Pfukelani kha mafhungo

Pfukelani kha zwi re ngomu

 NGUDO 6

Davida O Vha A Sa Ofhi

Davida O Vha A Sa Ofhi

Ndi mini zwine na zwi ita musi no tshuwa?— Khamusi ni ya kha mme aṋu kana khotsi aṋu uri vha ni thuse. Fhedzi hu na muṅwe muthu ane a nga ni thusa na inwi. U na maanḓa u fhira vhathu vhoṱhe. Naa ni a ḓivha uri ndi nnyi?— Ee, ndi Yehova Mudzimu. Kha ri ambe nga ha muṅwe muṱhannga a re Bivhilini ane a pfi Davida. O vha tshi ḓivha uri Yehova u ḓo dzula a tshi mu thusa, ngauralo o vha sa ofhi.

U bva musi Davida a tshe muṱuku, vhabebi vhawe vho mu funza u funa Yehova. Hezwi zwo thusa Davida uri a si ofhe musi a tshi ṱangana na zwithu zwi ofhisaho. O vha a tshi ḓivha uri Yehova ndi Khonani yawe na uri u ḓo mu thusa. Ḽiṅwe ḓuvha, musi Davida a tshi khou ṱhogomela dziṅwe nngu, ndau khulu yo ḓa ya fara nngu nga mulomo wayo! Naa ni a ḓivha uri Davida o ita mini? O pandamedza ndau nga murahu nahone a i vhulaha nga zwanḓa zwawe! Zwiṅwe hafhu musi tshivhingwi tshi tshi ṱoḓa u huvhadza nngu, na tshone Davida o tshi vhulaha! Ni humbula u nga ndi nnyi we a thusa Davida?— Ee, ndi Yehova.

Huna tshiṅwe tshifhinga tshe Davida a sumbedza uri ha ofhi. Vhaisiraele vho vha vha tshi khou lwa na Vhafilisita. Kha Vhafilisita ho vha hu na muṅwe munna mulapfu vhukuma wa muswonḓa! Dzina ḽawe o vha a tshi pfi Goliata. Hoyu munna wa muswonḓa o vha a tshi khou sumbedza u nyadza Vhaisiraele na Yehova. Goliata o vhudza maswole a Vhaisiraele uri a ḓe a lwe nae. Fhedzi Vhaisiraele vhoṱhe vho vha vha tshi khou ofha u lwa nae. Musi Davida a tshi zwi pfa, o vhudza Goliata uri: ‘Nṋe ndi ḓo lwa na inwi! Yehova u ḓo nthusa, nahone ndi ḓo ni kunda!’ Naa ni humbula u nga Davida o vha a sa ofhi?— Ee, o vha a sa ofhi. Naa ni a ṱoḓa u ḓivha uri ho itea mini nga murahu ha zwenezwo?

Davida o dzhia gatho ḽawe na matombo maṱanu avhuḓi, a ya u lwa na munna wa muswonḓa. Musi Goliata a tshi vhona nḓila ye Davida a vha e muṱuku ngayo, o thoma u mu nyadza. Fhedzi Davida o mu vhudza u ri: ‘Inwi ni khou ḓa kha nṋe no fara banga, fhedzi nṋe ndi khou ḓa kha inwi nga dzina ḽa Yehova!’ Nga zwenezwo a longa tombo kha gatho ḽawe, a gidima o livha Goliata, nahone a ḽi posa khae. Ḽeneḽo tombo ḽa rwa Goliata vhukati ha maṱo! Onoyo munna wa muswonḓa a wela fhasi, a fa! Vhafilisita  vha tshuwa vhukuma lwe zwa ita uri vha shavhe vhoṱhe. Zwo konadzea hani uri mutukana muṱuku sa Davida a kunde munna wa muswonḓa?— O thuswa nga Yehova, nahone Yehova o vha e na maanḓa vhukuma u fhira munna wa muswonḓa!

Davida o vha a sa ofhi ngauri o vha a tshi ḓivha uri Yehova u ḓo mu thusa

Ni nga guda mini kha mafhungo a Davida?— Yehova u na maanḓa u fhira muthu muṅwe na muṅwe. Nahone ndi Khonani yaṋu. Nga zwenezwo tshifhingani tshi ḓaho musi ni tshi pfa no tshuwa, humbulani uri Yehova a nga ni thusa uri ni si ofhe!

VHALANI BIVHILINI YAṊU