Pfukelani kha mafhungo

Pfukelani kha zwi re ngomu

 NGUDO 5

Ndi Ifhio Ndivho Ya Mudzimu Nga Ḽifhasi?

Ndi Ifhio Ndivho Ya Mudzimu Nga Ḽifhasi?

1. Ndi ngani Mudzimu o sika ḽifhasi?

Yehova o ṋea vhanna na vhafumakadzi ḽifhasi. Ndi haya hashu. Nga zwenezwo, vhavhingani vha u thoma, Adamu na Eva, a vho ngo sikwa uri vha ye u tshila ṱaḓulu—Mudzimu o vha o no ḓi sika vharuṅwa uri vha tshile ṱaḓulu. (Yobo 38:4, 7) Nṱhani hazwo, Mudzimu o dzhia munna wa u thoma nahone a mu vhea tsimuni yo nakaho ine ya vhidzwa Edeni. (Genesi 2:15-17) Yehova o ṋea ene na vhana vhe a vha a tshi ḓo vha navho tshilavhelelwa tsha u ḓiphiṋa nga vhutshilo vhu sa fheli kha ḽifhasi.​—Vhalani Psalme ya 37:29; 115:16.

U thomani, ho vha hu tsimu ya Edeni fhedzi ye ya vha i paradiso. Vhavhingani vha u thoma vho vha vho tea u ḓadza ḽifhasi nga vhana vhavho. Nga u ya ha tshifhinga, vho vha vho tea u ḓadza khungulu yoṱhe nahone vha i ita paradiso. (Genesi 1:28) Ḽifhasi ḽi nga si vhuye ḽa fheliswa. Ḽi ḓo dzula ḽi haya ha vhathu.​—Vhalani Psalme ya 104:5.

2. Ndi ngani ḽifhasi ḽi si paradiso zwino?

Adamu na Eva a vho ngo thetshelesa Mudzimu, nga nṱhani ha zwenezwo Yehova o mbo ḓi vha pandela tsimuni. Zwenezwo zwa ita uri hu si tsha vha na paradiso nahone a hu na muthu we a kona u i vusulusa. Bivhili i ri: “Shango ḽo vhewa zwanḓani zwa vhavhi.”—Yobo 9:24.​—Vhalani Genesi 3:23, 24.

Naa Yehova o ṱutshela ndivho yawe ya u thoma malugana na vhathu? Hai! Ndi Ramaanḓaoṱhe. A nga si kundwe. (Yesaya 45:18) U ḓo ita uri vhathu vha tshile nga nḓila ye a vha o livha uri zwi vhe ngayo.​—Vhalani Psalme ya 37:11, 34.

3. Paradiso i ḓo vusuluswa hani?

Paradiso i ḓo vusuluswa kha ḽifhasi musi Yesu a tshi vhusa sa Khosi yo vhewaho nga Mudzimu. Kha nndwa ine ya vhidzwa Haramagedo, Yesu u ḓo ranga phanḓa vharuṅwa vha Mudzimu nahone a fhelisa vhoṱhe vhane vha hanedza Mudzimu. Nga murahu  ha zwenezwo, Yesu u ḓo valela Sathane miṅwaha ya 1 000. Vhathu vha Mudzimu vha ḓo ponyoka yeneyo ndozwo ngauri Yesu u ḓo vha livhisa na u vha tsireledza. Vha ḓo ḓiphiṋa nga vhutshilo vhu sa fheli Paradisoni kha ḽifhasi.​—Vhalani Nzumbululo 20:1-3; 21:3, 4.

4. Tshengelo i ḓo fhela lini?

Mudzimu u ḓo fhelisa lini vhuvhi kha ḽifhasi? Yesu o ṋea “tshiga” tshine tsha ḓo sumbedza musi vhufhelo vhu tsini. Vhuimo ha zwino ha shango vhu vhea khomboni vhutshilo ha vhathu nahone vhu sumbedza uri zwino ri tshila tshifhingani tsha “vhufhelo ha ano maitele a zwithu.”​—Vhalani Mateo 24:3, 7-14, 21, 22.

Yesu u ḓo fhelisa tshengelo yoṱhe tshifhingani tsha miṅwaha ya 1000 musi a tshi khou vhusa ḽifhasi e ngei ṱaḓulu. (Yesaya 9:5, 6; 11:9) Yesu u ḓo vha Khosi na Tshifhe Muhulu, a phumula zwivhi zwa vhane vha funa Mudzimu. Nga zwenezwo, a tshi shumisa Yesu, Mudzimu u ḓo fhelisa malwadze, vhulala na lufu.​—Vhalani Yesaya 25:8; 33:24.

5. Ndi vhafhio vhane vha ḓo tshila Paradisoni tshifhingani tshi ḓaho?

Holoni ya Muvhuso, ni ḓo vhona vhathu vhane vha funa Mudzimu nahone vhane vha ṱoḓa u guda nḓila ya u mu takadza

Vhathu vhane vha thetshelesa Mudzimu vha ḓo tshila Paradisoni. (1 Yohane 2:17) Yesu o ruma vhatevheli vhawe uri vha ṱoḓe vhathu vho vuḓaho na u vha funza nḓila ine vha nga ṱanganedzea ngayo kha Mudzimu. Ṋamusi, Yehova u khou lugiselela vhathu vha dzimilioni uri vha tshile Paradisoni fhano kha ḽifhasi tshifhingani tshi ḓaho. (Tsefanya 2:3) Holoni dza Muvhuso dza Ṱhanzi dza Yehova, vhathu vha guda u vha vhanna na vhokhotsi vhavhuḓi na u vha vhafumakadzi na vhomme vhavhuḓi. Vhana na vhabebi vha gwadamela Mudzimu vhoṱhe nahone vha guda nḓila ine vha nga vhuyelwa ngayo nga mafhungo maḓifha.​—Vhalani Mixa 4:1-4.