Pfukelani kha mafhungo

Pfukelani kha zwi re ngomu

 NGUDO 8

Yosia O Vha E Na Khonani Dzavhuḓi

Yosia O Vha E Na Khonani Dzavhuḓi

Naa ni humbula uri zwi a konḓa u ita zwivhuya?— Vhathu vhanzhi vha humbula u nga zwi a konḓa. Bivhili i amba uri zwo vha zwi songo leluwa kha muṱhannga ane a pfi Yosia u ita zwo lugaho. Fhedzi o vha e na khonani dzavhuḓi dze dza mu thusa. Kha ri gude zwo engedzeaho nga ha Yosia na khonani dzawe.

Khotsi a Yosia ho vha hu Amoni, khosi ya Yuda. Amoni o vha e muthu muvhi nahone a tshi rabela zwifanyiso. Musi khotsi a Yosia vha tshi fa, Yosia o mbo ḓi vha khosi ya Yuda. Fhedzi o vha e na miṅwaha ya malo! Naa ni humbula uri o vha e muthu muvhi u fana na khotsi awe?— Hai, o vha e si muvhi!

Tsefanya o kaidza vhathu uri vha si gwadamele midzimu i sili

Na musi a tshee muṱuku-ṱuku, Yosia o vha a tshi ṱoḓa u takadza Yehova. Ngauralo a khetha khonani kha vhathu vhane vha funa Yehova. Nahone vho thusa Yosia uri a ite zwo lugaho. Dziṅwe khonani dza Yosia ho vha hu vho nnyi?

Muṅwe wa dzikhonani dza Yosia o vha e Tsefanya. Tsefanya o vha e muporofita ane a kaidza vhathu vha Yuda uri arali vha sa litsha  u rabela zwifanyiso ho vha hu tshi ḓo itea zwithu zwi si zwavhuḓi khavho. Yosia o thetshelesa Tsefanya nahone a rabela Yehova, hu si zwifanyiso.

Iṅwe ya khonani dza Yosia ho vha hu Yeremia. O vha a tshi ṱoḓa u lingana nga miṅwaha na Yosia, nahone vho aluwa vha tshi dzula tsini na tsini. Vho vha vhe na vhukonani havhuḓi, ndi ngazwo musi Yosia a tshi fa, Yeremia o ṅwala luimbo nga ha nḓila ye a ṱuvha ngayo Yosia. Yeremia na Yosia vho thusana kha u ita zwivhuya na u thetshelesa Yehova.

Yosia na Yeremia vho thusana u ita zwo lugaho

Ni nga guda mini kha tsumbo ya Yosia?— Musi Yosia a tshee muṱuku, o vha a tshi ṱoḓa u ita zwo lugaho. O vha a tshi zwi ḓivha uri u fanela u vha na khonani dzine dza funa Yehova. Itani uri ni khethe khonani dzine dza funa Yehova nahone dzine dza ni thusa u ita zwo lugaho!

VHALANI BIVHILINI YAṊU