Pfukelani kha mafhungo

Pfukelani kha zwi re ngomu

 ṰHUMETSHEDZO

U Losha Fulaga, U Voutha, Na Tshumelo Ya Lushaka

U Losha Fulaga, U Voutha, Na Tshumelo Ya Lushaka

U losha fulaga. Ṱhanzi dza Yehova vha tenda uri u gwadamela fulaga kana u i losha, zwine kanzhi zwa itwa musi hu tshi khou imbiwa luimbo lwa lushaka, ndi nyito ya vhurabeli i sumbedzaho uri u tshidzwa hu ḓo ḓiswa nga Shango kana nga vharangaphanḓa vhaḽo, hu si nga Mudzimu. (Yesaya 43:11; 1 Vha-Korinta 10:14; 1 Yohane 5:21) Muṅwe wa vharangaphanḓa vhe vha ita zwenezwo o vha e Khosi Nebukadanetsara wa Babele ḽa kale. A tshi ṱoḓa u takadza vhathu nga vhuhulwane hawe na u fhisetshela hawe vhurereli, onoyu murangaphanḓa o ita tshifanyiso tshihulwane nahone a kombetshedza vhalanda vhawe uri vha tshi gwadamele musi hu tshi lidzwa luimbo lune lwa fana na lwa lushaka. Naho zwo ralo, Vhaheberu vhararu—Sadaraka, Mesaka, na Abedenego—vho hana u gwadamela tshenetsho tshifanyiso, naho vho vha vha tshi ḓo haṱulelwa lufu.—Daniele, ndima ya 3.

Muḓivhazwakale Carlton Hayes o ṅwala u ri tshifhingani tshashu, “fulaga ndi tshiga tshihulwane tsha lutendo tsha vhutshavha nahone i a gwadamelwa. Vhanna vha vula miṅadzi yavho musi fulaga i tshi fhira; nahone vharendi vha ṅwala zwirendo zwa u renda fulaga nahone vhana vha imba nyimbo.” U bvela phanḓa a amba uri hu na “holodei” dzine dza ṱhonifha shango, dzine dza fana na ḓuvha ḽa 4 July ngei United States, u katela na “vhakhethwa vha re na bvumo” vhane vha huliswa na “zwiḓu zwa u rabela” zwine zwa  dzhiiwa zwi “dzithembele.” Kha vhuṅwe vhuṱambo ngei Brazil, muhulwane wa maswole o amba uri: “Fulaga i a ṱhonifhiwa na u gwadamelwa . . . samusi ri tshi ḓi gwadamela shango ḽa Vhokhotsi ashu.” Ee, The Encyclopedia Americana yo no vhuya ya amba uri “fulaga ndi khethwa u fana na tshifhambano.”

Bugu yo bulwaho afho nṱha i kha ḓi tou bva u amba uri nyimbo dza lushaka “dzi sumbedza nḓila ine vhathu vha ḓipfa ngayo nga ha shango ḽavho nahone kanzhi dzi katela na u humbela Mudzimu uri a livhise na u tsireledza vhathu kana vhavhusi vhavho.” Ngauralo vhashumeli vha Yehova a vha khou ṋaṋisedza zwithu musi vha tshi amba uri u losha fulaga na u imba luimbo lwa lushaka zwi fana na u zwi gwadamela. Zwi re zwone ndi uri musi bugu ine ya pfi The American Character i tshi amba nga ha mafhungo a u hana ha vhana vha Ṱhanzi dza Yehova u losha na u ana uri vha ḓo dzula vha tshi fulufhedzea kha shango zwikoloni zwa United States, yo ri: “Kha milandu minzhi yo sengwaho, Khothe Khulwane yo vhuya ya khwaṱhisedza uri enea maitele a ḓuvha ḽiṅwe na ḽiṅwe a u losha fulaga na u ana uri muthu u ḓo dzula a tshi fulufhedzea kha shango ndi zwiito zwine zwa fana na u i gwadamela.”

Naho vhathu vha Yehova vha sa ṱanganeli kha vhuṱambo vhu sa tendelani na Maṅwalo, vha ṱhonifha vhathu vhane vha ita nga u ralo. Vha dovha vha ṱhonifha fulaga dza lushaka dzine dza vha zwiga nahone vha a ḓiṱukufhadza kha mivhuso i “vhusaho” ine ya vha “mulanda wa Mudzimu.” (Vha-Roma 13:1-4) Nga zwenezwo, Ṱhanzi dza Yehova vha tevhela nyeletshedzo ine ya ri vha rabelele “mahosi na vhoṱhe vha re vhahulwane.” Naho zwo ralo, ndivho yashu ndi “uri ri tshile hó vuḓa, ḽó lala hoṱhe, ri tshi ḓi-rabelela Mudzimu nga vhugala.”—1 Timotheo 2:2.

U voutha khethoni dza politiki. Vhakriste vha ngoho vha ṱhonifha ndugelo dza vhaṅwe dza u voutha. A vha lwisani na mafhungo a dzikhetho, nahone vha a shumisana na vhathu vho khethiwaho. Naho zwo ralo, a vha dzhii sia kha mafhungo a politiki a shango. (Mateo 22:21; 1 Petro 3:16) Mukriste u fanela u ita mini arali a tshi dzula shangoni ḽine mudzulapo muṅwe na muṅwe a kombetshedzea uri a vouthe kana hune vhane vha sa vouthe vha vha khomboni? Musi Mukriste a tshi humbula uri Sadaraka, Mesaka, na Abedenego vho ya mudavhini wa Dura, a nga kha ḓi dzhena fhethu hune ha khou voutheliwa hone arali luvalo lwawe  lu tshi mu tendela. Naho zwo ralo, u fanela u ita vhungoho ha uri a si dzhie sia kha mafhungo a zwa politiki. U fanela u livhiswa nga maitele a rathi a tevhelaho:

  1. Vhatevheli vha Yesu a si “vha shango ḽino.”—Yohane 15:19.

  2. Vhakriste vha imelela Kristo na Muvhuso wawe.—Yohane 18:36; 2 Vha-Korinta 5:20.

  3. Tshivhidzo tsha Vhukriste tshi tenda tshithu tshithihi, nahone miraḓo yatsho yo vhofhekanywa nga lufuno lu fanaho na lwa Kristo.—1 Vha-Korinta 1:10; Vha-Kolosa 3:14.

  4. Vhane vha vouthela muṅwe muvhusi vha hwala vhuḓifhinduleli ha zwine a ḓo zwi ita.—Ṱhogomelani maitele a re kha maipfi o ṅwalwaho kha 1 Samuele 8:5, 10-18 na 1 Timotheo 5:22.

  5. Yehova o dzhia uri Vhaisiraele vho Mu landula musi vha tshi tama khosi ine vha ḓo i vhona nga maṱo.—1 Samuele 8:7.

  6. Vhakriste vha fanela u amba vho vhofholowa na vhathu vha madzangano o fhamba-fhambanaho a politiki musi vha tshi huwelela nga ha Muvhuso wa Mudzimu.—Mateo 24:14; 28:19, 20; Vha-Heberu 10:35.

Tshumelo ya lushaka. Kha maṅwe mashango, Muvhuso u ṱoḓa uri vhane vha hana u ya vhuswoleni vha ite iṅwe tshumelo ya lushaka lwa tshifhinganyana. Musi ro sedzana na enea mafhungo, ri fanela u rabela nga hao, khamusi ri zwi haseledze na Mukriste o vhibvaho, nahone ri ite phetho yo thewaho kha luvalo.—Mirero 2:1-5; Vha-Filipi 4:5.

Ipfi ḽa Mudzimu ḽi ri vhudza uri ri “luvh[e] Murena na vhavhusi, u thetshelesa, na u dzula [r]ó ḓi-lugisela u shuma mishumo mivhuya . . . [ri] vuḓe.” (Tito 3:1, 2) Ri na zwenezwo muhumbuloni, ri nga kha ḓi ḓivhudzisa mbudziso dzi tevhelaho: ‘Naa u ita tshumelo ya lushaka zwi ḓo ita uri samusi ndi Mukriste ndi mbo ḓi dzhia sia kana zwi ḓo ita uri ndi ṱanganele kha vhurereli ha mazwifhi?’ (Mixa 4:3, 5; 2 Vha-Korinta 6:16, 17) ‘Naa u ita wonoyu mushumo zwi ḓo ita uri ndi konḓelwe u ḓadzisa vhuḓifhinduleli hanga ha Vhukriste kana u nthivhela u vhu ḓadzisa?’ (Mateo 28:19, 20; Vha-Efesa 6:4; Vha-Heberu 10:24, 25) ‘Kha ḽiṅwe sia, naa u ita wonoyu mushumo zwi ḓo nṋea tshifhinga tsha u ita zwithu zwa muya, khamusi u dzhenela tshumelo ya tshifhinga tshoṱhe?’—Vha-Heberu 6:11, 12.

 Arali luvalo lwa Mukriste lwa mu tendela uri a ite tshumelo ya lushaka nṱhani ha u ya dzhele, Vhakriste ngae vha fanela u ṱhonifha phetho yawe. (Vha-Roma 14:10) Naho arali a tshi vhona u nga a nga si kone u ita yeneyo tshumelo, vha fanela u ṱhonifha phetho yawe.—1 Vha-Korinta 10:29; 2 Vha-Korinta 1:24.