Pfukelani kha mafhungo

Pfukelani kha zwi re ngomu

 NDIMA YA VHUVHILI

“O Tshimbila Na Mudzimu Wa Ngoho”

“O Tshimbila Na Mudzimu Wa Ngoho”

1, 2. Noaxe na muṱa wawe vho ita mushumo ufhio nahone ndi dzifhio khaedu dze vha sedzana nadzo?

NOAXE u a ḓionyolosa, a onyolosa na misipha yawe i remaho. Nga maṱo a muhumbulo, edzani u mu vhona o dzula kha danda, o awela samusi o vha a tshi khou shuma nahone o lavhelesa gungwa. Ho vha hu tshi khou nukha tshigonṱiri tshi fhisaho; hu tshi khou pfala mibvumo ya zwishumiswa zwa u vhaḓa thanda. He Noaxe a vha o dzula hone, o vha a tshi kona u vhona vharwa vhawe vha tshi khou shuma vhukuma, vha tshi khou ombela matanda a gungwa. Vharwa vhawe, vhafumakadzi vhavho na mufumakadzi wawe a funwaho, vho vha vho no fhedza mahumi a miṅwaha vha tshi khou ita wonoyo mushumo nae. Vho vha vho no ita mushumo munzhi, fhedzi vho vha vha tshee kule na u fhedza!

2 Vhathu vha honoho vhupo vho vha vha tshi humbula uri wonoyo muṱa woṱhe ndi wa matsilu. Musi gungwa ḽi tshi bvela phanḓa u fhaṱiwa, vhathu vha tou ṋaṋa u fa nga zwiseo musi vha tshi pfa uri hu ḓo ḓa maḓi mahulu a ḓadza ḽifhasi ḽoṱhe. Khombo ye Noaxe a dzulela u vha sevha nga hayo yo vhonala i tshi nga i nga si vhuye ya itea, nahone zwi vhutsilu u humbula nga hayo! Vho vha vha sa pfesesi uri zwi ḓa hani uri onoyo munna a tambise vhutshilo hawe—na ha muṱa wawe—a tshi khou ita wonoyu mushumo wa vhutsilu. Naho zwo ralo, Yehova, Mudzimu wa Noaxe, ho ngo mu dzhia e tsilu.

3. Noaxe o tshimbila na Mudzimu nga muhumbulo ufhio?

3 Ipfi ḽa Mudzimu ḽi ri: “Noaxe o tshimbila na Mudzimu wa ngoho.” (Vhalani Genesi 6:9, NW.) Zwenezwo zwo vha zwi tshi amba mini? Zwo vha zwi sa ambi uri Mudzimu o tshimbila kha ḽifhasi kana uri Noaxe o gonya ṱaḓulu. Nṱhani hazwo, Noaxe o thetshelesa Mudzimu wawe nga vhuronwane nahone a mu funa nga mbilu yoṱhe, zwa tou nga ene na Yehova vho tshimbila vhoṱhe sa dzikhonani. Nga murahu ha miṅwaha ya zwigidi, Bivhili yo amba zwi tevhelaho nga ha Noaxe: ‘Nga lutendo lwawe o vhona shango mulandu.’ (Vhaheb. 11:7) O zwi itisa hani zwenezwo? Ri nga guda mini kha lutendo lwawe ṋamusi?

Munna Muvhuya Shangoni Ḽivhi

4, 5. Vhuvhi ha shango ho ṋaṋa hani vhu tshi ya misini ya Noaxe?

4 Noaxe o alutshela shangoni ḽe vhuvhi haḽo ha tou ṋaṋa vhu tshi ya. Ḽo vha ḽi ḽivhi na misini ya makhulukuku wawe Henoxe, muṅwe munna o  lugaho we a tshimbila na Mudzimu. Henoxe o vha o dzula o amba uri ḓuvha ḽa khaṱulo ḽi ḓo ḓela vhathu vha shango vha sa ofhi Mudzimu. Zwino, tshifhingani tsha Noaxe, vhuvhi ho vha ho no tou ḓiṋea maanḓa tshoṱhe. Zwi re zwone ndi uri u ya nga mavhonele a Yehova, shango ḽo vha ḽo tshinyala nga uri ḽo vha ḽo ḓala vhuvhi. (Gen. 5:22; 6:11; Yuda 14, 15) Ndi mini zwe zwa ṋaṋisa honoho vhuimo?

5 Ho vha na makhaulambilu mahulwane vhukati ha vharuṅwa, vhane vha vha vhana vha Mudzimu vha muya. Muṅwe wavho o vha o no ḓi shandukela Yehova, a vha Sathane Diabolo nge a remba Mudzimu na u fhura Adamu na Eva uri vha ite tshivhi. Misini ya Noaxe, vhaṅwe vharuṅwa vho thoma u vutshela vhuvhusi ho lugaho ha Yehova. Vho ṱutshela vhuimo havho ngei ṱaḓulu he vha ṋewa nga Mudzimu, vha ḓa kha ḽifhasi, vha ḓishandula vha vha vhathu nahone vha vhinga vhafumakadzi vha lunako. Vhenevho vharuṅwa vha ḓikukumusaho, vha mashandukwa vha re na tseḓa, vho vha vhe na ṱhuṱhuwedzo i re na khombo kha vhathu.—Gen. 6:1, 2; Yuda 6, 7.

6. Vhanefilimu vho shandula hani zwiimo zwa shango nahone Yehova a phetha u ita mini?

6 Zwiṅwe hafhu, vhudzekani vhu si ha nzulele vhukati ha vharuṅwa vho ambaraho mivhili ya vhathu na vhafumakadzi vha ṋama, ho bveledza vhana vhalapfu vha miswonḓa. Bivhili i vha vhidza Vhanefilimu, zwine nga thevhedzaipfi zwa amba “Vhawisi”—vhane vha wisa vhaṅwe. Vhanefilimu vhane vha vha khunzi dzi re na tshiṱuhu, vho ita uri shangoni hu ḓale vhuvemu na muya wa u sa ofha Mudzimu. Ndi ngazwo u ya nga Musiki, “vhuvhi ha vhathu hó anda fhano shangoni, zwoṱhe zwiito na mihumbulo yavho zwí zwivhi fhedzi misi yoṱhe.” Yehova a phetha u fhelisa vhenevho vhathu vhavhi nga miṅwaha ya 120.—Vhalani Genesi 6:3-5.

7. Noaxe na mufumakadzi wawe vho sedzana na khaedu ifhio musi vha tshi tsireledza vharwa vhavho kha ṱhuṱhuwedzo mmbi dza misini yeneyo?

7 Edzani u humbula uri zwo vha zwi tshi konḓa lungafhani u alusa  vhana shangoni ḽo raloho! Fhedzi, Noaxe o zwi kona. O vhinga mufumakadzi wavhuḓi. Musi Noaxe e na miṅwaha ya 500, mufumakadzi wawe o mu bebela vharwa vhararu—Semu, Hamu na Yafete. * Ene na mufumakadzi wawe vho tsireledza vhatukana vhavho kha ṱhuṱhuwedzo mmbi dza vhathu vhe vha vha vha tshi dzula navho. Vhatukana vhaṱuku vha anzela u mangadzwa na u tama “vhahali” na “vhanna vha re na madzina”—nahone zwi nga kha ḓi itea uri vho vha vha tshi takadzwa nga Vhanefilimu samusi vho vha vhe vhathu vho raloho. Noaxe na mufumakadzi wawe vho vha vha nga si kone u thivhela vhana vhavho uri vha si pfe mivhigo ya magundo a yeneyo miswonḓa, fhedzi vho vha vha tshi nga kona u vha funza ngoho nga ha Yehova Mudzimu, ane a vhenga vhuvhi hoṱhe. Vho vha vha tshi fanela u thusa vhatukana vhavho u vhona uri Yehova u pfiswa vhuṱungu nga vhuvemu na vhushandukwa vhu re shangoni.—Gen. 6:6.

Noaxe na mufumakadzi wawe vho vha vho tea u tsireledza vhana vhavho kha ṱhuṱhuwedzo mmbi

8. Vhabebi vha re na vhuṱali vha nga edzisa hani tsumbo ya Noaxe na mufumakadzi wawe?

8 Ṋamusi vhabebi vha nga pfesesa vhuimo he Noaxe na mufumakadzi wawe vha vha vho sedzana naho. Na shango ḽashu ḽo ḓala vhuvemu na vhushandukwa. Kanzhi ḓorobo dzi langwa nga zwigwada zwa vhaswa vha mahwarahwara. Na vhuḓimvumvusi ho itelwaho vhana vhaṱuku vhu nga vha ho ḓala vhuvemu. Vhabebi vha re na vhuṱali vha ita zwoṱhe zwi re maanḓani avho u itela u lwisana na dzenedzo ṱhuṱhuwedzo nga u gudisa vhana vhavho nga ha Yehova, Mudzimu wa mulalo, ane ḽiṅwe ḓuvha a ḓo fhelisa vhuvemu hoṱhe. (Ps. 11:5; 37:10, 11) Vha nga bvelela! Noaxe na mufumakadzi wawe vho bvelela. Vhatukana vhavho vho aluwa vha vha vhanna vhavhuḓi nahone vha vhinga vhafumakadzi vhe na vhone vha vha vho ḓiimisela u ita uri Yehova, Mudzimu wa ngoho, a ḓe u thoma vhutshiloni havho.

“Ḓi-Itele Gungwa”

9, 10. (a) Ndi ndaela ifhio ya Yehova ye ya shandula vhutshilo ya Noaxe? (b) Yehova o dzumbululela Noaxe mini nga ha kufhaṱele na ndivho ya gungwa?

9 Ḽiṅwe ḓuvha vhutshilo ha Noaxe ha shanduka lwa tshoṱhe. Yehova a amba na onoyo mushumeli ane a mu funa nahone a mu vhudza uri o livha u fhelisa shango ḽa tshenetsho tshifhinga. Mudzimu a vhudza Noaxe a ri: “Hone iwe ḓi-itele gungwa nga thanda dza muṱaululo.”—Gen. 6:14.

10 Ḽeneḽi gungwa ḽo vha ḽi si tshikepe tsho ḓoweleaho, samusi vhaṅwe vha tshi humbula nga u ralo. Ḽo vha ḽi si na ningo kana mutshila u fana na zwikepe zwo ḓoweleaho kana thanda dzine dza ḽi livhisa—ḽo vha ḽi sa ngi tshikepe. Ḽo vha ḽi tshi sokou vha bogisi ḽihulwane. Yehova o ṋea Noaxe mielo yo livhaho ya u fhaṱa gungwa, a mu ṋea na zwiṅwe zwidodombedzwa malugana na tshivhumbeo tshaḽo na vhulivhisi ha u ḽi ḓodza tshigonṱiri ngomu na nnḓa. A vhudza Noaxe tshiitisi a ri: “Nṋe ndi ḓo ḓisa maḓi mahulu kha shango heḽi . . . Zwoṱhe zwi re kha shango zwi ḓo lovha.” Naho zwo ralo, Yehova a vhofha hoyu mulanga kana u ita thendelano i tevhelaho na Noaxe: “Dzhena gungwani na vharwa vhau, na musadzi wau, na  vhasadzi vha vharwa vhau vha dzhene na iwe.” Zwiṅwe hafhu, Noaxe o vha a tshi tea u dzhena na zwipuka zwa mifuda yoṱhe. Ho vha hu tshi ḓo ponyoka fhedzi zwi re gungwani musi hu tshi ḓa Maḓi Mahulu!—Gen. 6:17-20.

Noaxe na muṱa wawe vho farisana u itela u khunyeledza ndaela dza Mudzimu

11, 12. Noaxe o vha o sedzana na mushumo ufhio u si na vhukono, nahone o kunda hani yeneyo khaedu?

11 Noaxe o vha o sedzana na mushumo u si na vhukono. Ḽeneḽi gungwa ḽo vha ḽi tshi tea u vha ḽihulwane vhukuma—vhulapfu ha mithara dza 133, vhuphara ha mithara dza 22, na vhunṱha ha mithara dza 13. Ḽo vha ḽi ḽihulwane u fhira mudavhi wa u tamba bola. Naa Noaxe o hana u ita wonoyo mushumo, a gungula nga nṱhani ha khaedu dze a vha a tshi ḓo sedzana nadzo, kana a shandula zwidodombedzwa zwe a ṋewa u itela u ḓileludzela mushumo? Bivhili i a fhindula: “Noaxe a ita zwoṱhe zwe Mudzimu a mu laya, a tevhedza he a laiwa ngaho.”—Gen. 6:22.

12 Mushumo wa u fhaṱa gungwa wo dzhia mahumi a miṅwaha, khamusi miṅwaha ya 40 u ya kha ya 50. Vho vha vha tshi tea u rema miri, u hwala madanda na u a vhaḓa uri a vhe mapala nahone nga murahu vha a ṱanganye. Gungwa ḽo vha ḽi tshi tea u vha na zwipiḓa zwiraru u ya nṱha, kamara dzo vhalaho na vothi nga thungo. Zwi vhonala uri ho vha hu na mafasiṱere nṱha, khathihi na ṱhanga i re na ṱhodzi yo ḓodzwaho tshigonṱiri u itela uri maḓi a kone u elela.—Gen. 6:14-16.

13. Ndi sia ḽifhio ḽa mushumo wa Noaxe ḽe ḽa vha ḽi tshi nga vha ḽo vha khaedu khulwane u fhira u fhaṱa gungwa, nahone vhathu vho aravha hani?

13 Musi miṅwaha i tshi khou ḓi ṱanḓulukana i tshi ya, nahone tshivhumbeo tsha gungwa tshi tshi vho thoma u vhonala, Noaxe u tea u vha o takala vhukuma musi a tshi tikedzwa nga muṱa wawe! Ho vha hu na ḽiṅwe sia ḽa mushumo ḽe khamusi ḽa vha ḽi khaedu khulwane u fhira u fhaṱa gungwa. Bivhili i ri vhudza uri Noaxe o vha a tshi “huwelela nga ha u luga.” (Vhalani 2 Petro 2:5.) Nga zwenezwo, o ranga phanḓa nga tshivhindi kha u lingedza u sevha vhenevho vhathu vhavhi, vha sa ofhi Mudzimu nga ha khombo ye ya vha i tshi khou vha ḓela. Vho aravha hani? Nga murahu Yesu Kristo o humbula tshenetsho tshifhinga, a amba uri vhenevho vhathu “a vho ngo ṱhogomela tshithu.” O amba uri vho vha vho farakanea vhukuma nga mishumo ya ḓuvha ḽiṅwe na ḽiṅwe—vha tshi ḽa, vha tshi nwa, vha tshi vhinga kana u vhingwa—lwe vha si thetshelese tsevho ya Noaxe. (Mat. 24:37-39) A zwi timatimisi uri vhanzhi vho mu goḓa khathihi na muṱa wawe; vhaṅwe vha nga vha vho mu tshuwisa na u mu pikisa lwa tshiṱuhu. Vha nga vha vho lingedza na u thithisa mushumo wa u fhaṱa.

Hu sa londwi vhuṱanzi vhu sumbedzaho uri Noaxe u khou fhaṱutshedzwa nga Mudzimu, vhathu vho mu goḓa nahone vha nyadza mulaedza wawe

14. Miṱa ya Vhakriste ṋamusi i nga guda mini kha tsumbo ya Noaxe na muṱa wawe?

14 Naho zwo ralo, Noaxe na muṱa wawe a vho ngo vhuya vha litsha u ita mushumo wavho. Naho vho vha vha tshi dzula shangoni ḽe ḽa vha ḽo ḓiimisela u ita uri mushumo wavho muhulwane vhutshiloni u vhonale u si wa ndeme, u vhudodo kana vhutsilu, vho ḓi bvela phanḓa vha tshi shuma nga u fulufhedzea. Nga zwenezwo, miṱa ya Vhakriste ṋamusi i nga guda zwinzhi kha lutendo lwa Noaxe na muṱa wawe. Hafhu ri khou tshila tshifhingani tshine Bivhili ya tshi vhidza ‘maḓuvha a vhufhelo’ a ano maitele a zwithu. (2 Tim. 3:1) Yesu o amba uri tshifhinga tshashu tshi ḓo fana na  tshifhinga tshee Noaxe a fhaṱa ngatsho gungwa. Arali vhathu vha nyala mulaedza wa Muvhuso wa Mudzimu, vha u holedza kana vha tovhola Vhakriste, zwi ḓo vha zwavhuḓi uri Vhakriste vha humbule Noaxe. A si vhone vha u thoma u ṱangana na khaedu dzi fanaho na dzenedzi.

“Dzhena-ha Gungwani”

15. Noaxe o xelelwa nga mini musi a tshi vho fara miṅwaha ya 600?

15 Ho fhela mahumi a miṅwaha nahone nga zwiṱuku nga zwiṱuku zwa thoma u vhonala uri gungwa ḽi tsini na u fhela. Musi Noaxe a tshi vho fara miṅwaha ya 600, a felwa nga vhane a vha funa. Khotsi awe Lamexe, o mbo ḓi fa. * Nga murahu ha miṅwaha miṱanu, makhulu wawe ane pfi Methusala, ane a vha khotsi a Lamexe, a fa e na miṅwaha ya 969—ndi ene muthu o tshilaho tshifhinga tshilapfu u fhira vhathu vhoṱhe vhe vha bulwa Bivhilini. (Gen. 5:27) Methusala na Lamexe vho vha vhe murafho muthihi na Adamu, munna wa u thoma.

16, 17. (a) Ndi mulaedza ufhio muswa we Noaxe a u wana ṅwahani wawe wa vhu-600? (b) Ṱalusani zwithu zwi sa hangwei zwe zwa vhonwa nga Noaxe na muṱa wawe.

16 Nga ṅwaha wawe wa vhu-600, musimulalushaka Noaxe o wana mulaedza u bvaho ha Yehova Mudzimu une wa ri: “Dzhena-ha gungwani na vhoṱhe vha muṱani wau.” Nga tshenetsho tshifhinga, Mudzimu o vhudza Noaxe uri a dzhenise zwifuwo zwa mifuda yoṱhe gungwani—nga zwiṱanu na zwivhili kha zwo kunaho, zwine zwa nga shumiselwa tshiṱhavhelo nahone zwiṅwe zwi dzhene nga zwivhili nga zwivhili.—Gen. 7:1-3.

 17 Zwenezwi zwi nga vha zwo vha zwi tshiitea tshi sa hangwei. Ha dzhena zwipuka zwinzhi-zwinzhi zwo tou dubekana—zwi tshi tou tshimbila, u fhufha, u kokovha, u kandela tsini, u sunyaila—zwa zwivhumbeo zwoṱhe zwo fhamba-fhambanaho, zwi ofhisaho na zwi sa ofhisi. A ro ngo fanela u zwi dzhia uri Noaxe o lingedza u swogedzela, u kuvhanganya, u pingeledza kana u khadela zwenezwo zwipuka zwoṱhe zwa ḓaka uri zwi dzhene fhethu he a zwi dzudzanyela hone gungwani. Mafhungo a ri ‘zwo ya kha Noaxe’ nga ngomu gungwani.—Gen. 7:9.

18, 19. (a) Ri nga kona hani u fhindula mbudziso dzine vhadzia-u-timatima vha dzi vhudzisa nga ha zwiitea zwa mafhungo a Noaxe? (b) Ri vhona hani vhuṱali ha Yehova nga nḓila ye a khetha ngayo u tshidza zwipuka zwawe?

18 Vhadzia-u-timatima vha nga kha ḓi vhudzisa uri: ‘Zwithu zwo raloho zwo itea hani? Zwenezwo zwipuka zwoṱhe zwo kona hani u dzula nga mulalo henefho fhethu huṱuku?’ Ṱhogomelani hezwi: Naa zwi nga kunda Musiki wa fhethu hoṱhe a re na maanḓa, u langa zwipuka zwe a tou zwi sika, na u zwi ita uri zwi langee arali zwi tshi ṱoḓea? Ni songo hangwa uri Yehova ndi Mudzimu we a sika zwipuka. Miṅwaha minzhi nga murahu ha tshenetsho tshiitea, o fhandekanya Lwanzhe Lutswuku na u imisa ḓuvha. Naa a nga kundwa u ita zwithu zwoṱhe zwo ṱaluswaho kha mafhungo a Noaxe? A nga si kundwe, nahone o zwi ita zwenezwo zwithu!

19 Ndi ngoho uri Mudzimu o vha a tshi nga vha o khetha iṅwe nḓila u itela u tshidza zwipuka zwe a zwi sika. Naho zwo ralo, nga vhuṱali o khetha nḓila ine ya ri humbudza uri u bva mathomoni, o vha o ṋea vhathu vhuḓifhinduleli ha u ṱhogomela zwithu zwoṱhe zwi tshilaho kha ḽino ḽifhasi. (Gen. 1:28) Nga zwenezwo, vhabebi vhanzhi ṋamusi vha shumisa mafhungo a Noaxe u itela u gudisa vhana vhavho uri Yehova u dzhiela nṱha zwipuka na vhathu vhe a vha sika.

20. Noaxe na muṱa wawe vha tea u vha vho farakanea nga u ita mini musi ho sala vhege uri Maḓi Mahulu a ḓe?

 20 Yehova o vhudza Noaxe uri ho sala vhege uri Maḓi Mahulu a ḓe. Wonoyo muṱa u tea u vha wo farakanea vhukuma nga tshenetsho tshifhinga. Edzani u humbula mushumo wa u dzhenisa zwipuka zwoṱhe na zwiḽiwa zwazwo gungwani na u dzudzanya muṱa na u dzhenisa thundu dzoṱhe dzawo ngomu gungwani. Mufumakadzi wa Noaxe na mufumakadzi wa Semu, Hamu, na Yafete vha nga vha vho vha vho farakanea vhukuma nga u ita uri gungwani hu dzudzanyee u fana na hayani.

21, 22. (a) Ndi ngani ri songo tea u mangadzwa nga u sa londa ha vhathu vha misini ya Noaxe? (b) U goḓiwa ha Noaxe na muṱa wawe nga vhahura vhawe ho guma lini?

21 Hu pfi mini nga ha vhathu vha henefho? Vho ḓi bvela phanḓa vha sa ‘ṱhogomeli’—naho ho vha hu na vhuṱanzi vhunzhi ha uri Yehova o vha a tshi khou fhaṱutshedza Noaxe na mushumo wawe. Vho vhona zwipuka zwo dubekana zwi tshi khou dzhena gungwani. Fhedzi ri songo mangadzwa nga u sa londa havho zwe zwa vha zwi tshi khou itea. Na ṋamusi vhathu a vha ṱhogomeli vhuṱanzi vhunzhi ha uri zwino ri khou tshila maḓuvhani a vhufhelo ha ano maitele a zwithu. Samusi muapostola Petro o dzula o amba, ho ḓa vhagoḓi nga zwigoḓo zwavho, vha tshi goḓa vhane vha dzhiela nṱha tsevho ya Mudzimu. (Vhalani 2 Petro 3:3-6.) Nga hu fanaho, a zwi timatimisi uri vhathu vho goḓa Noaxe na muṱa wawe.

22 Honoho u goḓa ho guma lini? Mafhungo a ri vhudza uri musi Noaxe o no dzhenisa muṱa wawe na zwipuka ngomu gungwani, “Yehova a vala muṋango.” Arali vhagoḓi vho vha vhe henefho tsini, a zwi timatimisi uri honoho vhukando ho dzhiiwaho nga Mudzimu ho vha fhumudza. Arali vhu songo vha fhumudza, mvula yo vha fhumudza—ngauri yo na vhukuma! Yo vha i mvula ya mibvumbi—ya ḓadza shango ḽoṱhe samusi Yehova o amba.—Gen. 7:16-21.

23. (a) Ri zwi ḓivha hani uri Yehova ho ngo takadzwa nga lufu lwa vhaitazwivhi misini ya Noaxe? (b) Ndi ngani zwi vhuṱali u edzisa lutendo lwa Noaxe ṋamusi?

23 Naa Yehova o takadzwa nga lufu lwa vhenevho vhaitazwivhi? Hai! (Hesek. 33:11) O vha o vha ṋea tshibuli tsha uri vha shandule nḓila dzavho uri vha ite zwo lugaho. Naa vho vha vha tshi nga vha vho kona u ita zwenezwo? Phindulo ya yeneyo mbudziso ri i wana kha nḓila ye Noaxe a tshila ngayo. Nge Noaxe a tshimbila na Yehova, a thetshelesa Mudzimu kha zwoṱhe, o sumbedza uri vho vha vha tshi nga vha vho ponyoka. Nga wonoyo muhumbulo, o vhona shango ḽa misini yawe mulandu nga lutendo lwawe; lwo bvukulula vhuvhi ha murafho wa misini yawe. Lutendo lwawe lwo tsireledza ene na muṱa wawe. Arali na edzisa lutendo lwa Noaxe, na inwi ni ḓo ḓitsireledza na tsireledza na vhane na vha funa. U fana na Noaxe, ni nga tshimbila na Yehova Mudzimu zwa tou nga ni khou tshimbila na khonani yaṋu. Honoho vhushaka vhu nga vha ha lini na lini!

^ phar. 7 Vhathu vha misini yeneyo vho vha vha tshi tshila miṅwaha minzhi u fhira riṋe ṋamusi. Zwi vhonala uri u lalama havho ho itiswa nga uri vho vha vha tshee tsini na u fhelela he Adamu na Eva vha vha vhe naho, fhedzi vha hu xedza nahone vha si tsha vha na nungo.

^ phar. 15 Lamexe o ira murwa wawe Noaxe—zwine khamusi zwa amba “Awela” kana “Phumudzo”—nahone o vha o porofita uri Noaxe u ḓo khunyeledza zwine dzina ḽawe ḽa amba zwone nga u livhisa vhathu kha vhuawelo ha u shumesa mavuni o semiwaho. (Gen. 5:28, 29) Lamexe ho ngo tshila u swika honoho vhuporofita vhu tshi khunyelela. Mme a Noaxe, vharathu na khaladzi dzawe vha nga vha vho fheliswa nga Maḓi Mahulu.