Pfukelani kha mafhungo

Pfukelani kha zwi re ngomu

 ṰHUMETSHEDZO

Ḓuvha ḽa Khaṱulo ndi Mini?

Ḓuvha ḽa Khaṱulo ndi Mini?

NI HUMBULA mini musi ni tshi pfa nga ha Ḓuvha ḽa Khaṱulo? Vhanzhi vha humbula uri vhathu vha dzimilioni vha ḓo iswa phanḓa ha khuluṋoni ya Mudzimu nga muthihi nga muthihi. Henefho ndi hone hune ha ḓo haṱulwa hone vhathu nga muthihi nga muthihi. Vhaṅwe vha ḓo wana malamba a u ya ṱaḓulu, nahone vhaṅwe vha haṱulelwa u shengedzwa hu sa gumi. Naho zwo ralo, Bivhili i sumbedza mavhonele o fhambanaho vhukuma malugana na tshenetshi tshifhinga. Ipfi ḽa Mudzimu ḽi ṱalusa tshenetsho sa tshifhinga tsha fulufhelo na u vusuluswa, hu si tshifhinga tshi ofhisaho.

Kha Ndzumbululo 20:11, 12, ri vhala nga ha ṱhaluso ya muapostola Yohane malugana na Ḓuvha ḽa Khaṱulo: “Nda vhona khuluṋoni khulu, tshena, na o dzulaho khayo’, we ḽifhasi na ḽiṱaḓulu zwa mu shavha zwi si wané vhudzulo. Nda vhona vhafu, vhahulwane na vhaṱuku, vhó ima vhó livhana na khuluṋoni, dzibugu dza tibulwa. Ha tibulwa na iṅwe bugu i re ya vhutshilo. Vhafu vha sengiswa nga zwo ṅwalwaho dzibuguni, hú u tevhedza mishumo yavho.” Ndi nnyi ane a ṱaluswa sa Muhaṱuli henefha?

Yehova Mudzimu ndi Muhaṱuli muhulwane wa vhathu. Naho zwo ralo, u ṋea muṅwe muthu mushumo wa u haṱula. U ya nga Mishumo 17:31, muapostola Paulo o amba uri Mudzimu “o vhea ḓuvha ḽithihi, ḽiné a ḓo sengisa shango ḽoṱhe ngaḽo’ á sa ṱaluli.  Muhaṱuli u ḓo vha munna we a mu vhea.” Onoyu Muhaṱuli o vhewaho ndi Yesu Kristo o vuswaho. (Yohane 5:22) Ngauralo Ḓuvha ḽa Khaṱulo ḽi thoma lini? Ḽi ḓo fhedza tshifhinga tshingafhani?

Bugu ya Ndzumbululo i sumbedza uri ḽeneḽo Ḓuvha ḽa Khaṱulo ḽi ḓo thoma nga murahu ha nndwa ya Haramagedo, musi maitele a Sathane a kha ḽifhasi o no fheliswa. * (Ndzumbululo 16:14, 16; 19:19–20:3) Nga murahu ha Haramagedo, Sathane na madimoni awe vha ḓo poselwa mugodini miṅwaha ya tshigidi. Nga tshenetsho tshifhinga, vha 144 000 vhane vha vha maḽaifa vha ḓo haṱula nahone vha ḓo vhusa sa “mahosi na Kristo, vha fhedza miṅwaha ya ḽikhulu.” (Ndzumbululo 14:1-3; 20:1-4; Vha-Roma 8:17) Ḓuvha ḽa Khaṱulo a si tshifhinga tsha awara dza 24 tshine tsha ḓo fhela nga u ṱavhanya. Ḽi ḓo fhedza miṅwaha ya tshigidi.

Nga tshenetsho tshifhinga tsha miṅwaha ya tshigidi, Yesu Kristo u ḓo “sengisa vha tshilaho na vho faho.” (2 Timotheo 4:1) “Vha tshilaho” hu ḓo vha hu vha “gogo ḽihulu” vhane vha ḓo ponyoka Haramagedo. (Ndzumbululo 7:9-17) Muapostola Yohane o dovha a vhona vho “faho . . . vho ima vho livhana na khuluṋoni” ya khaṱulo. Samusi Yesu o fulufhedzisa, ‘vha re zwaloni vha ḓo pfa ipfi ḽa [Kristo] nahone vha bvelela.’ (Yohane 5:28, 29; Mishumo 24:15) Fhedzi vhoṱhe vha ḓo haṱulwa hu tshi khou tevhedzwa mini?

U ya nga bono ḽa muapostola Yohane, ‘ho tibulwa bugu’ nahone “vhafu vha sengiswa nga zwo ṅwaliwaho dzibuguni, hu u tevhedza mishumo yavho.” Naa dzenedzi bugu dzo ṅwalwa mishumo ya vhathu ya kale? Hai, vhathu a vha nga ḓo haṱulwa hu tshi tevhedzwa zwe vha zwi ita musi vha sa athu fa. Zwenezwo ri zwi ḓivha hani? Bivhili i ri: “O faho iṱali ó landuluwa kha zwivhi.” (Vha-Roma 6:7) Nga zwenezwo, vho vuswaho vha vuselwa vhutshiloni vho hangwelwa zwivhi zwavho zwoṱhe zwe vha zwi ita vha sa athu fa. Ngauralo bugu dzi fanela u vha dzi tshi imela dziṅwe ṱhoḓea dza Mudzimu. U itela uri vho ponyokaho Haramagedo na vho vuswaho vha tshile tshoṱhe, vha fanela u tevhedza ndaela dza Mudzimu, u katela na ṱhoḓea dzoṱhe dzine  Yehova a nga kha ḓi dzi dzumbulula miṅwahani ya tshigidi. Nga zwenezwo, vhathu vha ḓo haṱulwa zwi tshi ya nga zwe vha zwi ita tshifhingani tsha Ḓuvha ḽa Khaṱulo.

Ḓuvha ḽa Khaṱulo ḽi ḓo ṋea vhathu vha maḓana a dzimilioni tshibuli tsha u guda nga ha zwine Mudzimu a zwi funa na u tshila u tendelana nazwo. Hezwi zwi amba uri hu ḓo vha na mushumo muhulwane wa u funza vhathu. Vhukuma, “vhathu mashangoni oṱhe vha ḓo funziwa zwivhuya.” (Yesaya 26:9) Naho zwo ralo, a si vhoṱhe vhane vha ḓo ṱoḓa u tshila u tendelana na zwine Mudzimu a zwi funa. Yesaya 26:10 i ri: “Muvhi, na̗ u tondwa, ha funi zwivhuya; na shangoni ḽa lukuna u a tshinya; vhuhulu ha Yehova ha vhu vhoni.” Vhenevha vhavhi vha ḓo fheliswa tshoṱhe nga Ḓuvha ḽa Khaṱulo.—Yesaya 65:20.

Musi Ḓuvha ḽa Khaṱulo ḽi tshi fhela, vho ponyokaho vha ḓo “dzamuluwa” vha vha vhathu vho fhelelaho. (Ndzumbululo 20:5) Ngauralo nga Ḓuvha ḽa Khaṱulo vhathu vha ḓo dovha vha vhuyelela kha vhuimo havho ha u thoma ha u fhelela. (1 Vha-Korinta 15:24-28) Nga murahu ha zwenezwo hu ḓo ḓa mulingo wa u fhedzisa. Sathane u ḓo vhofhololwa nahone a tendelwa uri a fhure vhathu lwa u fhedzisa. (Ndzumbululo 20:3, 7-10) Vhane vha ḓo lwisana nae vha ḓo ḓiphina nga u ḓadzea ha fulufhedziso ḽa Bivhili: “Vha u ḓo vha vhaṋe vha shango ndi vhavhuya, ndi vhone vha u ḓo dzula khaḽo’ lini na lini.” (Psalme ya 37:29) Ee, Ḓuvha ḽa Khaṱulo ḽi ḓo vha phaṱutshedzo kha vhathu vha fulufhedzeaho!

^ par. 1 Malugana na Haramagedo, nga khumbelo sedzani Insight on the Scriptures, Volumu 1, masiaṱari 594-5, 1037-8, na ndima ya 20 ya bugu Gwadamelani Mudzimu wa Ngoho e Eṱhe, vhuvhili hadzo dzo gandiswa nga Ṱhanzi dza Yehova.