Pfukelani kha mafhungo

Pfukelani kha zwi re ngomu

 TSHIPIḒA 10

Solomo U Vhusa Nga Vhuṱali

Solomo U Vhusa Nga Vhuṱali

Yehova o ṋea Khosi Salomo vhuṱali; tshifhingani tsha vhuvhusi ha Salomo, Vhaisiraele vho takalela mulalo munzhi na u bvelela

VHUTSHILO ho vha vhu tshi ḓo vha hani arali lushaka lwoṱhe na muvhusi walwo vha tshi tevhela Yehova sa Muvhusi wavho na u thetshelesa Milayo yawe? Phindulo yo vhonala tshifhingani tsha vhuvhusi ha Khosi Salomo ha miṅwaha ya 40.

Nga phanḓa ha uri Davida a fe, o khetha murwa wawe Salomo uri a vhe mutevheli wawe. Mudzimu o vhudzisa Salomo a tshi shumisa muloro uri a mu vhudze tshine a tshi ṱoḓa. Salomo o humbela vhuṱali na nḓivho u itela u vhusa vhathu nga nḓila yavhuḓi na ya vhuṱali. Yehova o vha o takala nahone a ṋea Salomo vhuṱali na pfeseso. Yehova o dovha a mu fulufhedzisa lupfumo, vhugala, na u lalama arali a dzula a tshi thetshelesa.

Salomo o vha na bvumo musi zwi tshi ḓa kha mahaṱulele awe a vhuṱali. Kha tshiṅwe tshiitea, vhasadzi vhavhili vho vha vha tshi khou lwela ṅwana wa mutukana, vha tshi amba uri vha mme a onoyo ṅwana. Salomo o mbo ḓi amba uri ṅwana a pharulwe nga vhukati nahone musadzi muṅwe na muṅwe a dzhie tshipiḓa tshithihi. Musadzi wa u thoma o tenda, fhedzi mme wa vhukuma o humbela uri ṅwana a ṋewe musadzi wa u thoma. Salomo o ṱhogomela zwavhuḓi uri musadzi a re na tshilidzi ndi ene mme a ṅwana nahone a mu ṋea ṅwana wawe. Nga u ṱavhanya Vhaisiraele vha pfa nga ha phetho yawe ya u haṱula, nahone vhathu vha zwi ṱhogomela uri Salomo o vha e na vhuṱali vhu bvaho ha Mudzimu.

Tshiṅwe tshithu tshihulwanesa tshe Salomo a tshi khunyeledza ho vha hu u fhaṱwa ha thembele ya Yehova—tshifhaṱo tsho khetheaho ngei Yerusalema tshe tsha vha tshi tshi ḓo vha fhethu ha vhurabeli ngei Isiraele. Musi hu tshi hangulwa thembele, Salomo o rabela uri: “Huufha Ḽiṱaḓulu na Ḽiṱaḓulu ḽa ngei ṱaḓulu-ṱaḓulu ḽi sa koni u mu eḓana! Naa U nga eḓanwa nga ino nnḓu ye nda i fhaṱa?”—1 Dzikhosi 8:27.

Vhathu vha kha maṅwe mashango vho pfa nga ha bvumo ḽa Salomo, u fana na ngei Saba, kha ḽa Arabia. Mufumakadzi wa Saba o fara lwendo lwa u ḓo vhona vhugala ha Salomo na lupfumo na u linga vhuṱali hawe. Onoyo mufumakadzi o vha o takadzwa vhukuma nga vhuṱali ha Salomo na u bvelela ha Vhaisiraele lwe a renda Yehova nge a vhea khosi ya vhuṱali vhuhosini. Vhukuma, nga phaṱhutshedzo dza Yehova, vhuvhusi ha Solomo ho vha vhu bvelelaho na ha mulalo kha ḓivhazwakale ya Isiraele ḽa kale.

Zwi pfisaho vhuṱungu ndi uri Salomo o kundelwa u ita zwithu zwine zwa tendelana na vhuṱali ha Yehova. A tshi nyadza mulayo wa Mudzimu, o vhinga vhasadzi vha maḓana, u katela na vhanzhi vhe vha vha vha tshi rabela midzimu i sili. Nga zwiṱuku nga zwiṱuku vhasadzi vhawe vho mu ita uri a sendele kule na Yehova, nahone a thoma u rabela zwifanyiso. Yehova o vhudza Salomo uri u ḓo dzhielwa tshiṅwe tshipiḓa tsha muvhuso. Mudzimu o vhudza Salomo uri tshiṅwe tshipiḓa tshi ḓo sala na muṱa wawe a tshi itela Davida khotsi awe. Naho Salomo o litsha u shumela Yehova, Yehova o dzula a tshi fulufhedzea kha mulanga wa Muvhuso we a u vhofha na Davida.

Enea mafhungo a wanala kha 1 Dzikhosi, dzindima 1 u swika kha 11; 2 Koronika, dzindima 1 u swika kha 9; Doiteronomio 17:17.