Pfukelani kha mafhungo

Pfukelani kha zwi re ngomu

 NGUDO 10

Ni Nga Ṱalula Hani Vhurabeli Ha Ngoho?

Ni Nga Ṱalula Hani Vhurabeli Ha Ngoho?

1. Naa hu na vhurereli vhuthihi fhedzi ha ngoho?

““Thanyelani vhaporofita vha u zwifha.”—MATEO 7:15.

Yesu o funza vhatevheli vhawe vhurereli vhuthihi fhedzi, vhurereli ha ngoho. Vhu fana na nḓila i yaho vhutshiloni vhu sa fheli. Musi Yesu a tshi amba nga yeneyo nḓila o ri: “Vha i wanaho a si vhanzhi.” (Mateo 7:14) Mudzimu u ṱanganedza fhedzi vhurabeli ho thewaho kha Ipfi ḽawe ḽa ngoho. Vhagwadameli vhoṱhe vha ngoho vha na vhuthihi lutendoni.—Vhalani Yohane 4:23, 24; 14:6; Vha-Efesa 4:4, 5.

2. Yesu o ri mini nga ha Vhakriste vha mazwifhi?

“Vha ri: Mudzimu ri a mu ḓivha, huno nga mishumo yavho vha a landula.”—TITO 1:16.

Yesu o sevha uri vhaporofita vha mazwifhi vha ḓo tshinya Vhukriste. Nga nnḓa vha vhonala u nga ndi vhagwadameli vha ngoho. Vha amba uri kereke dzavho ndi dza Vhukriste. Fhedzi ni nga vhona zwine vhenevho vhathu vha vha zwone zwa vhukuma. Hani? Ndi vhurabeli ha ngoho fhedzi vhune ha vha na Vhakriste vha vhukuma, vhane vha vha na pfaneleo na matshilele zwi swayeaho.​—Vhalani Mateo 7:13-23.

3. Ni nga ṱalula hani vhagwadameli vha ngoho?

Ṱhogomelani zwithu zwiṱanu zwi tevhelaho zwine zwa vha ṱalula:

  • Vhagwadameli vha ngoho vha ṱhonifha Bivhili ngauri ndi Ipfi ḽa Mudzimu. Vha lwela u tshila nga maitele ayo. Nga zwenezwo, vhurereli ha ngoho ho fhambana na vhurereli ho thewaho kha mihumbulo ya vhathu. (Mateo 15:7-9) Vhagwadameli vha ngoho vha tshila u tendelana na zwine vha zwi funza.​—Vhalani Yohane 17:17; 2 Timotheo 3:16, 17.

  •   Vhatevheli vha ngoho vha Yesu vha hulisa dzina ḽa Mudzimu, ḽine ḽa vha Yehova. Yesu o hulisa dzina ḽa Mudzimu nga u ḽi ḓivhadza. O thusa vhathu uri vha ḓivhe Mudzimu na u vha funza u rabelela dzina ḽa Mudzimu uri ḽi khethwe. (Mateo 6:9) Hune na dzula hone, ndi vhufhio vhurereli vhune ha ḓivhadza dzina ḽa Mudzimu?​—Vhalani Yohane 17:26; Vha-Roma 10:13, 14.

  • Vhakriste vha ngoho vha huwelela nga ha Muvhuso wa Mudzimu. Mudzimu o rumela Yesu uri a huwelele mafhungo maḓifha a Muvhuso. Muvhuso wa Mudzimu ndi ḽone fulufhelo ḽi ḽoṱhe ḽa vhathu. Yesu o bvela phanḓa a tshi amba nga hawo u swikela a tshi fa. (Luka 4:43; 8:1; 23:42, 43) O amba uri vhatevheli vhawe vha fanela u huwelela nga hawo. Arali ha ḓa muthu a amba na inwi nga Muvhuso wa Mudzimu, kanzhi a nga vha e wa vhurereli vhufhio?​—Vhalani Mateo 24:14.

  • Vhatevheli vha Yesu a si vha ḽino shango ḽivhi. Ni nga vha ṱalula nga ṅwambo wa uri a vha sheli mulenzhe kha dzipolitiki kana nndwa dza tshitshavha. (Yohane 17:16; 18:36) Zwiṅwe hafhu, a vha edzisi maitele na mavhonele a shango a re na khombo.​—Vhalani Yakobo 4:4.

  • Vhakriste vha ngoho vha funana nga nḓila i swayeaho. Ipfi ḽa Mudzimu ḽo vha gudisa uri vha ṱhonifhe vhathu vha tshaka dzoṱhe. Naho kanzhi vhurereli ha mazwifhi ho tikedza nga ho khwaṱhaho nndwa dza dzitshaka, vhagwadameli vha ngoho a vha tendi u ita nga u ralo. (Mixa 4:1-4) Nṱhani hazwo, Vhakriste vha ngoho vha shumisa tshifhinga na thundu dzavho u itela u thusa na u ṱuṱuwedza vhaṅwe.​—Vhalani Yohane 13:34, 35; 1 Yohane 4:20.

4. Naa ni nga ṱalula vhurereli ha ngoho?

Ndi vhufhio vhurereli vhune ha thea pfunzo dzaho dzoṱhe Ipfini ḽa Mudzimu, vhune ha hulisa dzina ḽa Mudzimu na u ḓivhadza uri Muvhuso wa Mudzimu ndi ḽone fulufhelo ḽi ḽoṱhe ḽa vhathu? Ndi tshifhio tshigwada tshine tsha funana, tshine tshi si tikedze nndwa? Ni nga ri mini?​—Vhalani 1 Yohane 3:10-12.