Pfukelani kha mafhungo

Pfukelani kha zwi re ngomu

 NGUDO 1

Mudzimu O Sika Ḽiṱaḓulu Na Ḽifhasi

Mudzimu O Sika Ḽiṱaḓulu Na Ḽifhasi

Yehova Mudzimu ndi Musiki washu. O sika zwithu zwoṱhe , zwine ra kona u zwi vhona na zwine ra si zwi vhone. Musi a sa athu u sika zwithu zwine ra kona u zwi vhona, o sika vharuṅwa vhanzhi-vhanzhi. Naa ni a ḓivha uri vharuṅwa ndi mini? Vharuṅwa ndi vhathu vhe Yehova a vha sika vhane vha fana nae. A ri koni u vha vhona, samusi ri sa koni u vhona Mudzimu. Muruṅwa we Yehova a mu sika u thoma o mbo ḓi vha muthusi wawe. Onoyo muruṅwa o thusa musi Yehova a tshi sika dziṋaledzi, dzipulanete na zwiṅwe zwithu zwoṱhe. Iṅwe ya dzenedzo pulanete ndi ḽifhasi, hune ha vha haya hashu havhuḓi.

Nga murahu ha zwenezwo a ita uri zwipuka na vhathu zwi kone u dzula kha ḽifhasi. O ita uri tshedza tsha ḓuvha tshi vhonetshele kha ḽifhasi. A sika dzithavha, maḓanzhe na milambo.

Ho itea mini nga murahu ha zwenezwo? Yehova o ri: ‘Ndi ḓo ita mahatsi, zwi melaho na miri.’ Ho mbo ḓi thoma u mela miri ya mitshelo, miroho na maluvha zwo fhamba-fhambanaho. Nga murahu Yehova a sika zwipuka zwoṱhe—zwipuka zwi fhufhaho, zwa maḓini na zwi kokovhaho. O sika zwiṱuku, zwi ngaho mivhuḓa na zwihulwane, zwi ngaho dzinḓou. Ndi tshifhio tshipuka tshine na tshi funesa?

Nga murahu Yehova a ri kha muruṅwa wa u thoma: “Kha ri ite vhathu.” Vhathu vho vha vha tshi ḓo fhambana na zwipuka. Vho vha vha tshi ḓo vha na vhukoni ha u ita zwithu. Vho vha vha tshi ḓo kona u amba, u sea na u rabela. Vho vha vha tshi ḓo ṱhogomela ḽifhasi na  zwipuka. Naa ni a ḓivha uri ndi nnyi muthu wa u thoma? Kha ri vhone.

U rangani Mudzimu o sika ḽiṱaḓulu na ḽifhasi.”​—Genesi 1:1