pfukelani kha mafhungo

Pfukelani kha zwi re ngomu

 NGUDO 70

Vharuṅwa Vha Ḓivhadza U Bebwa Ha Yesu

Vharuṅwa Vha Ḓivhadza U Bebwa Ha Yesu

Khosi ya Muvhuso wa Roma, Kesare Augusto, o laedza a ri Vhayuda vhoṱhe vha vhuyelele miḓini ya havho uri vha ṅwaliswe. Ndi hone Yosefa na Maria vha tshi fara lwendo lwa u ya Betlehema, he muṱa wa ha Yosefa wa vha u tshi bva hone. Tshifhinga tsha uri Maria a vhe na ṅwana tsho vha tshi tsini.

Musi vha tshi swika Betlehema, fhethu he vha vha vha tshi nga wana hone vhudzulo ho vha hu dangani. Henefho ndi he Maria a bebela hone ṅwana wawe wa mutukana Yesu. A mu putela nga malabi avhuḓi nahone a mu ladza zwavhuḓi mukungwani.

Tsini na Betlehema, vhaṅwe vhalisa vho vha vha vha tshi dzula nnḓa vhusiku vha tshi khou lisa zwifuwo zwavho. Nga u ṱavhanya, muruṅwa a ima phanḓa havho nahone vha tangiwa nga tshedza tsha vhugala ha Yehova. Vhalisa vho vha vho tshuwa, fhedzi muruṅwa a ri:  ‘Ni songo ofha. Ndi na mafhungo a takadzaho. Ṋamusi ho bebwa Messia ngei Betlehema.’ Nga tshenetsho tshifhinga, ha bvelela vharuṅwa vhanzhi lutomboni, vha tshi ri: ‘Mudzimu nga a rendwe ṱaḓulu, kha ḽifhasi hu vhe na mulalo.’ Vharuṅwa vha si tsha vhonala. Vhalisa vho ita mini?

Vhalisa vha amba nga tshavho vha ri: ‘Kha ri ye Betlehema zwino.’ Vha ṱavhanya vha ya vha wana Yosefa na Maria dangani vhe na ṅwana wavho wa lutshetshe.

Vhoṱhe vho vha vho mangala musi vha tshi pfa zwe muruṅwa a vhudza vhalisa. Maria a humbulesa nga ha maipfi a muruṅwa nahone a si vhuye a a hangwa. Vhalisa vha vhuyelela hu re na zwifuwo zwavho, vha tshi livhuha Yehova nga zwoṱhe zwe vha zwi vhona na zwe vha zwi pfa.

“Ndo ḓa fhano ndi tshi bva ha Mudzimu. A tho ngo ḓa nga ndoṱhe, fhedzi ndo rumiwa nga Mudzimu.”​—Yohane 8:42