Pfukelani kha mafhungo

Pfukelani kha zwi re ngomu

 MBUDZISO 4

Ndi Nga Lugisa Hani Vhukhakhi Hanga?

Ndi Nga Lugisa Hani Vhukhakhi Hanga?

ZWINE ZWA ITA URI ZWI VHE ZWA NDEME

U tenda vhukhakhi vhaṋu zwi ḓo ita uri ni vhe muthu a fulufhedzeaho na a fulufhelwaho.

NO VHA NI TSHI ḒO ITA MINI?

Humbulani nga hovhu vhuimo: Musi Tim a tshi khou tamba na khonani dzawe, u posa bola ya mbo ḓi pwasha fasiṱere ḽa goloi ya muhura wawe.

Arali no vha ni Tim, no vha ni tshi ḓo ita mini?

IMANI NI HUMBULE!

NI NGA ITA ZWITHU ZWIRARU:

  1. Ni nga shavha.

  2. Ni nga pomoka muṅwe muthu.

  3. Ni nga vhudza muhura waṋu zwe zwa itea na mu ṱalutshedza uri u ḓo lifhelwa tshinyalelo dza u lugisa ḽeneḽo fasiṱere.

Ni nga kha ḓi lingea u dzhia Vhukando A. Fhedzi tshifhinga tshoṱhe hu na zwiitisi zwi pfalaho zwa u tenda vhukhakhi haṋu​—hu sa londwi uri ho pwashiwa fasiṱere kana ho itwa zwiṅwe zwithu.

 ZWIITISI ZWIRARU ZWINE ZWA TEA U RI ITA URI RI TENDE VHUKHAKHI HASHU

  1. Zwo tea uri ri tende vhukhakhi.

    Bivhili i ri: “Ri . . . tama u ḓifara nga nḓila i fulufhedzeaho kha zwithu zwoṱhe.”​—Vhaheberu 13:18.

  2. Kanzhi vhathu vha a hangwela vhane vha tenda vhukhakhi havho.

    Bivhili i ri: “Mu-dzumba-zwe-a-tshinya ha vuledzi tshithu; hu hangwelwa ane a zwi bula a zwi laṱa.”​—Mirero 28:13.

  3. Zwa ndeme vhukuma ndi uri zwi takadza Mudzimu.

    Bivhili i ri: “Yehova u nengwa nga vhadzia-u-pambuwa; u konana na vhane vha luga.”​—Mirero 3:32.

Karina a re na miṅwaha ya 20 o lingedza o dzumbela khotsi awe thikhithi ye a i wana nga nṱhani ha u reila nga luvhilo luhulwane. Fhedzi ho ngo kona u zwi dzumba lwa tshoṱhe. Karina u ri: “Nga murahu ha ṅwaha, khotsi anga vho mbo ḓi i vhona yeneyo thikhithi ya u reila nga luvhilo luhulwane. Zwo ndzhenisa khakhathini khulwane!”

O guda mini kha zwenezwo? Karina u ri: “U dzumba vhukhakhi zwi tou ṋaṋisa zwithu. Hu vha na masiandoitwa a si avhuḓi!”

NḒILA YA U GUDA KHA VHUKHAKHI HAṊU

Bivhili i ri: “Roṱhe ri a khakha lunzhi.” (Yakobo 3:2) Samusi ro zwi vhona, u tenda vhukhakhi haṋu zwi sumbedza uri ni a ḓiṱukufhadza nahone no vhibva​—nahone ni tea u zwi ita nga u ṱavhanya.

Vhukando ha vhuvhili ndi u guda kha vhukhakhi haṋu. Muṅwe musidzana ane a pfi Vera u ri: “Ndi lingedza u guda zwiṅwe zwithu kha vhukhakhi vhuṅwe na vhuṅwe vhune nda vhu ita, uri ndi khwinise vhumuthu hanga na uri ndi ite zwithu nga nḓila ya khwine tshifhingani tshi ḓaho.” Kha ri vhone uri ni nga zwi itisa hani zwenezwo.

Ni hadzima baisigira ya khotsi aṋu na mbo ḓi i tshinya. Ni ḓo ita’ni?

  • Ni ḓo ḓifhumutshela na ḓivhudza uri a vha nga zwi vhoni.

  • Ni ḓo vhudza khotsi aṋu zwe zwa itea.

  • Ni ḓo vhudza khotsi aṋu zwe zwa itea, fhedzi na pomoka muṅwe muthu.

Ni feila mulingo nge na si vhale. Ni ḓo ita’ni?

  • Ni ḓo amba uri wo vha u tshi khou konḓa.

  • Ni ḓo amba uri no vha ni songo vhala.

  • Ni ḓo amba uri mudededzi wa vhoiwe u a ni vhenga.

U dzula u tshi humbula nga vhukhakhi ha kale zwi fana na u reila goloi wo sedza tshivhoni tshine tsha sumbedza zwithu zwa murahu

 Zwino humbulani nga ha vhuimo he ra vhu ṱalusa afho nṱha nahone ni lingedze u ḓivhona ni (1) khotsi aṋu na (2) mudededzi waṋu. Khotsi aṋu na mudededzi waṋu vha ḓo ni dzhia hani arali na tenda vhukhakhi haṋu? Vha ḓo ni dzhia hani arali na dzumba vhukhakhi haṋu?

Zwino humbulani nga ha vhukhakhi he na vhu ita ṅwahani wo fhiraho nahone ni fhindule mbudziso dzi tevhelaho.

No vha no ita’ni? No dzudzanya hani honoho vhukhakhi?

  • Ndo vhu dzumba.

  • Ndo pomoka muṅwe muthu.

  • Ndo tenda uri ndo khakha.

Arali ni songo tenda vhukhakhi haṋu, no ḓipfa hani nga murahu?

  • Ndo takala​—nge nda kona u vhu dzumba!

  • Ndo ḓipfa ndi na mulandu​—ndo vha ndo tea u vha ndo amba ngoho.

Ndi ifhio nḓila ya khwine ye na vha no tea u vha no dzudzanya ngayo eneo mafhungo?

No guda mini kha vhukhakhi haṋu?

NI ZWI VHONA HANI?

Ndi ngani vhaṅwe vhathu vha sa tendi vhukhakhi havho?

Vhathu vha ḓo ni dzhia hani arali ni tshi dzulela u lingedza u dzumba vhukhakhi haṋu, fhedzi vha ḓo ni dzhia hani arali ni tshi tenda vhukhakhi haṋu?​—Luka 16:10.