Pfukelani kha mafhungo

Pfukelani kha zwi re ngomu

Madimoni A Ṱuṱuwedza U Vutshela Mudzimu

Madimoni A Ṱuṱuwedza U Vutshela Mudzimu

Miṅwe mikhuvha yo thewa kha mazwifhi a uri vhafu vha a kona u ri vhona

Fhedzi ndi ngani Sathane na madimoni awe vha tshi shuma vhukuma nga u rali u itela u fhura vhathu? Ngauri vha ṱoḓa ri tshi ṱanganela navho kha mvutshelo. Vha ṱoḓa ri tshi vha gwadamela. Vha ṱoḓa ri tshi tenda mazwifhi avho nahone ri ite zwithu zwine Yehova a si zwi ṱoḓe. Vhunzhi ha heyi mishumo i katela na mikhuvha i tshimbidzanaho na vhafu.

Lufu lwa mufunwa ndi tshenzhelo i vhaisaho maḓipfele, nahone ndi zwa nzulele na zwo fanelaho u lila. Musi khonani yawe Lazaro o no fa, Yesu o “lila maṱodzi.”​—Yohane 11:35.

Hu na mikhuvha minzhi ine ya tshimbidzana na lufu, nahone i a fhamba-fhambana shango ḽoṱhe. Minzhi a i lwisani na maitele a Bivhili. Naho zwo ralo, miṅwe mishumo i thewa kha muhumbulo wa uri vhafu vha khou tshila nahone vha nga kona u vhona vhane vha khou tshila. U tshenuwa, u lila hu sa langei, na dzimbulungo khulwane zwoṱhe zwo thewa kha u ofha u sinyusa mimuya ya vhafu. Fhedzi samusi vhafu ‘hu si na tshine vha tshi ḓivha,’ vhane vha ita zwenezwo zwithu vha khou tikedza mazwifhi a Sathane.​—Muhuweleli 9:5.

Miṅwe mikhuvha i thewa kha mazwifhi a uri vhafu vha ṱoḓa thuso yashu

Miṅwe mikhuvha kana vhuṱambo  i itwa nga ṅwambo wa u tenda uri vhafu vha ṱoḓa thuso kha vha tshilaho nahone vha ḓo huvhadza vha tshilaho arali vha sa ladzwa. Kha maṅwe mashango hu itwa zwimima na zwiṱhavhelo nga murahu ha maḓuvha a 40 kana ṅwaha musi muthu o no fa. Hezwi zwi itelwa u thusa o faho uri ‘a fhirele’ shangoni ḽa muya. Maṅwe maitele o ḓoweleaho ndi u ṋekedza zwiḽiwa na u itela vho faho thevhula.

Hezwi zwithu zwo khakhea ngauri zwi tikedza mazwifhi a Sathane nga ha vhafu. Naa Yehova o vha a tshi ḓo ṱanganedza naho tshi tshini tshi tshimbidzanaho na mikhuvha yo thewaho kha pfunzo dza madimoni? Na kathihi!​—2 Vha-Korinta 6:14-18.

Vhashumeli vha Mudzimu wa ngoho a vha ṱanganeli na luthihi kha mishumo ine ya tikedza mazwifhi a Sathane. Nṱhani hazwo, nga lufuno vha futelela kha u thusa vha tshilaho na u vha kwengweledza. Vha a zwi ḓivha uri musi muthu o no fa, ndi Yehova fhedzi ane a nga mu thusa.​—Yobo 14:14, 15.

 Vhungome vhu Sandiwa nga Mudzimu

Vhaṅwe vhathu vha amba na madimoni nga u tou livha kana vha tshi shumisa muambeli wa muthu. Hezwi zwi vhidzwa vhungome. Voodoo, vhuloi, manditi, u bvumba, na u vhudzisa vho faho zwoṱhe ndi zwivhumbeo zwa vhungome.

Mudzimu ha funi hezwi zwithu zwivhi. U ṱoḓa ri tshi ḓikumedza tshoṱhe khae.​—Ekisodo 20:5

Bivhili i sanda hezwi zwithu, i tshi ri: “Kha inwi hu songo vhonala ane a . . . tungula, na ane a bvumba, na mungome, na muloi a songo vhonala. Na mudzia-malombo, na ane a vhidza midzimu ya vhafu, kana a vhudzisa mudzia-u-bvumba, na ane a ya zwifhoni, a songo vhonala. Ngauri ane a ita zwenezwo u ita zwine Yehova a nengiswa ngazwo’.”​—Doiteronomio 18:10-12.

Ndi ngani Yehova a tshi ri sevha nga maanḓa nga u rali nga ha iyi mishumo?

U itela mutakalo washu, Yehova u ri sevha uri ri laṱe zwivhumbeo  zwoṱhe zwa vhungome. U funa vhathu na u vha ṱhogomela, nahone u a zwi ḓivha uri vhane vha ḓiṱanganya na madimoni vha ḓo shengela.

Muṅwe muthu o raloho o vha e Nilda, we a vha e mungome ngei Brazil. Madimoni o mu konḓisela vhutshilo. U a anetshela: “Ndo vha ndi na mimuya, i tshi ndaedza uri ndi ite mini. Nga zwiṅwe zwifhinga ndo vha ndi tshi dzidzivhala nda dovha nda dzivhuluwa, nahone nda alafhiwa vhuleme vhu tshimbidzanaho na ngelelo. Madimoni o ntshengedza lwe vhuṱaledzi hanga ha vhaisala. Ndo nwa zwidzidzivhadzi nahone nda thoma u nwa na u daha zwifhinga zwoṱhe. Hezwi zwo bvela phanḓa miṅwaha minzhi.”

Vhane vha ita zwa vhungome kanzhi vha a shengela. Vha nga xelelwa nga haya havho, nga mbofholowo yavho, na nga vhutshilo havho

INga u ya ha tshifhinga, a tshi thuswa nga Yehova na Ṱhanzi dzawe dza kha ḽifhasi, Nilda a vhofholowa kha ṱhuṱhuwedzo ya dimoni nahone zwino u tshila vhutshilo ho pfumaho, na havhuḓi. U ri: “Ndi ṱuṱuwedza vhoṱhe uri vha si vhuye vha ḓiṱanganya na mimuya [mivhi] na kathihi.”