Pfukelani kha mafhungo

Pfukelani kha zwi re ngomu

 NGUDO 2

Mudzimu O Sika Munna Na Mufumakadzi Vha U Thoma

Mudzimu O Sika Munna Na Mufumakadzi Vha U Thoma

Yehova o ita tsimu fhethu hune ha vhidzwa Edeni. Yeneyo tsimu yo vha yo ḓala maluvha, miri na zwipuka. Nga murahu, Mudzimu a sika muthu wa u thoma, Adamu, a tshi shumisa buse nahone a vhudzulela mufemo ningoni dzawe. Ni a ḓivha uri ho itea mini nga murahu? Muthu o mbo ḓi thoma u tshila! Yehova o ṋea Adamu mushumo wa u ṱhogomela tsimu nahone Mudzimu a mu vhudza uri a ṋee zwipuka madzina.

Yehova o ṋea Adamu mulayo wa ndeme. O ri kha Adamu: ‘Ni nga ḽa miri yoṱhe i re tsimuni nga nnḓa ha muthihi wo khetheaho. Arali na ḽa wonoyo muri, ni ḓo fa.’

Nga murahu Yehova a ri: ‘Ndi ḓo ni itela mufarisi.’ A ita uri Adamu a eḓele khofhe khulu, nahone nga murahu Mudzimu a shumisa luvhabvu lwa Adamu a mu itela mufumakadzi ngalwo. O vha a tshi pfi Eva. Adamu na Eva vha mbo vha muṱa wa u thoma. Adamu o ḓipfa  hani nga mufumakadzi wawe muswa? Adamu o vha o takala vhukuma lwe a ri: ‘Vhonani zwe Yehova a ita a tshi shumisa luvhabvu lwanga! Zwino ndi na muthu a fanaho na nṋe.’

Yehova o vhudza Adamu na Eva uri vha bebe vhana nahone vha ḓadze ḽifhasi. O vha a tshi ṱoḓa uri vha shume vhoṱhe nga dakalo u ita uri ḽifhasi ḽoṱhe ḽi vhe paradiso, kana phakha yo nakaho, u fana na tsimu ya Edeni. Fhedzi zwithu a zwo ngo itea nga yeneyo nḓila. Ndi ngani? Ri ḓo guda zwo engedzeaho kha ngudo i tevhelaho.

‘We a vha sika u bva mathomoni o sika munna na mufumakadzi.’​—Mateo 19:4