Pfukelani kha mafhungo

Pfukelani kha zwi re ngomu

 NDIMA YA 1

“Muvhuso Wau Nga U Ḓe”

“Muvhuso Wau Nga U Ḓe”

ZWINE ZWA ḒO HASELEDZWA KHA YENEYI NDIMA

Ṱolisisani zwe Yesu a zwi funza nga ha Muvhuso wa Mudzimu

1, 2. Ndi mini zwe Yehova a zwi amba a tshi khou pfiwa nga vhaapostola vhararu vha Yesu, nahone vho aravha hani?

ARALI Yehova Mudzimu a ni laedza nga tshavhukoma uri ni ite tshiṅwe tshithu, ni nga aravha hani? Hu sa londwi zwine a nga ni humbela zwone, naa ni nga si ite zwine a ni laedza zwone nga u fhisea? Vhukuma ni ḓo zwi ita!

2 Nga tshiṅwe tshifhinga nga murahu ha Paseka ya 32 C.E., vhaapostola vhararu vha Yesu—Petro, Yakobo na Yohane—vho sedzana na vhuimo ho raloho. (Vhalani Mateo 17:1-5.) Musi vho kuvhangana na Muṋe wavho kha “thavha ndapfu,” vho vhona bono ḽa nḓila ine Yesu a ḓo vha e ngayo musi e Khosi i re na vhugala ṱaḓulu. Ḽeneḽo bono ḽo vhonala ḽi ḽa vhukuma lwe Petro a lingedza u shela mulenzhe khaḽo. Vho mbo ḓi tibedzwa nga gole musi Petro a tshi kha ḓi amba. Zwenezwo, Petro na vhe a vha e navho vha mbo ḓi pfa ipfi ḽa Yehova nga dzawe—ipfi ḽe ḽa pfiwa nga vhathu vha si gathi tshi tsheetsho. Musi Yehova o no khwaṱhisedza uri Yesu ndi Murwa wawe, a amba nga ho livhaho a ri: “Ni mu thetshelese.” Vhaapostola vho tevhela honoho vhulivhisi ha Mudzimu. Vho thetshelesa zwe Yesu a funza nahone vha ṱuṱuwedza vhaṅwe uri vha ite zwenezwo.—Mish. 3:19-23; 4:18-20.

Yesu o amba zwinzhi nga ha Muvhuso wa Mudzimu u fhira thero dzoṱhe

3. Ndi ngani Yehova a tshi ṱoḓa uri ri thetshelese Murwa wawe nahone ndi thero ifhio ine ra tea u i ṱolisisa?

3 Eneo maipfi—“ni mu thetshelese”—o ṅwalwa Bivhilini uri na riṋe ri vhuyelwe. (Vharoma 15:4) Ndi ngani? Nga ṅwambo wa uri Yesu ndi muambeli wa Yehova nahone tshifhinga tshoṱhe musi Yesu a tshi funza, o vha a tshi amba zwine Khotsi awe vha ṱoḓa ri tshi zwi ḓivha. (Yoh. 1:1, 14) Samusi Yesu o amba nga maanḓa nga ha Muvhuso wa Mudzimu, muvhuso wa ṱaḓulu wa Vhumessia wo vhumbwaho nga Kristo Yesu na vhavhusi ngae vha 144 000, u fhira dziṅwe thero, ndi zwavhuḓi uri ri ṱolisise yeneyi thero ya ndeme nga vhuronwane. (Nzumb. 5:9, 10; 14:1-3; 20:6) Naho zwo ralo, kha ri thome ri ṱolisise uri ndi ngani Yesu o amba nga maanḓa nga ha Muvhuso wa Mudzimu.

“Zwo Ḓalaho Mbiluni . . . ”

4. Yesu o zwi sumbedza hani uri u funa nga maanḓa Muvhuso?

4 Yesu u funa nga maanḓa Muvhuso. Ndi ngani ri tshi ralo? Ngauri zwine ra zwi amba zwi dzumbulula zwi re mbiluni dzashu—ndi uri zwine ra zwi amba zwi dzumbulula zwine zwa vha zwa  ndeme vhukuma kha riṋe. Yesu nga dzawe o ri: “Zwo ḓalaho mbiluni ndi zwine mulomo wa amba zwone.” (Mat. 12:34) Yesu o shumisa tshibuli tshiṅwe na tshiṅwe u itela u amba nga ha Muvhuso. Evangeli nṋa dzi amba nga ha ipfi Muvhuso lu fhiraho 100, ḽi bvelela nga maanḓa kha maambiwa a Yesu. O ita uri Muvhuso u vhe ṱhoho ya mafhungo ya u huwelela hawe, o ri: “Ndi fanela uri ndi ye na kha miṅwe miḓi u itela uri ndi ḓivhadze mafhungo maḓifha a Muvhuso wa Mudzimu, ngauri ndo rumiwa u ita zwenezwo.” (Luka 4:43) Na nga murahu ha mvuwo yawe, Yesu o bvela phanḓa a tshi amba nga ha Muvhuso kha vhafunziwa vhawe. (Mish. 1:3) Yesu o vha a tshi funa Muvhuso nga mbilu yawe yoṱhe, zwa mu ṱuṱuwedza uri a ambe nga hawo.

5-7. (a) Ri zwi ḓivha hani uri Yehova u funa nga maanḓa Muvhuso? Fanyisani. (b) Ri nga sumbedza hani uri ri funa nga maanḓa Muvhuso?

5 Na Yehova u funa nga maanḓa Muvhuso. Ri zwi ḓivha hani zwenezwo? Ni songo hangwa uri Yehova o rumela Murwa wawe mubebwa eṱhe shangoni; zwithu zwoṱhe zwe Murwa wawe a zwi amba na u zwi ita zwi bva ha Yehova. (Yoh. 7:16; 12:49, 50) Zwiṅwe hafhu, mafhungo oṱhe o ṅwalwaho kha Dzievangeli nṋa, ane a amba nga ha vhutshilo na vhuḓinḓa ha Yesu a bva ha Yehova. Humbulani nga ha zwine zwenezwo zwa amba zwone.

Ndi zwavhuḓi uri muṅwe na muṅwe washu a ḓivhudzise uri, ‘Naa ndi a funa nga maanḓa Muvhuso wa Mudzimu?’

6 Kha ri ri ni khou dzhenisa zwinepe zwa muṱa kha alibamu, fhedzi na vhona uri zwi nga si fhelele ngauri ndi zwinzhi. Ni ita mini? Ni dzhenisa zwine na zwi funesa. Ri nga amba uri Evangeli dzi fana na alibamu ya zwinepe ine ya ri sumbedza nḓila ine Yesu a vha ngayo. Yehova ho ngo hevhedza vhaṅwali vha Evangeli uri vha ṅwale tshiṅwe na tshiṅwe tshe Yesu a tshi amba na u tshi ita musi a tshee kha ḽifhasi. (Yoh. 20:30; 21:25) Nṱhani hazwo, muya wa Yehova wo vha livhisa uri vha ṅwale zwe Yesu a zwi amba na u zwi ita zwine zwa ri thusa uri ri pfesese ndivho ya vhuḓinḓa hawe na zwine zwa vha zwa ndeme vhukuma kha Yehova. (2 Tim. 3:16, 17; 2 Pet. 1:21) Samusi Evangeli dzo ḓala pfunzo dza Yesu dzine dza amba nga ha Muvhuso wa Mudzimu, ri nga phetha ri sa timatimi uri Yehova u funa nga maanḓa Muvhuso. Edzani u humbula—Yehova u ṱoḓa uri ri ḓivhe nga ha Muvhuso wawe!

7 Ndi zwavhuḓi uri muṅwe na muṅwe washu a ḓivhudzise uri, ‘Naa ndi funa nga maanḓa Muvhuso wa Mudzimu?’ Arali ri tshi u funa, ri ḓo fhisetshela u thetshelesa zwe Yesu a zwi amba na u zwi funza nga ha wonoyo Muvhuso—nḓila ine wa vha wa ndeme ngayo na uri u ḓo ḓa hani nahone lini.

“Muvhuso Wau Nga U Ḓe”—Hani?

8. Yesu o nweledza hani ndeme ya Muvhuso?

8 Ṱhogomelani thabelo ya tsumbo. Yesu o sumbedza zwine Muvhuso wa ḓo zwi khunyeledza nga u shumisa maipfi a re na maanḓa na a leluwaho musi a tshi amba nga ha ndeme yawo. Yeneyo thabelo i na khumbelo dza sumbe. Tharu dza u thoma dzi kwama ndivho dza Yehova—u khethwa ha dzina ḽawe, u ḓa ha Muvhuso wawe na u itwa ha zwine a zwi funa vhunga zwi tshi itwa ngei ṱaḓulu. (Vhalani Mateo 6:9, 10.) Dzenedzo khumbelo tharu  dzi a tshimbidzana vhukuma. Muvhuso wa Vhumessia ndi tshishumiswa tshine Yehova a ḓo tshi shumisa u itela u khetha dzina ḽawe na u ita zwine a zwi funa.

9, 10. (a) Muvhuso wa Mudzimu u ḓo ita mini musi u tshi ḓa? (b) Ndi fulufhedziso ḽifhio ḽa Bivhili ḽine na ṱulutshelwa u ḽi vhona ḽi tshi ḓadzea?

9 Muvhuso wa Mudzimu u ḓo ḓa hani? Musi ri tshi rabela ri tshi ri “Muvhuso wau nga u ḓe,” ri vha ri tshi khou humbela uri Muvhuso u dzhie vhukando ho khwaṱhaho. Musi Muvhuso u tshi ḓa, u ḓo langa tshoṱhe zwithu zwi re kha ḽifhasi. U ḓo fhelisa ano maitele mavhi a zwithu, u katela na mivhuso yoṱhe ya vhathu nahone wa ḓisa shango ḽiswa ḽo lugaho. (Dan. 2:44; 2 Pet. 3:13) Zwenezwo, musi Muvhuso u tshi vhusa, ḽifhasi ḽoṱhe ḽi ḓo vha paradiso. (Luka 23:43) Vhoṱhe vha re muhumbuloni wa Mudzimu vha ḓo vuswa nahone vha ṱangana na vhafunwa vhavho. (Yoh. 5:28, 29) Vhathu vha thetshelesaho vha ḓo itwa uri vha fhelele nahone vha ḓiphine nga vhutshilo vhu sa fheli. (Nzumb. 21:3-5) Zwine Yehova Mudzimu a zwi funa zwi ḓo fheleledza zwo itwa kha ḽifhasi, u fana na musi zwi tshi itwa ngei ṱaḓulu! Naa a ni ṱulutshelwi u vhona eneo mafulufhedziso a Bivhili a tshi ḓadzea? Ni songo hangwa uri tshifhinga tshoṱhe musi ni tshi rabela uri Muvhuso wa Mudzimu u ḓe, ni vha ni tshi khou rabelela uri eneo mafulufhedziso avhuḓi-vhuḓi ḓadzee.

10 Zwi khagala uri Muvhuso wa Mudzimu a u athu u ‘ḓa’ u itela u ḓadzisa maipfi a thabelo ya tsumbo. Ri songo hangwa uri hu kha ḓi vhusa mivhuso ya vhathu nahone shango ḽiswa ḽa u luga a ḽi athu u swika. Fhedzi hu na mafhungo a takadzaho. Muvhuso wa Mudzimu wo no tikwa, samusi ri tshi ḓo zwi haseledza kha ndima i tevhelaho. Zwino kha ri ṱolisise zwe Yesu a zwi amba nga ha uri Muvhuso wo vha u tshi ḓo tikwa lini nahone wa ḓa lini.

Muvhuso Wa Mudzimu Wo Vha u Tshi Ḓo Tikwa Lini?

11. Yesu o amba mini nga ha u tikwa ha Muvhuso wa Mudzimu?

11 Yesu o zwi sumbedza uri Muvhuso wo vha u sa ḓo tikwa ḓanani ḽa u thoma ḽa miṅwaha C.E., naho zwo vha zwo lavhelelwa nga vhaṅwe vha vhafunziwa vhawe. (Mish. 1:6) Ṱhogomelani zwe a zwi amba kha zwifanyiso zwivhili zwi sa fani zwine zwa siana nga miṅwaha i re fhasi ha mivhili.

12. Tshifanyiso tsha goroi na tsheṋe tshi sumbedza hani uri Muvhuso a wo ngo tikwa ḓanani ḽa u thoma ḽa miṅwaha C.E.?

12 Tshifanyiso tsha goroi na tsheṋe. (Vhalani Mateo 13:24-30.) Nga murahu ha u anetshela tshenetshi tshifanyiso, khamusi nga tshimedzi tsha 31 C.E., Yesu o tshi ṱalutshedza vhafunziwa vhawe. (Mat. 13:36-43) Tshidziki tsha tshenetsho tshifanyiso na ṱhaluso yatsho ndi zwi tevhelaho: Musi vhaapostola vho no fa, Diabolo o vha a tshi ḓo zwala tsheṋe (Vhakriste vha mafanedza) vhukati ha goroi (“vhana vha Muvhuso,” kana Vhakriste vho ḓodzwaho). Goroi na tsheṋe zwo vha zwi tshi ḓo litshwa zwa hula zwoṱhe tshifhingani tsha nyaluwo tshe tsha vha tshi tshi ḓo bvela phanḓa u swika nga khaṋo, ine ya vha “vhufhelo ha maitele a zwithu.” Musi khaṋo yo no thoma, tsheṋe yo vha i tshi ḓo kuvhanganywa. Nga murahu ha zwenezwo ho vha hu tshi ḓo kuvhanganywa goroi. Tshenetsho tshifanyiso tshi sumbedza uri Muvhuso wo vha u sa ḓo  tikwa ḓanani ḽa u thoma ḽa miṅwaha C.E., fhedzi wo vha u tshi ḓo tikwa musi tshifhinga tsha nyaluwo tsho no fhela. Tshifhinga tsha nyaluwo tsho mbo ḓi fhela nahone khaṋo ya thoma nga 1914.

13. Yesu o shumisa tshifanyiso tshifhio u itela u sumbedza uri o vha a sa ḓo vhewa uri a vhe Khosi ya Vhumessia musi a tshi tou vhuyelela ṱaḓulu?

13 Tshifanyiso tsha dzibonndo. (Vhalani Luka 19:11-13.) Yesu o anetshela tshenetshi tshifanyiso nga 33 C.E. musi a tshi khou ya Yerusalema lwa u fhedza. Vhaṅwe vhathu vhe vha vha vho mu thetshelesa vho humbula uri u ḓo tika Muvhuso wawe musi a tshi tou swika Yerusalema. U itela u khakhulula eneo mavhonele na u sumbedza uri Muvhuso wo vha u tshee kule u na u tikwa, Yesu o ḓivhambedza na “munna wa mukololo” we a fara lwendo a ya “shangoni ḽa kule uri a vhewe vhuhosi a kone u vhuya.” * Kha vhuimo ha Yesu, “shangoni ḽa kule” ho vha hu ṱaḓulu, he Khotsi awe a vha a tshi ḓo mu ṋea maanḓa a uri a vhe Khosi. Fhedzi Yesu o vha a tshi zwi ḓivha uri o vha a sa ḓo rwelwa ṱari uri vha vhe Khosi ya Vhumessia musi a tshi tou vhuyelela ṱaḓulu. Nṱhani hazwo, o vha a tshi ḓo dzula kha tshanḓa tsha u ḽa tsha Mudzimu nahone a lindela tshifhinga tsho vhewaho. O lindela maḓana manzhi a miṅwaha.—Ps. 110:1, 2; Mat. 22:43, 44; Vhaheb. 10:12, 13.

Muvhuso Wa Mudzimu U Ḓo Ḓa Lini?

14. (a) Yesu o fhindula hani mbudziso ye a vhudziswa nga vhaapostola vhawe vhaṋa? (b) U ḓadzea ha vhuporofita ha Yesu zwi ri vhudza mini nga ha u vha hone hawe na Muvhuso?

14 Musi hu tshee ho sala maḓuvha a si gathi uri Yesu a fe, vhafunziwa vhawe vhaṋa vho mu vhudzisa vha ri: “Tshiga tsha u vha hone hau na tsha vhufhelo ha ano maitele a zwithu tshi ḓo vha tshifhio?” (Mat. 24:3; Marko 13:4) Musi Yesu a tshi fhindula, o anetshela vhuporofita vhulapfu ho ṅwalwaho kha Mateo ndima ya 24 na 25. Yesu o dodombedza zwiitea zwa shango ḽoṱhe zwe zwa  vha zwi tshi ḓo vha tshiga tshine tsha ṱalula tshifhinga tshine tsha vhidzwa “u vha hone” hawe. Mathomo a u vha hone hawe o vha a tshi ḓo tshimbidzana na u tikwa ha Muvhuso; nahone magumo a u vha hone hawe o vha a tshi ḓo tshimbidzana na u ḓa ha Muvhuso. Ri na vhuṱanzi ho eḓanaho ha uri vhuporofita ha Yesu ho vha vhu tshi khou ḓi ḓadzea u thoma nga 1914. * Nga zwenezwo, wonoyo ṅwaha wo swaya u thoma ha u vha hone hawe na u tikwa ha Muvhuso.

15, 16. Maipfi ane a ri “murafho uyu” a ambela kha vhafhio?

15 Muvhuso wa Mudzimu u ḓo fheleledza wo ḓa lini? Yesu ho ngo dzumbulula nga ho livhaho uri zwi ḓo itea lini. (Mat. 24:36) Fhedzi o amba tshiṅwe tshithu tshine tsha tea u ri khwaṱhisedza uri u tsini vhukuma. Yesu o amba uri Muvhuso u ḓo ḓa musi “murafho uyu” wo no vhona u ḓadzea ha tshiga tsha vhuporofita. (Vhalani Mateo 24:32-34.) Maipfi ane a ri “uyu murafho” a ambela kha vhafhio? Kha ri ṱolisise nga vhuronwane maipfi a Yesu.

16 “Murafho uyu.” Naa Yesu o vha a tshi khou amba nga vhathu vha si vhatendi? Hai. Humbulani nga vhathu vhe vha vha vho mu thetshelesa. Yesu o vha a tshi khou ṱalutshedza honovhu vhuporofita vhaapostola vhawe vha si gathi vhe “vha ḓa khae vhe vhoṱhe.” (Mat. 24:3) Vhenevho vhaapostola vho vha vha tshi ḓo ḓodzwa nga muya mukhethwa hu si kale. Dovhani ni sedze na vhubvo ha eneo mafhungo. Musi Yesu a sa athu u amba nga ha “murafho uyu,” o ri: “Zwino gudani kha tshifanyiso tsha muhuyu: Nga u ṱavhanya musi matavhi awo a tshi ṱuma lurere, ni mbo ḓi ḓivha uri tshilimo tshi tsini. Nga hu fanaho, musi ni tshi vhona zwenezwi zwithu zwoṱhe, ni ḓivhe uri Murwa-muthu u tsini u muṋangoni.” Vhatevheli vha Yesu vho ḓodzwaho—hu si vhathu vha si vhatendi—vho vha vha tshi ḓo vhona zwithu zwe a zwi amba hu tshee nga phanḓa nahone vha pfesesa zwine zwa amba zwone, zwine zwa vha uri Yesu “u tsini u muṋangoni.” Nga zwenezwo, musi Yesu a tshi amba nga ha “murafho uyu,” o vha a tshi khou amba vhatevheli vhawe vho ḓodzwaho.

17. Ipfi “murafho” na maipfi “zwenezwi zwithu zwoṱhe” a amba mini?

17 “U nga si lovhe hezwi zwithu zwoṱhe zwi sa athu itea.” Eneo maipfi o vha a tshi ḓo ḓadzea hani? Ri tea u ḓivha zwithu zwivhili uri ri kone u fhindula yeneyo mbudziso: uri ipfi “murafho” na maipfi ane a ri “hezwi zwithu zwoṱhe,” a amba mini. Ipfi “murafho” kanzhi ḽi ambela kha vhathu vha mirole yo fhamba-fhambanaho vhane vha tshilanyana vhoṱhe nga tshifhinga tshithihi. Tshifhinga tsha murafho a tsho ngo lapfa nga ho kalulaho, nahone tshi na magumo. (Ek. 1:6) Maipfi ane a ri “hezwi zwithu zwoṱhe” a katela zwiitea zwoṱhe zwe zwa dzula zwo ambiwa nga ha u vha hone ha Yesu, u bva mathomoni azwo nga 1914 u swika magumoni azwo nga “maṱungu mahulu.”—Mat. 24:21.

18, 19. Ri nga pfesesa hani maipfi a Yesu ane a ri “murafho uyu” nahone ri nga phetha nga ḽifhio?

18 Nga zwenezwo-ha, ri tea u pfesesa hani maipfi a Yesu ane a amba nga ha “murafho uyu”? Murafho u vhumbwa nga zwigwada zwivhili zwa vhaḓodzwa vhe vha tshilanyana vhoṱhe nga tshifhinga tshithihi—tshigwada tsha u thoma ndi tsha vhaḓodzwa vhe  vha vhona mathomo a u ḓadzea ha tshiga nga 1914 nahone tshigwada tsha vhuvhili, ndi tsha vhaḓodzwa vhe vha tshila lwa tshifhinganyana na vha tshigwada tsha u thoma. Vhaṅwe vha kha tshigwada tsha vhuvhili vha ḓo vhona mathomo a maṱungu a ḓaho. Zwenezwo zwigwada zwivhili zwi vhumba murafho muthihi nga ṅwambo wa uri hu na tshifhinga tshe vha tshila nga tshifhinga tshithihi sa Vhakriste vho ḓodzwaho. *

19 Ri nga phetha nga ḽifhio? Ri a zwi vhona uri tshiga tsha u vha hone ha Yesu maanḓani a Muvhuso tshi khou vhonala zwavhuḓi kha khungulu yoṱhe. Ri dovha ra zwi vhona uri vhaḓodzwa vhane vha kha ḓi tshila, vhane vha vha vha tshipiḓa tsha “murafho uyu” vha khou vha vhalala; fhedzi vha nga si fe vhoṱhe maṱungu mahulu a sa athu thoma. Nga zwenezwo, ri nga phetha nga ḽa uri zwenezwino Muvhuso wa Mudzimu u ḓo ḓa zwa vhukuma nahone wa vhusa ḽifhasi! Zwi ḓo takadza lungafhani u vhona u ḓadzea ha thabelo ye Yesu a ri funza yone: “Muvhuso wau nga u ḓe”!

20. Ndi zwithu zwifhio zwa ndeme zwine zwa ḓo haseledzwa kha ino bugu nahone hu ḓo ṱolisiswa mini kha ndima i tevhelaho?

20 Ri songo vhuya ra hangwa maipfi e Yehova nga dzawe a a amba e ṱaḓulu malugana na Murwa wawe: “Ni mu thetshelese.” Samusi ri Vhakriste vha ngoho, ri swela u tevhela honoho vhulivhisi ha Mudzimu. Ri na dzangalelo ḽihulwane kha zwoṱhe zwe Yesu a zwi amba na u zwi funza nga ha Muvhuso wa Mudzimu. Zwe wonoyo Muvhuso wa zwi khunyeledza na zwine wa ḓo zwi ita tshifhingani tshi ḓaho ndi thero ya ndeme ine ya ḓo haseledzwa kha ino bugu. Ndima i tevhelaho i ḓo ṱolisisa zwiitea zwi takadzaho zwine zwa tshimbidzana na u bebwa ha Muvhuso wa Mudzimu ṱaḓulu.

^ phar. 13 Tshifanyiso tsha Yesu tshi nga vha tsho humbudza vhathetshelesi vhawe Arikelao, murwa wa Herode Muhulwane. Musi Herode a sa athu u fa, o vhea Arikelao uri a vhe ane a ḓo mu tevhela kha u vhusa ḽa Yudea na huṅwe fhethu. Naho zwo ralo, Arikelao a sa athu u vhusa, o vha o tea u fara lwendo lulapfu lwa u ya Roma uri a wane thendelo ya Kesare Augusto.

^ phar. 18 Naho e ufhio o ḓodzwaho nga murahu ha lufu lwa muraḓo wa u fhedza wa vhaḓodzwa vha tshigwada tsha u thoma—ndi uri vhe vha vhona “u ranga ha maṱungu a ḓaho” nga 1914—u ḓo vha e si tshipiḓa tsha “murafho uyu.”—Mat. 24:8.