Pfukelani kha mafhungo

Pfukelani kha zwi re ngomu

 NGUDO 13

Ndi Afhio Mafhungo Maḓifha Nga Ha Vhurereli?

Ndi Afhio Mafhungo Maḓifha Nga Ha Vhurereli?

1. Naa vhurereli hoṱhe ho luga?

Hu na vhathu vha mbilu dzavhuḓi kha vhurereli hoṱhe. Zwi a takadza uri Mudzimu u a vha vhona na u vha londa. Fhedzi zwi ṱungufhadzaho ndi uri vhurereli ho shumiselwa u ita zwithu zwivhi. (2 Vha-Korinta 4:3, 4; 11:13-15) U ya nga mivhigo ya mafhungo, vhuṅwe vhurereli ho ita na u shela mulenzhe kha vhufheṱashango, u fheliswa ha lushaka, nndwa na u fara luvhi vhana. Zwi tea u vha zwi tshi ṱungufhadza lungafhani vhane vha tenda Mudzimu nga mbilu yoṱhe!​—Vhalani Mateo 24:3-5, 11, 12.

Vhurereli ha ngoho vhu hulisa Mudzimu ngeno vhurereli ha mazwifhi vhu tshi mu sinyusa. Vhurereli ha mazwifhi vhu funza mihumbulo i siho Bivhilini, u katela na pfunzo dza mazwifhi nga ha Mudzimu na nga ha vhafu. Fhedzi Yehova u ṱoḓa uri vhathu vha ḓivhe ngoho nga hae.​—Vhalani Muhuweleli 9:5, 10; 1 Timotheo 2:3-5.

2. Ndi afhio mafhungo maḓifha nga ha vhurereli?

Zwi takadzaho ndi uri Yehova ha fhurwi nga vhurereli vhune ha amba uri vhu a mu funa, ngeno vhu tshi funa shango ḽa Sathane. (Yakobo 4:4) Ipfi ḽa Mudzimu ḽi ṱalusa vhurereli hoṱhe ha mazwifhi sa “Babele ḽihulu.” Babele ḽo vha ḽi dzina ḽa muḓi wa kale we vhurereli ha mazwifhi ha thoma hone nga murahu ha Maḓi Mahulu a misini ya Noaxe. Hu si kale Mudzimu u ḓo fhelisa nga u ṱavhanya vhurereli vhune ha fhura vhathu na u vha tsikeledza.​—Vhalani Nzumbululo 17:1, 2, 5, 16, 17; 18:8.

Hu na maṅwe mafhungo maḓifha. Yehova ho ngo hangwa vhathu vha mbilu dzavhuḓi vhe vha balangana kha vhurereli ha mazwifhi shangoni ḽoṱhe. U khou ita uri vhathu vho raloho vha vhe na vhuthihi nga u vha funza mafhungo-ngoho.​—Vhalani Mixa 4:2, 5.

 3. Vhathu vha mbilu dzavhuḓi vha tea u ita mini?

Vhurereli ha ngoho vhu ṱanganya vhathu

Yehova u a londa vhathu vhane vha funa ngoho na zwithu zwavhuḓi. U a vha ṱuṱuwedza uri vha ṱutshele vhurereli ha mazwifhi. Vhathu vhane vha funa Mudzimu vha a ḓiimisela u ita tshanduko u itela u mu takadza.​—Vhalani Nzumbululo 18:4.

Ḓanani ḽa u thoma ḽa miṅwaha musi vhathu vha mbilu dzavhuḓi vha tshi pfa mafhungo maḓifha kha vhaapostola, vho a ṱanganedza nga dakalo. Yehova o vha gudisa nḓila ntswa ya u tshila, i takadzaho i re na ndivho na fulufhelo. Vha tsumbo yavhuḓi kha riṋe ṋamusi nga ṅwambo wa uri vho aravha mafhungo maḓifha nga u ita uri Yehova a vhe wa ndeme vhutshiloni havho.​—Vhalani 1 Vha-Thesalonika 1:8, 9; 2:13.

Yehova u ṱanganedza nga mbilu tshena vhane vha ṱutshela vhurereli ha mazwifhi. Arali na tenda musi Yehova a tshi ni ramba nga lufuno, ni ḓo vha khonani yawe, na ṱanganedzwa muṱani muswa wa lufuno wa vhagwadameli nga inwi vha Yehova nahone na wana vhutshilo vhu sa fheli.​—Vhalani Marko 10:29, 30; 2 Vha-Korinta 6:17, 18.

4. Mudzimu u ḓo ita uri hu vhe na dakalo shangoni ḽoṱhe nga nḓila-ḓe?

U fheliswa ha vhurereli ha mazwifhi zwi ḓo vha mafhungo avhuḓi. Zwi ḓo ita uri shango ḽoṱhe ḽi vhofhololwe kha mutsiko. Vhurereli ha mazwifhi a vhu tsha ḓo khelusa vhathu na u vha fhandekanya. Vhathu vhoṱhe vha ḓo gwadamela Mudzimu wa ngoho fhedzi nga vhuthihi.​—Vhalani Nzumbululo 18:20, 21; 21:3, 4.