Pfukelani kha mafhungo

Pfukelani kha zwi re ngomu

 NGUDO 5

Samuele O Bvela Phanḓa A Tshi Ita Zwo Lugaho

Samuele O Bvela Phanḓa A Tshi Ita Zwo Lugaho

U bva musi Samuele a tshe muṱuku-ṱuku, o vha a tshi dzula na u shuma nḓuni ya mulanga, fhethu he vhathu vha vha vha tshi gwadamela hone Yehova. Naa ni a ḓivha uri zwo ḓa hani uri Samuele a dzule nḓuni ya mulanga? Kha ri thome nga u guda nga ha Hanna, mme a Samuele.

Naho Hanna o vha a tshi ṱoḓa ṅwana nga mbilu yoṱhe, o fhedza tshifhinga tshilapfu a sa mu wani. Ngauralo o rabela kha Yehova nahone a humbela uri a mu thuse. O fulufhedzisa uri arali a nga vha na ṅwana, u ḓo mu isa nḓuni ya mulanga uri a shume a tshi khou dzula henefho. Yehova o fhindula thabelo yawe, nahone a vha na ṅwana wa mutukana. A mu ira dzina ḽa Samuele. Samusi Hanna o vha o fulufhedzisa, musi Samuele e na miṅwaha miraru kana miṋa, o mu isa nḓuni ya mulanga uri a shumele Mudzimu e henefho.

Eli o vha e tshifhe muhulu nḓuni ya mulanga. Na vhana vhawe vhavhili vha vhatukana vho vha vha tshi shuma henefho. Humbulani, nnḓu ya mulanga yo vha i ya Yehova hune vhathu vha mu gwadamela hone. Nahone vhathu vho vha vho fanela u ita zwithu zwo lugaho henefho. Fhedzi vhana vha Eli vho vha vha tshi ita zwithu zwivhi vhukuma. Samuele o vhona zwe vha vha vha tshi ita. Naa Samuele o ita zwithu zwivhi u fana na vhana vha Eli?— Hai, o bvela phanḓa a tshi ita zwo lugaho, samusi vhabebi vhawe vho mu funza u ita ngauralo.

Ni humbula uri ndi mini zwe Eli a vha o tea o zwi ita kha vhatukana vhawe vhavhili?— O vha o tea u vha ṱarafa na u ita uri vha si tsha shuma nḓuni ya Mudzimu na luthihi. Fhedzi Eli ha ngo zwi ita, ngauralo Yehova a mu sinyutshela na vhana vhawe. Yehova o phetha nga u vha ṱarafa.

Samuele o vhudza Eli mulaedza u bvaho ha Yehova

Ḽiṅwe ḓuvha nga madekwana Samuele o eḓela, o pfa muṅwe muthu a tshi khou mu vhidzelela a tshi ri: ‘Samuele!’ A gidimela kha Eli, fhedzi Eli a ri: ‘A thi ngo u vhidza.’ Zwa dovha zwa itea lwa vhuvhili. Nga murahu ha musi zwo no itea lwa vhuraru, Eli a vhudza Samuele uri arali a dovha a pfa ipfi, u fanela u fhindula a ri: ‘Nga khumbelo Yehova, amba ndo thetshelesa.’ Samuele a ita ngauralo.  Nga zwenezwo Yehova amba na Samuele a ri: ‘Vhudza Eli na vha muṱa wawe uri ndi ḓo vha ṱarafela zwithu zwoṱhe zwivhi zwe vha zwi ita.’ Naa ni humbula u nga zwo vha zwo leluwa uri Samuele a vhudze Eli wonoyo mulaedza?— Hai, zwo vha zwi songo leluwa. Fhedzi naho Samuele o vha a tshi khou shavha u mu vhudza, o fhedza o ita zwe a vhudzwa nga Yehova. Zwe Yehova a amba zwo fhedza zwo itea. Vhana vha Eli vhavhili vha vhatukana vho vhulahwa, nahone Eli a fa.

Samuele ndi tsumbo yavhuḓi kha riṋe. O ita zwo lugaho naho o vhona vhaṅwe vhathu vha tshi khou ita zwivhi. Hupfi mini nga inwi? Naa ni ḓo edzisa Samuele nahone na ita zwo lugaho? Arali na ita ngauralo, ni ḓo takadza Yehova na vhabebi vhaṋu.

VHALANI BIVHILINI YAṊU