Pfukelani kha mafhungo

Pfukelani kha zwi re ngomu

 NGUDO 7

Muvhuso Wa Mudzimu Ndi Mini?

Muvhuso Wa Mudzimu Ndi Mini?

1. Muvhuso wa Mudzimu ndi mini?

di ngani Yesu a tshi fanelea u vha Khosi?—MARKO 1:40-42.

Muvhuso wa Mudzimu ndi hulumeni wa ṱaḓulu. U ḓo dzhia vhudzulo ha dziṅwe hulumeni dzoṱhe nahone u ḓo ita uri zwi funwaho nga Mudzimu zwi itwe ṱaḓulu na kha ḽifhasi. Zwi a takadza uri Mudzimu u ḓo shumisa Muvhuso wawe nga yeneyi nḓila. Hu si kale Muvhuso wa Mudzimu u ḓo fusha tshishaiwa tsha vhathu tsha hulumeni wavhuḓi. U ḓo ita uri vhathu vhoṱhe vha tshilisane nga vhuthihi.​—Vhalani Daniele 2:44; Mateo 6:9, 10; 24:14.

Muvhuso u fanela u vha na khosi. Yehova o vhea Murwa wawe, Yesu Kristo, u ri a vhe Khosi ya Muvhuso Wawe.—Vhalani Nzumbululo 11:15.

2. Ndi ngani Yesu e Khosi yo faneleaho?

Murwa wa Mudzimu ndi Khosi yo faneleaho nga ṅwambo wa uri u na vhuthu nahone u imela zwo lugaho o khwaṱha. (Yohane 1:14) Zwiṅwe hafhu, u na maanḓa a u thusa vhathu ngauri u ḓo vhusa ḽifhasi e ṱaḓulu. Musi o no vuswa vhafuni, o gonya ṱaḓulu, a swika a dzula a lindela e thungo ya tshanḓa tsha u ḽa tsha Yehova. (Vha-Heberu 10:12, 13) Mudzimu a fheleledza o mu ṋea maanḓa uri a thome u vhusa.​—Vhalani Daniele 7:13, 14.

3. Ndi vhafhio vhaṅwe vhane vha ḓo vhusa na Yesu?

Tshigwada tshine tsha vhidzwa “vhakhethwa” tshi ḓo vhusa na Yesu ṱaḓulu. (Daniele 7:27) Vhakhethwa vha u thoma vhe vha nangiwa vho vha vhe vhaapostola vha fulufhedzeaho vha Yesu. Yehova o bvela phanḓa a tshi khetha vhanna na vhafumakadzi vha fulufhedzeaho u swika na zwino. Vha vuswa vhe na mivhili ya muya u fana na Yesu.​—Vhalani Yohane 14:1-3; 1 Vha-Korinta 15:42-44.

 Ndi vhangana vhathu vhane vha ya ṱaḓulu? Yesu o vha vhidza “sambi ḽiṱuku.” (Luka 12:32) Vha ḓo fheleledza vho swika 144-000. Vha ḓo vhusa ḽifhasi na Yesu.​—Vhalani Nzumbululo 14:1.

4. Ho itea mini musi Yesu a tshi thoma u vhusa?

Muvhuso wa Mudzimu wo thoma u vhusa nga 1914. * Vhukando ha u thoma he Yesu a vhu dzhia ho vha hu u posela Sathane na madimoni awe kha ḽifhasi. Sathane o sinyuwa nahone a thoma u vusa khakhathi kha ḽifhasi. (Nzumbululo 12:7-10, 12) U bva nga tshenetsho tshifhinga, khombo dze dza wela vhathu dzo ṋaṋa vhukuma. Dzinndwa, dzinḓala, malwadze na midzinginyo zwoṱhe ndi tshipiḓa tsha “tshiga” tsha uri hu si kale Muvhuso wa Mudzimu u ḓo langa tshoṱhe zwithu kha ḽifhasi.​—Vhalani Luka 21:7, 10, 11, 31.

5. Muvhuso wa Mudzimu u khunyeledza mini?

Nga mushumo wa u huwelela shangoni ḽoṱhe, Muvhuso wa Mudzimu wo no ḓi kuvhanganya gogo ḽihulu ḽa vhathu vha bvaho kha tshaka dzoṱhe. Vhathu vho vuḓaho vha dzimilioni vha khou vhuswa nga Yesu. Muvhuso wa Mudzimu u ḓo vha tsireledza musi u tshi fhelisa ano maitele mavhi a zwithu kha ḽifhasi. Nga zwenezwo, vhoṱhe vhane vha ṱoḓa u vhuyelwa nga Muvhuso wa Mudzimu vha tea u guda u vha vhavhusiwa vha Yesu vha thetshelesaho.​—Vhalani Nzumbululo 7:9, 14, 16, 17.

Tshifhingani tsha miṅwaha ya 1000, wonoyo Muvhuso u ḓo khunyeledza ndivho ya u thoma ya Mudzimu nga ha vhathu. Ḽifhasi ḽoṱhe ḽi ḓo vha paradiso. Yesu u ḓo fheleledza o kumedza Khotsi awe Muvhuso. (1 Vha-Korinta 15:24-26) Naa hu na muthu ane na ṱoḓa u mu vhudza nga ha Muvhuso wa Mudzimu?​—Vhalani Psalme ya 37:10, 11, 29.

 

^ phar. 6 U itela zwidodombedzwa zwa nḓila ye vhuporofita ha Bivhili ha dzula ho amba ngayo nga ha ṅwaha wa 1914, sedzani masiaṱari 215-218 a bugu Bivhili I Funza Mini Zwa Vhukuma?