Pfukelani kha mafhungo

Pfukelani kha zwi re ngomu

 NGUDO 1

Mafhungo Maḓifha Ndi Mini?

Mafhungo Maḓifha Ndi Mini?

1. Mafhungo a bvaho ha Mudzimu ndi afhio?

Mudzimu u ṱoḓa uri vhathu vha ḓiphiṋe nga vhutshilo kha ḽifhasi. O sika ḽifhasi na zwithu zwoṱhe zwi re khaḽo nga ṅwambo wa uri u funa vhathu. U ḓo dzhia vhukando zwenezwino u itela uri vhathu vha re mashangoni oṱhe vha vhe na vhumatshelo havhuḓi. U ḓo fhelisa zwithu zwoṱhe zwine zwa ita uri vhathu vha shengele.​—Vhalani Yeremia 29:11.

A hu na muvhuso we wa vhuya wa kona u fhelisa vhuvemu, malwadze kana lufu. Fhedzi hu na mafhungo maḓifha. Hu si kale, Mudzimu u ḓo fhelisa mivhuso yoṱhe ya vhathu, vhudzuloni hayo a vhea muvhuso wawe. Vhane vha ḓo vhuswa nga muvhuso wawe vha ḓo ḓiphiṋa nga mulalo na mutakalo wavhuḓi.​—Vhalani Yesaya 25:8; 33:24; Daniele 2:44.

2. Ndi ngani mafhungo maḓifha o ṱavhanyiswa?

Tshengelo i ḓo fhela fhedzi musi Mudzimu a tshi fhelisa vhathu vhavhi kha ḽifhasi. (Tsefanya 2:3) Zwenezwo zwi ḓo itea lini? Ipfi ḽa Mudzimu ḽo amba hu tshee nga phanḓa nga ha vhuimo vhune ha vhea vhathu khomboni. Zwithu zwivhi zwine zwa khou itea zwino zwi sumbedza uri tshifhinga tsha uri Mudzimu a dzhie vhukando tshi tsini.​—Vhalani 2 Timotheo 3:1-5.

3. Ri fanela u ita mini?

Ri fanela u guda nga ha Mudzimu ri tshi shumisa Ipfi ḽawe, Bivhili. I fana na vhurifhi he ra ṅwalelwa hone nga khotsi wa lufuno. I ri vhudza nga ha nḓila ine ra nga tshila ngayo khwine ṋamusi na nḓila ine ra nga ḓiphiṋa ngayo nga vhutshilo vhu sa fheli kha ḽifhasi tshifhingani tshi ḓaho. Ndi ngoho uri vhaṅwe vhathu vha nga kha ḓi sa zwi takalela musi vha tshi vhona ni tshi thuswa uri ni pfesese Bivhili. Fhedzi ri songo tenda vhaṅwe vhathu vha tshi ri kula nungo ra vho pfukwa nga tshibuli tsha u guda nga ha vhumatshelo havhuḓi.​—Vhalani Mirero 29:25; Nzumbululo 14:6, 7.