Pfukelani kha mafhungo

Pfukelani kha zwi re ngomu

 Tshipiḓa 7

Ndi Vhafhio Vhane Vha Vha Kha Vhurereli Ha Ngoho?

Ndi Vhafhio Vhane Vha Vha Kha Vhurereli Ha Ngoho?

1. Ri fanela u ita mini uri ri takadze Mudzimu?

U ITELA uri ri ḓiphine nga vhushaka havhuḓi na Mudzimu, a ro ngo fanela u ṱanganela kha vhurereli ha mazwifhi. Ri fanela u ṱanganela kha vhurereli ha ngoho. Ṋamusi vhathu vhanzhi ḽifhasini vha khou ita zwenezwo.

2. Ṱhanzi dza Yehova vha wanala ngafhi nahone vha ita mushumo ufhio?

2 Samusi Bivhili yo dzula yo amba, vhagwadameli vha ngoho vha vhumba “gogo ḽihulu” ḽe ḽa bva kha “tshakha na khoro, na mbeu na ndimi dzoṱhe.” (Ndzumbululo 7:9) Mashangoni a 235, Ṱhanzi dza Yehova vha dzimilioni vha khou thusa vhaṅwe u guda nga ha nḓila dza Yehova dza lufuno na ṱhoḓea dzawe.

U Ṱalula Vhagwadameli Vha Ngoho

3. Ṱhanzi dzi gwadamela nnyi, nahone ndi vhurabeli ha mifuda-ḓe vhune dza vhu iledza?

3 Ṱhanzi dzi ṱhogomela uri ndi Yehova fhedzi ane a fanela u gwadamelwa. Vha hana u gwadamela midzimu ya zwifanyiso kana zwifanyiso zwa vhurereli. (1 Yohane 5:21) A vha gwadameli vhafu nga u ita milindelo kana vhuṅwe vhuṱambo vhune ha tikedza thendo dza vhurereli ha mazwifhi na “dzipfunzo dza mimuya mivhi.” (1 Timotheo 4:1) Naho zwo ralo, vha a khuthadza vho felwaho nga u vha ṱalutshedza fulufhedziso ḽa Mudzimu ḽa uri hu ḓo vha na mvuwo ya vhafu paradisoni kha ḽifhasi.—Yohane 5:28, 29; Mishumo 24:15.

4. Vhathu vha Mudzimu vha dzhia hani manditi?

4 Ṱhanzi a dzi shumisani na manditi, kana vhuloi ngauri vha a zwi ḓivha uri hezwi zwithu zwi bva ha Diabolo. A vha fulufheli manditi uri a vha tsireledze—vha fulufhela Yehova.—Mirero 18:10.

5. Ṱhanzi dza Yehova “a si vha shango ḽino” nga nḓila-ḓe?

5 Yesu o amba uri vhafunziwa vhawe “a si vha shango ḽino.” (Yohane 17:16) Yesu nga dzawe o hana u ḓidzhenisa kha zwa politiki misini yawe. (Yohane 6:15) Nga hu fanaho, Ṱhanzi a dzi dzhii sia kha zwa politiki, vhutshavha, na u lwela vhuimo ha ḽino shango. Naho zwo ralo, vha badela mithelo nahone vha tevhedza milayo ya shango ḽine vha dzula khaḽo.—Yohane 15:19; Vha-Roma 13:1, 7.

6. Ndi vhulivhisi vhufhio vhune vhashumeli vha Mudzimu vha vhu tevhela malugana na mbingano na u ṱala?

6 Ngauri Ṱhanzi dzi tevhela mulayo wa muvhuso, dzi ṅwalisa mbingano dzadzo nga lwa mulayo. (Tito 3:1) Vha a thetshelesa vhulivhisi ha Mudzimu, nahone ngauralo a vha vhingi vhasadzi vhanzhi. (1 Timotheo 3:2) Zwiṅwe hafhu, samusi vha tshi shumisa maitele a Bivhili vhutshiloni havho, vhashumeli vha Mudzimu a vha anzeli u ṱalana.

7. Ṱhanzi dzi sumbedzana hani uri dzi a funana?

7 Ṱhanzi dzi a funana. Lwonolwu lufuno, u katela na u funa havho Mudzimu, lu vha ṱanganya kha vhurathu na vhukomana ha ngoho, naho vha tshi bva kha tshaka dzo fhamba-fhambanaho. Musi hu tshi vha na zwiwo kana zwifhinga zwi konḓaho, Ṱhanzi dzi thusana nga u ṱavhanya. Ṱhanzi dzi sumbedza lufuno nga nḓila ine dza tshila ngayo.—Yohane 13:35.

Ṱhanzi dza Yehova ndi vhathihi kha vhurathu na vhukomana ha shango ḽoṱhe

8. Ndi maitele afhio mavhi ane vhathu vha Mudzimu vha a iledza?

8 Vhathu vha Yehova vha a ḓidina vhukuma uri vha tshile nga u fulufhedzea na nga u luga. A vha tswi, u zwifha, u ḓifara luvhi, u kambiwa, nahone vha a fulufhedzea kha zwa mabindu. Vhanna a vha rwi vhasadzi vhavho. Musi vha sa athu vha Ṱhanzi, vhaṅwe vho vha vha tshi zwi ita, fhedzi nga thuso ya Yehova vha zwi litsha. Vho “ṱanzwiwa” siani ḽa Mudzimu.—1 Vha-Korinta 6:9-11.

Vhaiti Vha Zwine Mudzimu A Funa

9. Ndi mini zwe iṅwe bugu ya zwi amba nga ha kereke dza muya dza Afurika?

9 Vhukuma, vhurereli vhunzhi vhu amba  uri ndi ha ngoho. Vhu nga kha ḓi sumba kha mishumo yaho yavhuḓi u itela u tikedza zwine ha zwi amba. Sa tsumbo, malugana na zwine zwa vhidzwa kereke dza muya fhano Afurika, iṅwe bugu yo ri: “Mishumo ya manditi na ya ṅanga zwino i vho itwa nga [zwigwada zwiswa zwa Vhukriste]. . . . Vha ḓiita vhaporofita na vhadzia vhuṱolo. Vhaporofita vha re vhukati havho vha sumbedza vhathu mabono na u ṱalutshedza miloro. Vha shumisa maḓi makhethwa, mapfura makhethwa, miora, makhanḓela na zwioro u fhodza na u thivhela malwadze.”

10, 11. Ndi ngani vhuṱolo vhune ha itwa ṋamusi vhu sa sumbedzi uri vhurereli vhu bva ha Mudzimu?

10 Miraḓo ya dzenedzi kereke i amba uri vhuṱolo hayo vhu sumbedza uri vhurereli hayo ho fhaṱutshedzwa nga Mudzimu. Fhedzi vhuṱolo a vhu sumbedzi uri vhurereli vhu a ṱanganedzwa nga Yehova. Sathane u ṋea vhagwadameli vha mazwifhi maanḓa uri vha ite yeneyo ‘mishumo ya maanḓa.’ (2 Vha-Thesalonika 2:9) Zwiṅwe hafhu, Bivhili yo dzula yo amba uri zwifhiwa zwa vhuṱolo zwi bvaho ha Mudzimu, zwi ngaho u porofita, u amba nga dzindimi, na nḓivho yo khetheaho, “zwi ḓo fheliswa.”—1 Vha-Korinta 13:8.

11 Yesu o sevha a ri: “A si uri muvhusoni wa ṱaḓulu hu ḓo dzhena vhoṱhe vhané vha tshi amba nṋe vha ri: Murena, Murena! Hu ḓo dzhena vhané vha ita zwiné khotsi-anga wa ṱaḓulu a funa zwi tshi itwa. Ndi vhanzhi vhané vha ḓo amba na nṋe nga heḽo ḓuvha vha ri: Murena, Murena! A ro ngo porofita dzinani ḽau naa? A ro ngo pandela mimuya mivhi dzinani ḽau kani? Dzinani ḽau ri si ite mishumo ya maanḓa manzhi naa? Ndi hone ndi tshi ḓo vha vhudza nda vha fhedzela nda ri: Na ka-thihi a thi ni ḓivhi, nṱutsheleni inwi vhadzia-vhutshinyi.”—Mateo 7:21-23.

12. Ndi vhafhio vhane vha ḓo dzhena Muvhusoni wa ṱaḓulu?

12 Nga zwenezwo-ha, ndi vhafhio vhane vha ḓo dzhena Muvhusoni wa ṱaḓulu? Ndi vhane vha ita zwi funwaho nga Yehova.

Vhahuweleli Vha Muvhuso Wa Mudzimu

13. Ndi ufhio mushumo une Mudzimu a ṱoḓa vhathu vhawe vha tshi u ita ṋamusi, nahone ndi vhafhio vhane vha khou ita?

13 Mudzimu u ṱoḓa vhathu vhawe vha tshi ita mini ṋamusi? Yesu o ri: “Huno mafhungo-maḓifha aya a muvhuso wa ṱaḓulu a ḓo ḓivhadzwa mashangoni oṱhe, uri a vhe thovhedzo kha dzitshakha dzoṱhe.” (Mateo 24:14) Hoyu ndi wone mushumo une Ṱhanzi dza Yehova vha khou ita wone ṋamusi nga u fhisea.

14. Muvhuso wa Mudzimu ndi mini, nahone ndi vhafhio vhane vha ḓo vhusa kha wonoyo Muvhuso?

14 ‘Shangoni ḽoṱhe,’ Ṱhanzi dza Yehova vha huwelela uri Muvhuso wa Mudzimu ndi hulumeni wa ṱaḓulu une wa ḓo vhusa ḽifhasi ḽoṱhe nga u luga. Vha funza uri Yehova o vhea Kristo Yesu uri a vhe Khosi ya wonoyo Muvhuso, u katela na vha 144 000 vho khethwaho vhukati ha vhathu.—Daniele 7:14, 18; Ndzumbululo 14:1, 4.

15. Ndi mini zwine Muvhuso wa ḓo zwi fhelisa?

15 Dzi tshi shumisa Bivhili, Ṱhanzi dzi sumbedza vhathu uri Muvhuso wa Mudzimu u ḓo fhelisa maitele oṱhe a Sathane. Hu ḓo fheliswa vhurereli ha mazwifhi na pfunzo dzaho dzine dza nyadzisa Mudzimu na u ṋea Diabolo vhugala! (Ndzumbululo 18:8) Hu ḓo dovha ha fheliswa na mivhuso ya vhathu ine ya lwisana na Mudzimu!—Daniele 2:44.

16. Ndi vhafhio vhane vha ḓo vhuswa nga Kristo Yesu, nahone vha ḓo dzula ngafhi?

16 Zwiṅwe hafhu, Ṱhanzi dza Yehova vha ḓivhadza uri Kristo Yesu u ḓo ḓisa mbuyelo dzi mangadzaho kha vhoṱhe vhane vha ita zwine Mudzimu a zwi ṱoḓa. Vha ḓo vhuswa ngae vhe kha ḽifhasi. Bivhili i a fulufhedzisa: “Ngauri u lamulela mutshinyali a tshi vhidzelela, na muheḓana a si na mutshidzi. U khathutshela vhaṱoma na vhatshinyali, u khudisa mimuya ya vhatshinyali.”—Psalme ya 72:12, 13.

17. Ndi vhafhio fhedzi vhane vha huwelela nga ha Muvhuso wa Mudzimu?

17 A hu na tshiṅwe tshigwada tsha vhathu tshine tsha ita zwine Mudzimu a funa nga u huwelela mafhungo maḓifha a Muvhuso. Ndi Ṱhanzi dza Yehova fhedzi vhane vha ḓivhadza Muvhuso wa Mudzimu ḽifhasini ḽoṱhe.