Pfukelani kha mafhungo

Pfukelani kha zwi re ngomu

 Ngudo 12

Hu Itea Mini Lufuni?

Hu Itea Mini Lufuni?

Lufu ndi phambano ya vhutshilo. Lufu lu tou nga khofhe khulu. (Yohane 11:11-14) Vhafu a vha koni u pfa, u vhona, u amba, kana u humbula tshithu. (Muhuweleli 9:5, 10) Vhurereli ha mazwifhi vhu funza uri vhafu vha ya shangoni ḽa muya u yo tshila na vhomakhulukuku vhavho. Hezwi a si zwine Bivhili ya zwi funza.

Vho faho vha nga si kone u ri thusa, nahone vha nga si kone u ri huvhadza. Zwo ḓowelea kha vhathu u ita mikhuvha na zwiṱhavhelo zwine vha tenda uri zwi ḓo takadza vho faho. Hezwi a zwi takadzi Mudzimu ngauri zwo thewa kha mazwifhi a Sathane. Zwi nga si kone u takadza vho faho, samusi vha si tsha tshila. A ro ngo fanela u ofha kana u gwadamela vho faho. Ri fanela u gwadamela Mudzimu fhedzi.​—Mateo 4:10.

Vhafu vha ḓo dovha vha tshila. Yehova u ḓo vusa vho faho vha tshila paradisoni kha ḽifhasi. Tshenetsho tshifhinga tshi kha ḓi ḓo ḓa. (Yohane 5:28, 29; Mishumo 24:15) Mudzimu u ḓo vusa vho faho u fana na musi ni tshi vusa muthu o eḓelaho.​—Marko 5:22, 23, 41, 42.

Muhumbulo wa uri a ri fi ndi mazwifhi o phaḓaladzwaho nga Sathane Diabolo. Sathane na madimoni awe vha ita uri vhathu vha humbule uri yeneyo mimuya ya vhafu i a tshila nahone i itela vhathu malwadze na vhuṅwe vhuleme. Sathane u fhura vhathu, nga zwiṅwe zwifhinga a tshi shumisa miloro na mabono. Yehova u sasaladza vhane vha lingedza u amba na vhafu.​—Doiteronomio 18:10-12.