Pfukelani kha mafhungo

Pfukelani kha zwi re ngomu

Vhumatshelo Vhu Takadzaho

Vhumatshelo Vhu Takadzaho

Zwenezwino Sathane na madimoni vha ḓo valelwa

Sathane na madimoni awe a vha nga xedzi vhathu tshifhinga tshilapfu. Yehova o no ḓi vha pandela ṱaḓulu. (Ndzumbululo 12:9) Hu si kale, Mudzimu u ḓo dzhia vhukando a tshi lwisa Sathane na madimoni awe. Musi e bononi ḽi bvaho ha Mudzimu, muapostola Yohane o ri: “Nda vhona muruṅwa a tshi tsa a tshi bva ṱaḓulu e na khoṋo ya mugodi na ngeḓane khulu tshanḓani tshawe. A fara ḽiḽa ḽigwena, ḽiṋowa ḽa kale na kale, ene Diabolo ene Sathane a mu hunga uri a fhedze miṅwaha ya ḽikhulu ó pfalwo. Á mu posa mugodini, a hoṋa, a shatela a vhea lufayo kha tshivalo; hu uri a si tsha ḓo khakhisa dzitshakha, hu vhuye hu vulee miṅwaha ya ḽikhulu.” (Ndzumbululo 20:1-3) Nga murahu, Diabolo na madimoni awe vha ḓo fheliswa tshoṱhe.​—Ndzumbululo 20:10.

Vhathu vhavhi kha ḽifhasi vha ḓo fheliswa-vho.—Psalme ya 37:9, 10; Luka 13:5.

 Vhafu Vha Ḓo Tshila Hafhu!

Vhafu vha ḓo vuselwa vhutshiloni kha ḽifhasi

Musi Sathane na madimoni vho no bviswa nḓilani, Yehova u ḓo ṋea vhathu phaṱutshedzo nnzhi. Ni ḓo humbula uri vhafu a vha tshili, a vha tsheeho. Yesu o vhambedza lufu na khofhe—khofhe khulu dzi si na miloro. (Yohane 11:11-14) O ita zwenezwo ngauri o vha a tshi zwi ḓivha uri ho vha hu tshi ḓo ḓa tshifhinga tsha uri vho eḓelaho lufuni vha vuswe vha tshile. O ri: “Hu ḓa tshikhathi, tshiné vhoṱhe vha re zwaloni vha . . . vutshela u tshila.”​—Yohane 5:28, 29; vhambedzani Mishumo 24:15.

Vha ḓo vutshela fhano kha ḽifhasi. Nṱhani ha nḓivhadzo dza uri vhathu vho fa, mivhigo i takadzaho i ḓo vha i ya vhe vha vuselwa vhutshiloni! Ḽi ḓo vha dakalo vhukuma u ṱanganedza vhafunwa vha bvaho mavhiḓani!