Pfukelani kha mafhungo

Pfukelani kha zwi re ngomu

 Ngudo 11

Hanani Vhurereli Ha Mazwifhi!

Hanani Vhurereli Ha Mazwifhi!

Sathane na madimoni awe a vha ṱoḓi ni tshi shumela Mudzimu. Vha ṱoḓa u khelusa muṅwe na muṅwe kha Mudzimu arali vha tshi nga kona. Vha lingedza hani u ita zwenezwi? Iṅwe nḓila ndi nga u shumisa vhurereli ha mazwifhi. (2 Vha-Korinta 11:13-15) Vhurereli ndi ha mazwifhi arali vhu sa funzi mafhungo-ngoho a Bivhilini. Vhurereli ha mazwifhi vhu fana na tshelede ya vhufhura​—i nga vhonala i ya vhukuma, fhedzi a i na ndeme. I nga ni dzhenisa khakhathini khulwane.

Vhurereli ha mazwifhi vhu nga si vhuye ha takadza Yehova, Mudzimu wa mafhungo-ngoho. Musi Yesu e kha ḽifhasi, ho vha na tshigwada tsha vhurereli tshe tsha ṱoḓa u mu vhulaha. Vho humbula uri nḓila ye vha vha vha tshi gwadamela ngayo yo vha yo luga. Vho ri: “Ri na khotsi-ashu, muthihi, ndi Mudzimu.” Naa Yesu o tenda? Na kathihi! O ri khavho: “Inwi ni bva ha khotsi-aṋu Diabolo.” (Yohane 8:41, 44) Ṋamusi vhathu vhanzhi vha humbula uri vha khou gwadamela Mudzimu, fhedzi vhukuma vha khou shumela Sathane na madimoni awe!​—1 Vha-Korinta 10:20.

 Samusi muri u si wavhuḓi u tshi aṋwa mitshelo mivhi, vhurereli ha mazwifhi vhu bveledza vhathu vhane vha ita zwivhi. Shango ḽo ḓala khakhathi nga ṅwambo wa zwithu zwivhi zwine vhathu vha zwi ita. Hu na u ḓifara luvhi, u lwa, u tswa, mitsiko, vhuvemu, na u tzhipiwa. Vhunzhi ha vhane vha ita zwenezwi zwithu zwivhi ndi vha vhurereli, fhedzi vhurereli havho a vhu vha sudzuluseli u ita zwo lugaho. Vha nga si vhe khonani dza Mudzimu arali vha sa litsha u ita zwithu zwivhi.​—Mateo 7:17, 18.

Vhurereli ha mazwifhi vhu funza vhathu u rabela zwifanyiso. Mudzimu uri ri songo rabela zwifanyiso. Zwenezwi zwi a pfala. Naa ni nga zwi takalela arali muṅwe muthu a sa vhuyi a amba na inwi, fhedzi a tshi amba na tshifanyiso tshaṋu? Naa onoyo muthu a nga vha khonani yaṋu ya vhukuma? Hai, a nga si vhe khonani ya vhukuma. Yehova u ṱoḓa vhathu vha tshi amba nae, hu si tshifanyiso tshi sa tshili.​—Ekisodo 20:4, 5.

Vhurereli ha mazwifhi vhu funza uri zwo luga u vhulaha vhaṅwe nndwani. Yesu o amba uri khonani dza Mudzimu dzi ḓo funana. A ri vhulahi vhathu vhane ra vha funa. (Yohane 13:35) Na u vhulaha vhathu vhavhi zwo khakhea. Musi maswina a Yesu a tshi ḓa u mu fara, ho ngo tenda uri vhafunziwa vhawe vha lwe u itela u mu tsireledza.​—Mateo 26:51, 52.

Vhurereli ha mazwifhi vhu funza uri vhathu vhavhi vha ḓo tambula muliloni wa hele. Naho zwo ralo, Bivhili i funza uri tshivhi tshi isa lufuni. (Vha-Roma 6:23) Yehova ndi Mudzimu wa lufuno. Naa Mudzimu wa lufuno a nga tambudza vhathu nga hu sa fheli? Vhukuma a nga si vha tambudze! Paradisoni, hu ḓo vha na vhurereli vhuthihi fhedzi, vhune Yehova a vhu ṱanganedza. (Ndzumbululo 15:4) Vhurereli hoṱhe ho thewaho kha mazwifhi a Sathane a vhu tsha ḓo vha hone.