Pfukelani kha mafhungo

Pfukelani kha zwi re ngomu

 MBUDZISO 3

Ndi Nga Ambedzana Hani Na Vhabebi Vhanga?

Ndi Nga Ambedzana Hani Na Vhabebi Vhanga?

ZWINE ZWA ITA URI ZWI VHE ZWA NDEME

Arali ni tshi tshilisana zwavhuḓi na vhabebi vhaṋu, zwithu zwi ḓo ni tshimbilela zwavhuḓi vhutshiloni.

NO VHA NI TSHI ḒO ITA MINI?

Humbulani nga hovhu vhuimo: Ndi Ḽavhuraru nga madekwana. Geoff a re na miṅwaha ya 17 o fhedza u ita mishumo yawe ya hayani nahone zwino o ḓilugisela u dzula a tou ḓigeḓa! U funga TV nahone a dzula kha tshidulo tshine a tshi funesa.

A tshi tou fhedza u ita zwenezwo, khotsi awe vha mbo ḓi dzhena nḓuni nahone vha vhonala vha songo takala.

“Geoffrey! Ndi ngani ni tshi khou ḓifhedzela tshifhinga nga u ṱalela TV ngeno ni tshi tea u thusa murathu waṋu nga tshuṅwahaya? A ni pfi ni a ḓivha!”

“A u pfi ha, vho thoma khevha,” ndi Geoff a no ralo a tshi khou ṅuṅuna lune zwa tou pfala.

Khotsi awe vha sendela tsini nae vha ri: “Ni ri mini mutukana?”

Geoff u a femuluwa a lavhelesa khotsi awe nga nḓila ya u lunyadzo a ri: “A hu na baba.”

Zwino khotsi awe vho no sinyuwa vhukuma. Vha ri: “Ni songo amba na nṋe nga lunyadzo, zwi khou pfala?”

Arali no vha ni Geoff, no vha ni tshi ḓo vha no thivhela hani yeneyi khuḓano?

IMANI NI HUMBULE!

U davhidzana na vhabebi vhaṋu zwi fana na u reila goloi. Arali na wana bada yo thivhiwa, ni a khona na fara iṅwe.

 SA TSUMBO:

Muṅwe musidzana ane a pfi Leah u ri: “Zwi a nkonḓela u amba na khotsi anga. Nga zwiṅwe zwifhinga musi ndi tshi amba navho vha mbo ḓi ri ‘A tho ngo zwi pfa, no vha ni tshi khou ri mini?’”

HU NA ZWITHU ZWIRARU ZWINE LEAH A NGA ZWI ITA.

  1. A nga zhambela khotsi awe.

    Leah u a huwelela, “Baba-we, haya mafhungo ndi a ndeme! Kha vha thetshelese!”

  2. A nga litsha u amba na khotsi awe.

    Leah u mbo ḓi tou litsha tshoṱhe u lingedza u vhudza khotsi awe thaidzo yawe.

  3. A nga amba nga enea mafhungo ngavhuya.

    Leah a nga ambedzana na khotsi awe kana a vha ṅwalela vhurifhi a vha ṱalutshedza thaidzo yawe.

Ni nga tama uri Leah a khethe zwifhio?

ṰHOGOMELANI: Khotsi a Leah vho farakanea nga zwiṅwe​—nahone a vha zwi vhoni uri ṅwananyana wavho o dinalea. Nga zwenezwo, arali Leah a khetha Vhukando A, khotsi awe vha nga kha ḓi sa pfesesa uri ndi ngani a tshi khou tou huwelela. Honovhu vhukando vhu nga kha ḓi ita uri khotsi a Leah vha si mu thetshelese nahone vhu nga kha ḓi sumbedza uri ha vha ṱhonifhi na u vha hulisa. (Vhaefesa 6:2) Zwi khagala uri a hu na ane a ḓo vhuyelwa nga hovhu vhukando.

Samusi ni sa ṅali musi ni tshi wana bada yo thivhiwa, ni nga wana dziṅwe nḓila dza u ambedzana na vhabebi vhaṋu

Navho Vhukando B vhu tshi nga vhonala vhu tshi leluwa, fhedzi a si ha vhuṱali. Ndi ngani? Nga ṅwambo wa uri u itela uri Leah a piringulule thaidzo dzawe, u tea u amba na khotsi awe​—nahone uri vha kone u mu thusa, vha tea u ḓivha zwine zwa khou itea vhutshiloni hawe. U fhumula a zwi thusi tshithu.

Naho zwo ralo, kha Vhukando C, Leah ha tendeli yeneyi khaedu i tshi mu thivhela u amba na khotsi awe. Nṱhani hazwo, u lingedza u haseledza navho eneo mafhungo ngavhuya. Arali Leah a ṅwalela khotsi awe vhurifhi, a nga kha ḓi ḓipfa o rulwa muhwalo.

U ṅwala vhurifhi zwi nga kha ḓi ita uri a ṱalutshedze zwavhuḓi zwine a khou ṱoḓa u zwi vhudza khotsi awe. Musi khotsi a Leah vha tshi vhala vhurifhi, vha ḓo pfa zwe a vha a tshi khou lingedza u vha vhudza zwone, zwa vha thusa uri vha pfesese khwine thaidzo ya ṅwananyana wavho. Nga zwenezwo, Vhukando C vhu vhuyedza Leah na khotsi awe. Hu sa londwi uri u ambedzana na khotsi awe nga ho livhaho kana u tou ṅwala vhurifhi, hovhu vhukando vhu tshimbidzana na nyeletshedzo ya Bivhili ine ya ri “Kha ri tovhole zwithu zwine zwa ḓisa mulalo.”​—Vharoma 14:19.

Ndi vhufhio vhuṅwe vhukando vhune Leah a nga vhu dzhia?

Humbulani nga ha vhuṅwe vhukando nahone ni vhu ṅwale afho fhasi. Nga murahu ni ṅwale mvelelo dzine dza nga vha hone.

 NI SONGO ḒAḒISA VHABEBI VHAṊU

Ni songo hangwa uri nga zwiṅwe zwifhinga vhabebi vhaṋu vha nga kha ḓi vha vha songo pfesesa zwe na zwi amba.

SA TSUMBO:

Vhabebi vhaṋu vha ni vhudzisa uri ndi ngani ni songo takala. Ni nga ri “A thi ṱoḓi u amba nga hazwo.”

Fhedzi vhabebi vhaṋu vha nga pfa u nga no ri: “Ndi nga si vha vhudze zwi re mbiluni yanga ngauri a thi vha fulufheli. Thaidzo dzanga ndi ḓo dzi vhudza khonani dzanga.”

Edzani u humbula no sedzana na thaidzo khulwane nahone vhabebi vhaṋu vha tshi ṱoḓa u ni thusa. Fhedzi inwi na ri: “Vha songo ḓidina, ndi ḓo i piringulula.”

  • Vhabebi vhaṋu vha nga pfa u nga ni ri mini?

  • Zwi nga vha zwavhuḓi arali na fhindula na ri mini?