Pfukelani kha mafhungo

Pfukelani kha zwi re ngomu

 MBUDZISO 5

Ndi Nga Ita Mini Arali Ndi Tshi Khou Shengedzwa Tshikoloni?

Ndi Nga Ita Mini Arali Ndi Tshi Khou Shengedzwa Tshikoloni?

ZWINE ZWA ITA URI ZWI VHE ZWA NDEME

Zwine na zwi ita zwi nga khwinisa kana u ṋaṋisa zwithu.

NO VHA NI TSHI ḒO ITA MINI?

Humbulani nga hovhu vhuimo: Thomas ha ṱoḓi u ya tshikoloni ṋamusi kana matshelo. Ngoho ndi uri ha tsha ṱoḓa u ya tshikoloni na luthihi. Hezwi zwithu zwoṱhe zwo thoma miṅwedzini yo fhiraho musi vhane a dzhena navho tshikolo vha tshi phaḓaladza mazwifhi e a mu tshinya dzina. Nga murahu ha zwenezwo, vha thoma u mu kolela nga u mu vhidza nga madzina a ṱhavhaho. Nga zwiṅwe zwifhinga muṅwe muthu o vha a tshi khuḓa bugu dza Thomas tshanḓani nahone zwa tou nga ho ngo ita nga khole, kana muṅwe wa vhane vha khou tshimbila murahu hawe a mu sukumedza nahone musi Thomas a tshi rembuluwa, a sa vhone uri zwo itwa nga nnyi. Mulovha zwo vha zwo tou hulela, Thomas o rumelwa mulaedza u tshuwisaho nga Inthanethe . . .

Arali no vha ni Thomas, no vha ni tshi ḓo ita’ni?

IMANI NI HUMBULE!

A si uri a hu na zwine na nga ita! Zwi re zwone ndi uri ni nga kunda muthu ane a khou ni shengedza ni songo vhuya na lwa nae. Nga nḓila-ḓe?

  •   DZIKANI. Bivhili i ri: “Tsilu ḽi bula zwoṱhe zwa mbiluni yaḽo; wa vhuṱali u zwi vhulungela ḽa matshelo.” (Mirero 29:11) Arali na dzika​—zwa si vhonale uri no sinyuwa—​ni nga kha ḓi kula nungo vhane vha khou ni shengedza.

  • NI SONGO LIFHEDZA. Bivhili i ri: “Ni songo lifhedza vhuvhi nga vhuvhi.” (Vharoma 12:17) U lifhedza zwi ṋaṋisa vhuimo.

  • NI SONGO ḒIDZHENISA KHOMBONI. Bivhili i ri: “Muthanyi u vhona muvhango a khuda.” (Mirero 22:3) U ya nga hune zwa konadzea ngayo, iledzani u vha vhukati ha vhathu vhane vha nga vusa khakhathi na vhuimo vhune ha nga ita uri ni shengedzwe.

  • LINGEDZANI U FHINDULA NGA NḒILA I SONGO LAVHELELWAHO. Bivhili i ri: “Phindulo ya vhuthu i dzikisa mbiti.” (Mirero 15:1) Ni nga kha ḓi lingedza u ita na miswaswo. Sa tsumbo, arali muthu ane a khou ni shengedza a ni sea a amba uri no khwaṱha, ni nga kha ḓi ri: “Ni khou amba ngoho, khamusi ndi tea u dzhima u itela u fhungudzanyana mapfura muvhilini!”

  • ḒIṰUTSHELENI. Nora a re na miṅwaha ya 19 u ri: “U fhumula zwi sumbedza uri no vhibva nahone a ni fani na muthu ane a khou ni shengedza. Zwi sumbedza uri ni a kona u ḓifara​—pfaneleo ine muthu ane a khou ni shengedza a si vhe nayo.”​—2 Timotheo 2:24.

  • GUDANI U ḒIFULUFHELA. Kanzhi vhathu vhane shengedza vhaṅwe vha a kona u vhona vhathu vhane vha si ḓifulufhele, samusi vhathu vho raloho vha sa anzeli u ḓilwela. Vhunzhi ha vhathu vhane vha shengedza vhaṅwe vha a kulea nungo musi vha tshi vhona uri a ni vha ofhi.

  • VHUDZANI MUṄWE MUTHU. Muṅwe muthu we a vha e mudededzi u ri: “Ndi ṱuṱuwedza muṅwe na muṅwe ane a shengedzwa uri a ambe. Zwo tea uri a ambe samusi zwi tshi nga ita uri vhaṅwe vhathu vha si shengedzwe.”

U ḓifulufhela zwi nga ni ṋea maanḓa ane muthu ane a khou ni shengedza a si vhe nao