Pfukelani kha mafhungo

Pfukelani kha zwi re ngomu

 NGUDO 2

Mudzimu Ndi Nnyi?

Mudzimu Ndi Nnyi?

1. Ndi ngani ri tshi fanela u gwadamela Mudzimu?

Mudzimu wa ngoho ndi ene Musiki wa zwithu zwoṱhe. Ha na mathomo nahone a nga si vhuye a vha na magumo. (Psalme ya 90:2) Ndi ene Tshisima tsha mafhungo maḓifha ane a wanala Bivhilini. (1 Timotheo 1:11) Samusi Mudzimu o ri ṋea vhutshilo, ri tea u gwadamela ene fhedzi.​—Vhalani Nzumbululo 4:11.

2. Mudzimu u hani?

A hu na muthu we a vhuya a vhona Mudzimu nga ṅwambo wa uri ndi Muya, zwine zwa amba uri tshivhumbeo tshawe a tshi fani na tsha zwivhumbiwa zwine zwa tshila kha ḽifhasi. (Yohane 1:18; 4:24) Naho zwo ralo, ri nga vhona vhumuthu ha Mudzimu kha zwithu zwe a zwi sika. Sa tsumbo, mitshelo na maluvha zwo fhamba-fhambanaho zwi ri sumbedza lufuno na vhuṱali hawe. Vhuhulwane ha fhethu hoṱhe hu ri sumbedza uri u na maanḓa.​—Vhalani Vha-Roma 1:20.

Ri nga guda zwinzhi nga ha vhumuthu ha Mudzimu nga u vhala Bivhili. Sa tsumbo, i ri vhudza zwine Mudzimu a zwi funa na zwine a si zwi fune, nḓila ine a fara ngayo vhathu na nḓila ine a aravha ngayo kha vhuimo vhu sa fani.​—Vhalani Psalme ya 103:7-10.

3. Naa Mudzimu u na dzina?

Yesu o ri: “Khotsi-ashu wa ṱaḓulu! dzina ḽau ḽi khethwe.” (Mateo 6:9) Naho Mudzimu e na madzina-zwao manzhi, u na dzina ḽithihi fhedzi. Ḽi vhidzwa nga nḓila dzo fhamba-fhambanaho kha luambo luṅwe na luṅwe. Nga Luvenḓa ḽi pfi “Yehova.”​—Vhalani Psalme ya 83:18.

Dzina ḽa Mudzimu ḽo bviswa kha Bivhili nnzhi nahone ha dzheniswa madzina-zwao a ngaho Murena kana Mudzimu. Fhedzi musi hu tshi ṅwalwa Bivhili, dzina ḽa Mudzimu ḽo vha ḽi tshi bvelela lu ṱoḓaho u vha 7 000. Yesu o ita uri dzina ḽa Mudzimu ḽi ḓivhiwe nga u ḽi shumisa musi a tshi funza vhathu.​—Vhalani Yohane 17:26.

 4. Naa Yehova u a ri londa?

U fana na onoyu khotsi a re na lufuno, Mudzimu u dzhia vhukando u itela uri vhuyedza nga hu sa fheli

Naa u shengela ha vhathu vhanzhi zwi sumbedza uri Yehova ndi Mudzimu a sa ri londi? Vhaṅwe vhathu vha amba uri u ri tendela ri tshi shengela u itela u ri linga, fhedzi zwenezwi a si ngoho.​—Vhalani Yakobo 1:13.

Mudzimu o sumbedza vhathu tshirunzi nga u vha ṋea mbofholowo ya u ḓikhethela. Naa a ri dzhieli nṱha mbofholowo yashu ya u khetha u shumela Mudzimu? (Yoshua 24:15) Fhedzi vhathu vhanzhi vha a shengela nga ṅwambo wa uri vhunzhi ha vhathu vha itela vhaṅwe zwithu zwivhi. Yehova u a pfa vhuṱungu musi a tshi vhona yeneyo nḓila i si yavhuḓi ine vhathu vha farana ngayo.​—Vhalani Genesi 6:5, 6.

Yehova ndi Mudzimu ane a ri londa. U ṱoḓa uri ri ḓiphiṋe nga vhutshilo. Hu si kale u ḓo fhelisa tshengelo na vhane vha i bveledza. Zwa zwino u na tshiitisi tshi pfalaho tsha u tendela tshengelo i tshi bvela phanḓa lwa tshifhinganyana. Ri ḓo guda nga ha tshiitisi tsha hone kha Ngudo 8.​—Vhalani 2 Petro 2:9; 3:7, 13.

5. Ri nga sendela hani tsini na Mudzimu?

Yehova u ri ramba uri ri sendele tsini nae nga u amba nae nga thabelo. U a ri londa nga muthihi nga muthihi. (Psalme ya 65:2; 145:18) O ḓiimisela u hangwela. U a zwi vhona musi ri tshi ita vhuḓidini ha u mu takadza, naho arali nga zwiṅwe zwifhinga ri tshi kundwa. Nga zwenezwo, hu sa londwi u sa fhelela hashu, ri nga vha na vhushaka vhuhulwane na Mudzimu.​—Vhalani Psalme ya 103:12-14; Yakobo 4:8.

Samusi Yehova o ri ṋea vhutshilo, ri tea u mu funa u fhira muthu naho e ufhio. (Marko 12:30) Ni ḓo sendela tsini na Mudzimu musi ni tshi sumbedza nḓila ine na mu funa ngayo nga u guda zwo engedzeaho nga hae, na nga u ita zwine a zwi funa.​—Vhalani 1 Timotheo 2:4; 1 Yohane 5:3.