Pfukelani kha mafhungo

Pfukelani kha zwi re ngomu

 NGUDO 11

Maitele A Bivhili A Ri Vhuyedza Hani?

Maitele A Bivhili A Ri Vhuyedza Hani?

1. Ndi ngani ri tshi fanela u livhiswa?

Maitele a Bivhili a nga ri sudzulusela hani u tevhela milayo ine ya ita uri ri tsireledzee?​—PSALME YA 36:9.

Musiki washu o ṱalifha u ri fhira. Samusi e Khotsi wa lufuno, u a ri londa. Zwiṅwe hafhu, o vha a songo dzudzanya uri ri ḓilange. (Yeremia 10:23) Samusi ṅwana muṱuku a tshi tea u livhiswa nga vhabebi, roṱhe ri fanela u livhiswa nga Mudzimu. (Yesaya 48:17, 18) Maitele a Bivhili a ṋea vhulivhisi vhune ha vha tshifhiwa tshi bvaho ha Mudzimu.​—Vhalani 2 Timotheo 3:16.

Milayo na maitele a Yehova zwi ri gudisa nḓila ya khwine ya u tshila zwino na u ri sumbedza nḓila ine ra nga wana ngayo malamba a tshoṱhe tshifhingani tshi ḓaho. Samusi ro sikwa nga Mudzimu, zwo tea uri ri ṱanganedze vhulivhisi hawe.​—Vhalani Psalme ya 19:7, 11; Nzumbululo 4:11.

2. Maitele a Bivhili ndi mini?

Maitele a Bivhili ndi mafhungo-ngoho a mutheo. Kha ḽiṅwe sia, milayo i nga kha ḓi shumiselwa kha zwiṅwe zwiimo zwo livhaho. (Doiteronomio 22:8) Ri fanela u shumisa vhukoni hashu ha u elekanya u itela uri ri pfesese nḓila ine maitele a shuma ngayo kha vhuṅwe vhuimo. (Mirero 2:10-12) Sa tsumbo, Bivhili i funza uri vhutshilo ndi tshifhiwa tshi bvaho ha Mudzimu. Eneo maitele a mutheo a nga ri livhisa mushumoni, hayani na musi ri lwendoni. A ri ita uri ri tevhele milayo ine ya ita uri ri tsireledzee.​—Vhalani Mishumo 17:28.

3. Ndi afhio maitele mavhili a ndeme?

Yesu o amba nga ha maitele mavhili a ndeme vhukuma. A u thoma a dzumbulula ndivho khulwane ya vhutshilo ha vhathu—u ḓivha Mudzimu, u mu funa na u mu shumela nga u fulufhedzea. Ri tea u humbula nga enea maitele a u thoma musi ri tshi ita phetho dzashu dzoṱhe. (Mirero 3:6) Vhane vha tshila u tendelana na  enea maitele vha vhumba vhukonani na Mudzimu, vha wana dakalo ḽa ngoho na vhutshilo vhu sa fheli.​—Vhalani Mateo 22:36-38.

Maitele a vhuvhili a nga ri livhisa uri ri vhe na vhushaka havhuḓi na vhaṅwe. (1 Vha-Korinta 13:4-7) U shumisa maitele a vhuvhili zwi katela u edzisa nḓila ine Mudzimu a fara ngayo vhathu.​—Vhalani Mateo 7:12; 22:39, 40.

4. Maitele a Bivhili a ri vhuyedza hani?

Maitele a Bivhili a gudisa miṱa nḓila ine ya nga ṱanganywa ngayo nga lufuno. (Vha-Kolosa 3:12-14) Ipfi ḽa Mudzimu ḽi dovha ḽa tsireledza miṱa nga u i gudisa muṅwe mulayo u livhisaho—mulayo wa uri mbingano i tea u vha ya tshoṱhe.—Vhalani Genesi 2:24.

Arali ra tevhela pfunzo dza Bivhili, zwithu zwi nga kha ḓi ri tshimbilela zwavhuḓi siani ḽa zwithu zwa ṋama nahone ra na mutakalo wavhuḓi. Sa tsumbo, kanzhi vhatholi vha ṱoḓa vhashumi vhane vha tshila nga maitele a Bivhili, ane a katela u fulufhedzea na u shuma nga mafulufulu. (Mirero 10:4, 26; Vha-Heberu 13:18) Ipfi ḽa Mudzimu ḽi ri funza uri ri fushee nga u vha na zwithu zwine ra zwi shaya na u dzhiela nṱha vhushaka na Mudzimu u fhira zwithu zwi vhonalaho.​—Vhalani Mateo 6:24, 25, 33; 1 Timotheo 6:8-10.

U shumisa maitele a Bivhili zwi nga tsireledza mutakalo washu. (Mirero 14:30; 22:24, 25) Sa tsumbo, u tevhela mulayo wa Mudzimu nga ha vhudakwa zwi ri tsireledza kha malwadze a vhulayaho na kha dzikhombo. (Mirero 23:20) Yehova u a ri tendela uri ri nwe halwa nga nḓila yo linganyiselwaho. (Psalme ya 104:15; 1 Vha-Korinta 6:10) Maitele a Mudzimu a ri vhuyedza nga u ri funza uri ri lange zwine ra zwi ita na u zwi elekanya. (Psalme ya 119:97-100) Naho zwo ralo, Vhakriste vha ngoho a vha ṱhonifhi zwilinganyo zwa Mudzimu u itela u sokou ḓivhuyedza. Vha zwi ṱhonifha u itela u hulisa Yehova.​—Vhalani Mateo 5:14-16.