Pfukelani kha mafhungo

Pfukelani kha zwi re ngomu

 NDIMA YA 5

Nḓila Ya U Ḓifhambanya Na Shango

Nḓila Ya U Ḓifhambanya Na Shango

“A ni vha shango ḽino.”—YOHANE 15:19.

1. Ndi mini zwe Yesu a zwi ombedzela vhusikuni hawe ha u fhedza kha ḽifhasi?

VHUSIKUNI hawe ha u fhedza kha ḽifhasi, Yesu o vhilaela vhukuma nga ha vhumatshelo ha vhatevheli vhawe. O ita na u vha rabelela kha Khotsi awe a ri: “A thi ri: vha bvise shangoni ḽino; tshiné nda humbela ndi uri: vha pilele uri vha si dzhene vhuvhini. Vhone a si vha shango ḽino, vhunga na nṋe ndí si wa shango ḽino.” (Yohane 17:15, 16) Kha yeneyi thabelo i bvaho mbiluni, Yesu o sumbedza uri u funa vhafunziwa vhawe nga maanḓa nahone a sumbedza ndeme ya maipfi e a a amba honoho vhusiku kha vhaṅwe vha vhatevheli vhawe, ane a ri: “A ni vha shango ḽino.” (Yohane 15:19) Zwi tou vha khagala uri zwo vha zwi zwa ndeme kha Yesu uri vhatevheli vhawe vha ḓifhambanye na shango!

2. Ndi “shango” ḽifhio ḽe Yesu a ambela khaḽo?

2 “Shango” ḽe Yesu a amba ngaḽo ndi vhathu vhoṱhe vho ḓifhambanyaho na Mudzimu, vha vhuswaho nga Sathane na vha re na tseḓa na muya wa u ḓikukumusa une wa bva khae. (Yohane 14:30; Vha-Efesa 2:2; 1 Yohane 5:19) Vhukuma, ‘u konana na shango ḽeneḽo ndi u itela Mudzimu vhuswina.’ (Yakobo 4:4) Naho zwo ralo, vhathu vhoṱhe vhane vha ṱoḓa u dzula lufunoni lwa Mudzimu vha nga vha hani shangoni, fhedzi vha ḓifhambanya naḽo? Ri ḓo ṱolisisa nḓila ṱhanu: nga u dzula ri tshi fulufhedzea kha Muvhuso wa Mudzimu une wa vha zwanḓani zwa Kristo na u sa dzhia sia kha mafhungo a politiki a shango, nga u iledza muya wa shango, nga u ambara na u  ḓilugisa nga nḓila i ṱhonifheaho, nga u ita uri iṱo ḽashu ḽi dzule ḽo tsha na u ambara mafumo ashu oṱhe a muya.

U DZULA U TSHI FULUFHEDZEA NA U SA DZHIA SIA KHA ZWA POLITIKI

3. (a) Yesu o dzhia hani mafhungo a politiki a misini yawe? (b) Ndi ngani hu tshi nga ambiwa uri vhatevheli vha Yesu vho ḓodzwaho ndi vhaḓinḓa? (Katelani ṱhaluso i re magumoni a siaṱari.)

3 Nṱhani ha u dzhenelela kha mafhungo a politiki a misini yawe, Yesu o livhisa ṱhogomelo kha u huwelela nga ha Muvhuso wa Mudzimu, muvhuso wa ṱaḓulu wa tshifhingani tshi ḓaho une a ḓo vha Khosi yawo. (Daniele 7:13, 14; Luka 4:43; 17:20, 21) Nga zwenezwo, musi e phanḓa ha Muvhusi wa Roma, Pontio Pilato, Yesu o ri: “Muvhuso wanga a si wa shango ḽino.” (Yohane 18:36) Vhatevheli vhawe vha fulufhedzeaho vha tevhela tsumbo yawe nga u dzula vha tshi fulufhedzea kha Kristo na kha Muvhuso wawe na nga u huwelela nga ha wonoyo Muvhuso shangoni. (Mateo 24:14) Muapostola Paulo o ṅwala uri: “Zwino-ha ri vhaḓinḓa tshiimoni tsha Kristo, ngauri Mudzimu ndi tshiifa a tshi kwengweledza nga riṋe, ri khou humbela rí tshiimoni tsha Kristo ri ri: Tendani u pfumedzanywa na Mudzimu.” *2 Vha-Korinta 5:20.

4. Vhakriste vhoṱhe vha ngoho vho sumbedza hani uri vha a fulufhedzea kha Muvhuso wa Mudzimu? (Sedzani  bogisi ḽi re kha siaṱari 52.)

4 Nga ṅwambo wa uri vhaḓinḓa vha imelela muvhuso u sili kana shango ḽi sili, a vha dzheneleli kha mafhungo a shango ḽine vha shuma khaḽo; a vha dzhii sia. Naho zwo ralo, vhaḓinḓa vha tikedza muvhuso wa shango ḽine vha ḽi imelela. Zwo tou ralo na nga vhatevheli vha Kristo vho ḓodzwaho, vhane hayani ‘ha havho ha vha ngei ṱaḓulu.’ (Vha-Filipi 3:20) Zwi re zwone ndi uri nga ṅwambo wa u huwelela havho nga ha Muvhuso nga u fhisea, vho thusa vha “dziṅwe nngu” dza milioni  dza Kristo uri vha “pfumedzanyw[e] na Mudzimu.” (Yohane 10:16; Mateo 25:31-40) Vha dziṅwe nngu ndi vhaimeleli vha Kristo, vha tikedza vharathu vha Yesu vho ḓodzwaho. Samusi vhe sambi ḽithihi ḽine ḽa ḓivhadza Muvhuso wa Vhumessia, zwenezwi zwigwada zwivhili a zwi dzhii sia kha mafhungo a shango a politiki.—Yesaya 2:2-4.

5. Tshivhidzo tsha Vhukriste tsho fhambana hani na Isiraele ḽa kale nahone zwi vhonala hani?

 5 U fulufhedzea kha Kristo a si tshone tshiitisi tshi tshoṱhe tshine tsha ita uri Vhakriste vha ngoho vha sa dzhie sia kha mafhungo a politiki. A ri fani na Vhaisiraele vha kale vhe vha vha vho ṋewa shango nga Mudzimu, riṋe ri wanala tshipiḓani tshiṅwe na tshiṅwe tsha shango. (Mateo 28:19; 1 Petro 2:9) Nga zwenezwo, arali ra tikedza mahoro a politiki a hune ra dzula hone, ri nga si kone u huwelela mulaedza wa Muvhuso ro vhofholowa nahone ri ḓo tshinya vhuthihi hashu ha Vhukriste. (1 Vha-Korinta 1:10) Zwiṅwe hafhu, misini ya nndwa, ri ḓo ḓiwana ri tshi khou lwa na vhatendi nga riṋe, vhe ra laedzwa uri ri vha fune. (Yohane 13:34, 35; 1 Yohane 3:10-12) Ndi ngazwo Yesu o vhudza vhafunziwa vhawe uri vha songo lwa. Nahone o dovha a vha vhudza uri vha fune maswina avho.—Mateo 5:44; 26:52; sedzani bogisi  “Naa Ndo Ḓiimisela U Dzula Ndi Sa Dzhii Sia Kha Zwa Politiki?” ḽi re kha siaṱari 55.

6. U ḓiṋekedza haṋu kha Mudzimu zwi kwama hani vhushaka haṋu na Khosi?

6 Riṋe Vhakriste vha ngoho ro ḓiṋekedza kha Mudzimu, hu si kha muthu naho e ufhio, dzangano ḽa vhathu kana lushaka. Vha-Korinta ya U Thoma 6:19, 20 i ri: “A ni vhaṋu inwi vhaṋe. Ngauri no rengwa nga mutengo.” Nga zwenezwo, naho vhatevheli vha Yesu vha tshi ṋea “khosi” zwi re zwayo nga u i ṱhonifha, u badela mithelo na u ḓiṱukufhadza nga ho fanelaho, vha ṋea ‘Mudzimu zwi re zwa Mudzimu.’ (Marko 12:17; Vha-Roma 13:1-7) Zwenezwi zwi katela vhurabeli havho, lufuno lwavho lu bvaho mbiluni na u thetshelesa havho nga u fulufhedzea. Arali zwi tshi ṱoḓea, vha ḓiimisela u kumedza vhutshilo havho vha tshi itela Mudzimu.—Luka 4:8; 10:27; Mishumo 5:29; Vha-Roma 14:8.

U LWISANA NA “MUYA WA SHANGO”

7, 8. “Muya wa shango” ndi mini nahone wonoyo muya u ‘shuma’ hani kha muthu?

7 Iṅwe nḓila ine Vhakriste vha ḓifhambanya ngayo na shango ndi nga u iledza muya waḽo muvhi. Paulo o ṅwala uri:  “Riṋe-ha a ro ngo ṋewa muya wa shango, ro ṋewa Muya u bvaho Mudzimuni.” (1 Vha-Korinta 2:12) Kha Vhaefesa o ri: “Kale no vha ni tshi tshimbila nga maitele a ḽino shango, nga u tevhedza zwa muvhusi, ané maanḓa awe a tou fhefheḓa, ané muya wawe wa vha wone u ḓi-sumbedzaho zwino kha vhana vha u sa pfa.”—Vha-Efesa 2:2, 3.

8 “Muya” wa shango ndi maanḓa a sa vhonali ane a ṱuṱuwedza vhathu uri vha si thetshelese Mudzimu nahone u ṱuṱuwedza “nyemulo dza ṋama na nyemulo dza maṱo.” (1 Yohane 2:16; 1 Timotheo 6:9, 10) Wonoyu muya u ‘vhusa’ shango nga u kunga vhathu vha re na tshivhi, u na vhukwila, u na tshiṱuhu, nahone u wanala fhethu hoṱhe. Zwiṅwe hafhu, u ‘shuma’ nga zwiṱuku nga zwiṱuku kha muthu nga u mu ita uri a ṱahulele pfaneleo dzi sa takadzi Mudzimu, dzi ngaho tseḓa, u ḓihudza, vhupangwa na muya wa u ḓilanga na wa vhushandukwa. * Nga nḓila i pfalaho, muya wa shango u ita uri pfaneleo dza Diabolo dzi hule nga zwiṱuku nga zwiṱuku mbiluni ya muthu.—Yohane 8:44; Mishumo 13:10; 1 Yohane 3:8, 10.

9. Muya wa shango u nga dzhena hani muhumbuloni na mbiluni dzashu?

9 Naa muya wa shango u nga sima midzi muhumbuloni na mbiluni yaṋu? Ee, fhedzi zwenezwo zwi nga itea arali na dzula ni songo fhaṱuwa. (Mirero 4:23) Zwi re zwone ndi uri kanzhi ṱhuṱhuwedzo yawo a i vhonali, khamusi u nga dzhena nga u konana na vhathu vhane vha vhonala vho luga, fhedzi vha sa funi Yehova. (Mirero 13:20; 1 Vha-Korinta 15:33) Ni nga vha na wonoyo muya muvhi nga u vhala bugu dzi songo teaho, u vhona zwifanyiso zwa vhuaḓa kana u vhala zwithu zwa vhagunei kha Internet, u ḓimvumvusa hu songo kunaho na mitambo ine ya vha na muya wa muṱaṱisano—vhukuma, ni nga u wana kha naho e nnyi kana kha tshithu naho tshi tshifhio tshine tsha fhirisela mahumbulele a Sathane kana maitele awe.

10. Ri nga lwisana hani na muya wa shango?

 10 Ri nga lwisana hani na muya wa shango na u ḓivhulungela lufunoni lwa Mudzimu? Ri nga ita zwenezwo nga u dzhiela nṱha ndugiselelo dza Yehova dza muya na u rabelela muya mukhethwa tshifhinga tshoṱhe. Yehova ndi muhulwane u fhira Diabolo kana shango ḽivhi ḽine ḽa langwa nga Sathane. (1 Yohane 4:4) Nga zwenezwo-ha, ndi zwa ndeme lungafhani uri ri dzule ri tsini na Yehova nga thabelo!

 U AMBARA NA U ḒILUGISA NGA NḒILA I ṰHONIFHEAHO

11. Muya wa shango wo ṱuṱuwedza hani zwilinganyo zwa maambarele?

11 Muya une wa ṱuṱuwedza muthu u vhonala nga maambarele awe, u ḓilugisa hawe na nḓila ine a ḓiṱhogomela ngayo muvhilini. Kha maṅwe mashango, zwilinganyo zwa maambarele zwo no tsa lwe muṅwe muhashi wa thelevishini a amba uri hu si kale zwi ḓo konḓa u ṱalula uri vhane vha rengisa mivhili ndi vhafhio. Na vhasidzana vha sa athu dzhena miṅwahani ya vhufumi vho no ṱuṱuwedzwa nga enea maitele—muṅwe muvhigo wa gurannda wo amba uri “vha ambara zwiambaro zwipfufhi-pfufhi nahone a vha ḓiṱhonifhi.” Iṅwe nḓowelo ndi u ambara nga nḓila ya vhuaḓa ine ya sumbedza muya wa vhushandukwa u katela na u sa vha na tshirunzi na u sa ḓiṱhonifha.

12, 13. Ndi maitele afhio ane a fanela u langa nḓila ine ra ambara na u ḓilugisa ngayo?

12 Riṋe vhashumeli vha Yehova ri fanela uri ri sedzee zwavhuḓi, zwine zwa amba uri ri tea u ambara nga nḓila ya vhudele, yavhuḓi, i ṱanganedzeaho na yo teaho tshiitea. Zwifhinga zwoṱhe mbonalo yashu i fanela u sumbedza u “ḓi-ṱam[a] nga dziṱhoni na nga u vuḓa,” zwine kathihi na “mishumo mivhuya” zwa fanela muṅwe na muṅwe—munna kana musadzi—‘ane a amba uri u ofha Mudzimu.’ Tshine ra kwamea ngatsho vhukuma a si u ḓidzhenisela maṱo, fhedzi ndi uri ri “ḓi-vhulungele ngomu lufunoni lwa Mudzimu.” (1 Timotheo 2:9, 10; Yuda 21) Vhukuma ri ṱoḓa uri mbonalo yashu yo nakaho i vhe ‘muthu o dzumbamaho wa mbiluni, zwine zwa vha ná thengo khulu phanḓa ha Mudzimu.’—1 Petro 3:3, 4.

13 Hafhu ni songo hangwa uri zwitaela zwashu zwa zwiambaro na nḓila ine ra ḓilugisa ngayo zwi nga ṱuṱuwedza nḓila ine vhathu vha dzhia ngayo vhurabeli ha ngoho. Ipfi ḽa Lugerika ḽo ṱalutshedzelwaho u ‘ḓi-ṱama,’ musi ḽi tshi shumiswa kha mafhungo ane a kwama matshilele, ḽi na muhumbulo wa u ṱhonifha, u ofha, na u hulisa maḓipfele kana mavhonele a vhaṅwe vhathu. Nga zwenezwo, tshipikwa tshashu ndi u humbulela mvalo dza vhaṅwe vhathu u fhira ndugelo dzine  ra nga humbula uri ri nadzo, musi zwi tshi ḓa kha nḓila ine ra ṱoḓa u ambara ngayo. Zwihuluhulu ndi uri ri ṱoḓa u hulisa Yehova na vhathu vhawe na u ḓithemendela sa vhaḓinḓa vha Mudzimu, ri tshi ita ‘zwoṱhe luné Mudzimu a ḓo rendwa ngalwo.’—1 Vha-Korinta 4:9; 10:31; 2 Vha-Korinta 6:3, 4; 7:1.

Naa mbonalo yanga i hulisa Yehova?

14. Ndi mbudziso dzifhio dzine ra fanela u ḓivhudzisa dzone kha mafhungo a mbonalo na u kuna muvhilini?

14 Nḓila ine ra ambara ngayo, u ḓilugisa, na u kuna muvhilini ndi zwa ndeme vhukuma musi ri vhuḓinḓani ha tsimu kana ri miṱanganoni ya Vhukriste. Ḓivhudziseni uri: ‘Naa ndi ḓidzhenisela maṱo nga ṅwambo wa mbonalo yanga na feḓa ḽanga? Naa zwi ita uri vhaṅwe vha vhe na ṱhoni musi vha tshi ntsedza? Naa ndi dzhia ndugelo dzanga kha enea masia dzi dza ndeme u fhira u fanelea u ita miṅwe mishumo tshivhidzoni?’—Psalme ya 68:6; Vha-Filipi 4:5; 1 Petro 5:6.

15. Ndi ngani Ipfi ḽa Mudzimu ḽi si na milayo yo livhaho musi zwi tshi ḓa kha maambarele, u ḓilugisa na u kuna muvhilini?

15 Bivhili a i na milayo yo livhaho kha Vhakriste musi zwi tshi ḓa kha mafhungo a maambarele, u ḓilugisa na u kuna muvhilini. Yehova u ri ṋea mbofholowo ya u ḓikhethela kana u shumisa vhukoni hashu ha u humbula. Nahone u tama ri tshi vha vhathu vho vhibvaho vhane vha shumisa maitele a Bivhili na vhane “vha vha na ṱhalukanyo yo ḓowelaho u khethekanya vhuḓi na vhuvhi.” (Vha-Heberu 5:14) Zwa ndeme vhukuma ndi uri u ṱoḓa ri tshi vhuswa nga lufuno—u funa  Mudzimu na vhaṅwe vhathu. (Marko 12:30, 31) Naho ri tshi langwa nga zwenezwo zwithu, ri ambara na u ḓilugisa nga nḓila dzo fhamba-fhambanaho. Zwenezwi ri zwi vhona nga zwiambaro zwa mivhala-vhala, zwine zwa ambarwa nga vhathu vha Yehova vho takalaho, hu sa londwi uri vho kuvhangana ngafhi.

U ITA URI IṰO ḼASHU ḼI DZULE ḼO “TSHA”

16. Muya wa shango u hanedza hani zwe Yesu a zwi funza nahone ndi mbudziso dzifhio dzine ra fanela u ḓivhudzisa dzone?

16 Muya wa shango u a fhura nahone u ṱuṱuwedza vhathu vha dzimilioni uri vha humbule uri tshelede na zwithu zwi vhonalaho zwi ḓo vha ḓisela dakalo. Naho zwo ralo, Yesu o ri: “Muthu ha tshili nga zwiné a vha nazwo’ zwa vha zwinzhi.” (Luka 12:15) Naho Yesu o vha a sa khou amba uri ri fanela u ḓidzima kana u ḓiṅala lwo kalulaho, fhedzi o funza uri vhane vha nga ḓiphina vhutshiloni na u wana dakalo ḽa vhukuma  ndi “vhaheḓana muyani” na vhane vha ita uri iṱo ḽavho ḽi dzule ḽo “tsha,” na vhane vha livhisa ṱhogomelo yavho kha zwithu zwa muya. (Mateo 5:3; 6:22, 23) Ḓivhudziseni uri: ‘Naa ndi a tenda zwa vhukuma zwe Yesu a zwi funza kana ndi khou ṱuṱuwedzwa nga “khotsi ya vhadzia-u-zwifha”? (Yohane 8:44) Zwine nda zwi amba, zwipikwa zwanga na zwine zwa ḓa u thoma vhutshiloni hanga na nḓila ine nda tshila ngayo, zwi dzumbulula mini?’—Luka 6:45; 21:34-36; 2 Yohane 6.

17. Bulani dziṅwe mbuyelo dzine dza takalelwa nga vhane vha ita uri iṱo ḽavho ḽi dzule ḽo tsha.

17 Yesu o ri: “Vhuṱali vhu vhonala nga vhana vhaho.” (Mateo 11:19) Ṱhogomelani dziṅwe mbuyelo dzine dza takalelwa nga vhane vha dzula vhe na iṱo ḽo tshaho. Vha a homolowa zwa vhukuma musi vha tshi ita tshumelo ya Muvhuso. (Mateo 11:29, 30) Vha iledza u vhilaela zwi sa ṱoḓei nahone vha ḓitsireledza kha vhuṱungu vhunzhi ha muhumbulo na ha maḓipfele. (1 Timotheo 6:9, 10) Nga ṅwambo wa uri vho fushea nga zwishaiwa zwa vhutshilo, vha vha na tshifhinga tshinzhi tsha u ṱwa na muṱa wavho na khonani dza Vhakriste. Zwenezwo zwi ita uri vha kone u eḓela zwavhuḓi. (Muhuweleli 5:11) Vha wana dakalo ḽihulwane nga u ṋea nga naho tshi tshini tshine vha kona. (Mishumo 20:35) Nahone vha “na fulufhelo nga maanḓa” na mulalo wa ngelelo na u fushea. (Vha-Roma 15:13; Mateo 6:31, 32) Vhukuma dzenedzi phaṱhutshedzo a dzi vhambedzwi na tshithu!

U DZHIA “MAFUMO OṰHE”

18. Bivhili i ṱalusa hani swina ḽashu, nḓila ine ḽa vutshela ngayo na nndwa ye ra sedzana nayo?

18 Vhane vha ḓivhulungela lufunoni lwa Mudzimu vha dovha vha tsireledzwa nga lwa muya kha mvutshelo dza Sathane, ane a ṱoḓa u ṱangula Vhakriste dakalo na vhutshilo vhu sa fheli. (1 Petro 5:8) Paulo o ri: “Ngauri nndwa [“tsimbe,” NW] yashu a si ya u lwa na ṋama na malofha, ndi ya u lwa na mivhuso, na maanḓa, na vho-ṋe-mashango vha swiswi ḽino, ndi ya u lwa na mimuya ya vhuvhi i re ṱaḓulu.” (Vha-Efesa 6:12)  Ipfi ḽa Lugerika ḽo ṱalutshedzelwaho nga uri nndwa ḽi amba “tsimbe,” zwine zwa amba uri ri khou lwa na maswina a re henefha tsini na riṋe. Zwiṅwe hafhu, maipfi ane a ri “mivhuso,” “maanḓa” na “vho-ṋe-mashango,” a sumbedza uri mvutshelo dza mmbi i sa vhonali zwo dzudzanywa zwavhuḓi nahone nga ndivho.

19. Ṱalusani mafumo a muya a Mukriste.

19 Naho zwo ralo, ri nga kunda hu sa londwi uri ri vhathu vha songo fhelelaho vha re na vhushayanungo. Nga nḓila-ḓe? Nga u dzhia “mafumo oṱhe a Mudzimu.” (Vha-Efesa 6:13) Musi i tshi ṱalusa eneo mafumo, Vha-Efesa 6:14-18 i vhalea nga heyi nḓila: “Imani-ha nó vhofha dzikhundu dzaṋu nga mafhungo-ngoho, khana nó i pila nga u luga. Tho̗vho dze na kungela milenzheni hú u dzula nó ḓi-dzudzanyela u yo amba mafhungo-maḓifha a mulalo. Tshihulwane dzhiani tshiṱangu tsha lutendo, tshiné na ḓo kona u dzima ngatsho’ misevhe yoṱhe i dugaho ya ene muvhi. Ṱanganedzani na nguwane ya u tshidzwa haṋu, na banga ḽa Muya, ndi amba maambiwa nga Mudzimu. Ni luse nga dzithabelo dzoṱhe na nga u humbela hoṱhe, nga zwikhathi zwoṱhe ni vhe vha rabelaho Muyani.”

20. Vhuimo hashu ho fhambana hani na ha swole ḽa vhukuma?

20 Samusi i ndugiselelo ya Mudzimu, eneo mafumo a muya a ḓo ri tsireledza, arali fhedzi ra a ambara zwifhinga zwoṱhe. Vhakriste vho fhambana na maswole a vhukuma ane a nga fhedza tshifhinga tshilapfu o sokou dzula e si nndwani. Vha dzula vha tshi khou lwa nahone nndwa yavho i ḓo fhela musi Mudzimu o no fhelisa shango ḽa Sathane nahone madimoni oṱhe mavhi o valelwa mugodini. (Ndzumbululo 12:17; 20:1-3) Nga zwenezwo, ni songo vhuya na kulea nungo arali ni tshi khou lwisana na vhushayanungo kana nyemulo dzo khakheaho, nga uri roṱhe ri fanela u ‘ḓisinḓa’ u itela uri ri dzule ri tshi fulufhedzea kha Yehova. (1 Vha-Korinta 9:27) Vhukuma, ri fanela u vhilaela arali ra ḓiwana ro sokou dzula ri sa khou lwa!

21. Ndi ifhio nḓila nthihi fhedzi ine ra nga kunda ngayo nndwani yashu ya muya?

 21 Zwiṅwe hafhu, ri nga si kunde yeneyi nndwa nga nungo dzashu. Nga zwenezwo, Paulo u ri humbudza uri ri fanela u rabela Yehova “zwikhathi zwoṱhe [r]i vhe vha rabelaho Muyani.” Zwiṅwe hafhu, ri fanela u thetshelesa Yehova nga u guda Ipfi ḽawe na u konana na “maswole” nga riṋe tshifhinga tshoṱhe, nga uri a ri khou lwa yeneyi nndwa ri roṱhe! (Filemoni 2; Vha-Heberu 10:24, 25) Vhane vha fulufhedzea kha enea masia vha ḓo kunda, vha dovha vha kona u imelela lutendo lwavho musi vha tshi lingwa.

ḒILUGISELELENI U LWELA LUTENDO LWAṊU

22, 23. (a) Ndi ngani ri tshi fanela u dzula ro lugela u lwela lutendo lwashu nahone ndi mbudziso dzifhio dzine ra fanela u ḓivhudzisa dzone? (b) Ndi mini zwine zwa ḓo haseledzwa kha ndima i tevhelaho?

22 Yesu o ri: “Hone [shango] ḽi a ni vhénga, ngauri a ni vha shango ḽino.” (Yohane 15:19) Nga zwenezwo, Vhakriste vha fanela u dzula vho lugela u lwela lutendo lwavho na u ita zwenezwo nga ṱhonifho na nga u vuḓa. (1 Petro 3:15) Ḓivhudziseni uri: ‘Naa ndi a pfesesa uri ndi ngani nga zwiṅwe zwifhinga Ṱhanzi dza Yehova vha tshi ita zwithu zwo fhambanaho na zwine zwa itwa nga vhathu vhanzhi? Musi ndo sedzana na honoho vhuleme, naa ndi a tenda tshoṱhe uri zwine zwa ambiwa nga Bivhili na tshigwada tsha mukoma tshi fulufhedzeaho ndi ngoho? (Mateo 24:45; Yohane 17:17) Nahone musi zwi tshi ḓa kha u ita zwithu zwo lugaho phanḓa ha Yehova, naa ndi takalela u vha o fhambanaho na u ḓirwa khana nga zwenezwo?’—Psalme ya 34:2; Mateo 10:32, 33.

23 Naho zwo ralo, kanzhi lutamo lwashu lwa u dzula ro fhambana na shango lu a lingiwa nga nḓila nnzhi dzi sa vhonali. Sa tsumbo, samusi zwo buliwa mathomoni, Diabolo u khou lingedza u fasha vhashumeli vha Yehova nga u ḓimvumvusa ha shango. Ri nga khetha hani u ḓimvumvusa havhuḓi hune ha ḓo ri sia ro fushea nahone ri na luvalo lwo kunaho? Enea mafhungo a ḓo haseledzwa kha ndima i tevhelaho.

^ phar. 3 U bva nga Pentekoste ya 33 C.E., Kristo o vha Khosi ya tshivhidzo tshawe tsha vhatevheli vho ḓodzwaho kha ḽifhasi. (Vha-Kolosa 1:13) Nga 1914, Kristo o wana maanḓa a u vha khosi “vhuhosi[ni] ha shango.” Naho zwo ralo, zwino Vhakriste vho ḓodzwaho ndi vhaḓinḓa vha Muvhuso wa Vhumessia.—Ndzumbululo 11:15.

^ phar. 8 Sedzani Reasoning From the Scriptures, masiaṱari 389-93, yo gandiswaho nga Ṱhanzi dza Yehova.