Pfukelani kha mafhungo

Pfukelani kha zwi re ngomu

 NGUDO 58

Yerusalema U A Fheliswa

Yerusalema U A Fheliswa

Vhathu vha Yuda vho ṱutshela Yehova lunzhi-lunzhi nahone vha gwadamela midzimu ya mazwifhi. Yehova o bvela phanḓa a tshi lingedza u vha thusa lwa miṅwaha minzhi. O ruma vhaporofita vhanzhi uri vha ambe navho, fhedzi a vho ngo thetshelesa. Nṱhani hazwo, vho sea ngazwo. Yehova o fhelisa hani vhurabeli havho ha zwifanyiso?

Khosi ya Babele Nebukadanetsara, o vha a tshi khou kunda mashango manzhi. Musi a tshi kunda Yerusalema lwa u thoma, o fara Khosi Yoyakini, vhakololo, vhadziammbi, na vhavhaḓi, nahone a ṱuwa navho vhoṱhe Babele. O dovha a dzhia na lupfumo lwoṱhe lwe lwa vha lu thembeleni ya Yehova. Nga murahu a vhea Tsedekia uri a vhe khosi ya Yuda.

Mathomoni, Tsedekia o thetshelesa Nebukadanetsara. Fhedzi tshaka dza nga tsini na vhaporofita vha mazwifhi vha eletshedza Tsedekia uri a vutshele Babele. Yeremia a mu vhudza a ri: ‘Arali na vha vutshela, vhathu vha ḓo vhulahwa, ha vha na nḓala, na malwadze kha ḽa Yuda.’

Nga murahu ha u vhusa miṅwaha ya malo, Tsedekia a dzhia phetho ya u vutshela Babele. A humbela mmbi ya Vhaegipita uri i mu thuse. Nga zwenezwo Nebukadanetsara a rumela mmbi yawe u yo vutshela Yerusalema, nahone vha tinga muḓi. Yeremia a vhudza Tsedekia a ri: ‘Yehova uri arali na sa lwa na Vhababele, ni ḓo ḓitshidza khathihi na uno muḓi. Fhedzi arali na lwa navho, Vhababele vha ḓo fhisa muḓi wa Yerusalema nahone vha ḓo ni fara.’ Tsedekia a ri: ‘Ndi ḓo lwa navho!’

 Nga murahu ha ṅwaha na hafu, mmbi ya Vhababele ya pwasha luvhondo lwa Yerusalema ya dzhena nga ngomu nahone ya fhisa wonoyo muḓi. Ya fhisa thembele, ya vhulaha vhathu vhanzhi, nahone ya fara vha zwigidi ya ṱuwa navho.

Tsedekia a shavha Yerusalema, fhedzi Vhababele vha mu pandamedza. Vha mu fara tsini na Yeriko nahone vha mu isa ha Nebukadanetsara. Khosi ya Babele ya ita uri Tsedekia a vhone vhana vhawe vha vhatukana vha tshi khou vhulahwa. Nga murahu Nebukadanetsara a phula maṱo a Tsedekia nahone a mu valela dzhele, he a fhedzisela o fela hone. Fhedzi Yehova o fulufhedzisa vhathu vha Yuda a ri: ‘Nga murahu ha miṅwaha ya 70, ndi ḓo ni vhuisa hayani Yerusalema.’

Hu ḓo itea mini kha vhaswa vhe vha fariwa vha iswa Babele? Naa vha ḓo dzula vha tshi fulufhedzea kha Yehova?

“Yehova Mudzimu, Ramaanḓaoṱhe, khaṱulo dzau ndi dza ngoho nahone dzo luga.”​—Nzumbululo 16:7