Pfukelani kha mafhungo

Pfukelani kha zwi re ngomu

Mimuya A I Athu U Tshila Na U Fa Kha Ḽifhasi

Mimuya A I Athu U Tshila Na U Fa Kha Ḽifhasi

Mimuya i a tshila! Fhethu ha muya hu sa vhonali, hu na mimuya mivhuya khathihi na mivhi. Naa ndi vhathu vhe vha vhuya vha tshila nahone vha fa kha ḽifhasi?

Hai, a yo ngo ralo. Musi muthu a tshi fa, ha yi shangoni ḽa muya, samusi vhathu vhanzhi vha tshi humbula nga u ralo. Izwi ri zwi ḓivha hani? Ngauri Bivhili i amba nga u ralo. Bivhili ndi bugu ya mafhungo-ngoho ine ya bva ha Mudzimu wa ngoho e eṱhe, ane dzina ḽawe ḽa vha Yehova. Yehova o sika vhathu; u ḓivha zwavhuḓi zwine zwa itea musi vha tshi fa.—Psalme ya 83:18; 2 Timotheo 3:16.

Adamu o bva buseni, a vhuyelela buseni

Bivhili i amba uri Mudzimu o vhumba Adamu, muthu wa u thoma, “buse ḽa mavuni.” (Genesi 2:7) Mudzimu a mu vhea Paradisoni, tsimu ya Edeni. Arali Adamu o vha o thetshelesa mulayo wa Yehova, o vha a sa ḓo fa; o vha a tshi ḓo vha a tshi kha ḓi tshila kha ḽifhasi ṋamusi. Fhedzi musi Adamu a tshi pfuka mulayo wa Mudzimu nga khole, Mudzimu o ri khae: “U . . . ḓo vhuyelela mavuni; ngauri wo bviswa mavuni; U buse; tshau ndi u vhuyelela buseni.”—Genesi 3:19.

Izwi zwi amba mini? Ee, Adamu o vha e ngafhi musi Yehova a sa athu u mu vhumba nga buse? O vha e siho. O vha e si muya u sa athu u bebwa we wa vha u ṱaḓulu. O vha a sa tshili. Ngauralo musi Yehova a tshi amba uri Adamu “u ḓo vhuyelela mavuni,” o vha a tshi khou amba uri Adamu o vha a tshi ḓo fa. Ho ngo fhirela fhethu ha muya. A tshi fa, Adamu o  dovha a si tsha tshila, a si tsha vha hone. Lufu ndi u sa vha hone ha vhutshilo.

Fhedzi hu pfi mini nga ha vhaṅwe vhe vha fa? Naa na vhone a vha tshili? Bivhili i a fhindula:

  • “Zwoṱhe [vhathu khathihi na zwipuka] zwi ya fhethu huthihi; tsiko yazwo zwoṱhe i mavuni; zwoṱhe zwi vhuyelela mavuni.”—Muhuweleli 3:20.

  • “Vho faho a vha na tshine vha tshi ḓivha.”—Muhuweleli 9:5.

  • “Lufuno lwavho, na vengo ḽavho, na vivho ḽavho, zwo fhela kale.”—Muhuweleli 9:6.

  • “Ngei vhudzula-vhafu hune wa ya hone, a hu na mushumo, a hu na ngelekanyo, a hu na nḓivho, a hu na vhuṱali.”—Muhuweleli 9:10.

  • “Vha vhuyelela mavuni avho; ḓuvha ḽeneḽo na maano avho o lovha.”—Psalme ya 146:4.

Ndi vha tshilaho fhedzi vhane vha nga ita hezwi zwithu

Naa ni wana uri aya maṅwalo zwi a konḓa u a tenda? Arali zwo ralo, humbulani nga ha hezwi:  Miṱani minzhi, munna u hola tshelede u itela u tikedza muṱa wawe. Musi onoyo munna a tshi fa, kanzhi muṱa wawe u ṱangana na vhuleme. Nga zwiṅwe zwifhinga musadzi wawe na vhana a vha na tshelede yo eḓanaho ya u renga zwiḽiwa. Khamusi na maswina a onoyo munna a ḓo vha tambudza. Zwino ḓivhudziseni: ‘Arali onoyo munna a tshi khou tshila shangoni ḽa muya, ndi ngani a sa bveli phanḓa u tikedza muṱa wawe? Ndi ngani a sa tsireledzi muṱa wawe kha vhathu vhavhi?’ Ndi ngauri maṅwalo a amba ngoho. Onoyo munna ha na vhutshilo, ha koni u ita tshithu.—Psalme ya 115:17.

Vho faho a vha koni u thusa vha re na nḓala kana u tsireledza vhane vha farwa luvhi

Naa izwi zwi amba uri vhafu a vha tsha ḓo dovha vha tshila? Hai, a zwi ambi zwone. Ri ḓo amba nga ha mvuwo ya vhafu nga murahu. Fhedzi zwi amba uri vho faho a vha ḓivhi zwine na khou ita. A vha koni u ni vhona, u ni pfa, kana u amba na inwi. A no ngo fanela u vha ofha. A vha koni u ni thusa, nahone a vha koni u ni huvhadza.—Muhuweleli 9:4; Yesaya 26:14.