Pfukelani kha mafhungo

Pfukelani kha zwi re ngomu

 ṰHUMETSHEDZO

Ri Fanela U Fara Hani Muthu O Bviswaho Tshivhidzoni

Ri Fanela U Fara Hani Muthu O Bviswaho Tshivhidzoni

Zwi a vhavha nga maanḓa musi shaka kana khonani ya tsini-tsini i tshi bviswa tshivhidzoni nga ṅwambo wa u sa rembuluwa kha tshivhi tshe ya tshi ita. Nḓila ine ra aravha ngayo yeneyi nyeletshedzo ya Bivhili kha enea mafhungo i nga sumbedza nḓila ine ra funa ngayo Mudzimu na u fulufhedzea hashu kha ndugiselelo yawe. * Ṱhogomelani dziṅwe mbudziso dzine dza vhudziswa nga ha enea mafhungo.

Ri fanela u fara hani muthu o bviswaho tshivhidzoni? Bivhili i ri: “Ni songo tshimbilelana na ane a ri dzina a tshi pfi murathu, a vha e phombwe, kana mudzia-vhuvhuḓu kana mudzia-midzimu i sili, kana mugoḓi, kana munwí, kana muṱanguli, wa u ralo na u ḽa ni songo ḽa naé.” (1 Vha-Korinta 5:11) Malugana na muṅwe na muṅwe ane “a si dzule kha pfunzo ya Kristo,” ri a vhala: “Ni songo mu ṱanganedza nḓuni, na u mu resha ni songo mu resha. Ngauri ané a reshana nae’ u khou ḓi-shata mishumo yawe mivhi.” (2 Yohane 9-11) A ri ambi nga ha zwithu zwa muya kana u ḓimvumvusa na vhathu vho bviswaho tshivhidzoni. Tshiingamo (nga Luisimane) tsha ḽa 15 September, 1981, siaṱari 25, tshi ri: “U tou amba fhedzi uri ‘Hu rini’ na muthu o bviswaho tshivhidzoni zwi nga vha vhukando vhune ha nga ita uri hu thome u vha na nyambedzano khamusi na vhukonani. Naa ri nga ṱoḓa u dzhia honoho vhukando ha u thoma na muthu o bviswaho tshivhidzoni?”

Naa zwo tea uri ri sa ḓiṱanganye na luthihi na vhathu vho bviswaho tshivhidzoni? Ee, nga ṅwambo wa zwiitisi zwo vhalaho. Tsha u thoma, ri zwi ita nga ṅwambo wa u fulufhedzea kha Mudzimu na kha Ipfi ḽawe. A ri thetshelesi Yehova musi zwi tshi ri lelutshela u ita nga u ralo fhedzi, fhedzi na musi zwi tshi ri konḓela. U funa Mudzimu zwi ri ṱuṱuwedzela uri ri thetshelese ndaela dzawe dzoṱhe, ri tshi ṱhogomela uri u a fulufhedzea, u a ri funa nahone milayo yawe i a ri vhuyedza. (Yesaya 48:17; 1 Yohane 5:3) Tsha vhuvhili, u ḓifhambanya na muitazwivhi a sa rembuluwi zwi a ri tsireledza na u tsireledza tshivhidzo tshoṱhe uri  tshi sa tshikafhadzwe muyani na kha vhuḓifari nahone zwi ita uri tshivhidzo tshi dzule tshi na dzina ḽavhuḓi. (1 Vha-Korinta 5:6, 7) Tsha vhuraru, u nambatela hashu maitele a Bivhili zwi nga dovha zwa vhuyedza na muthu o bviswaho tshivhidzoni. Nga u tikedza phetho yo dzhiiwaho nga komiti ya khaṱulo, ri nga kwama mbilu ya muitazwivhi we a kundwa u aravha vhuḓidini ha vhahulwane ha u ṱoḓa u mu thusa. U sa vha na vhushaka na muthu ane ra mu funa o bviswaho tshivhidzoni, zwi nga mu thusa uri a ‘ḓihumbule,’ a vhone vhukhakhi hawe, nahone a dzhie vhukando ha u vhuyelela kha Yehova.—Luka 15:17.

Hu pfi mini arali shaka ḽo bviswa tshivhidzoni? Kha vhuimo ho raloho, zwenezwi zwi ḓo linga u fulufhedzea ha miraḓo ya muṱa. Ri fanela u fara hani shaka ḽo bviswaho tshivhidzoni? Ri nga si kone u haseledza vhuimo hoṱhe vhune ha nga kha ḓi vha hone, fhedzi kha ri livhise ṱhogomelo kha masia mavhili o ḓoweleaho.

Kha vhuṅwe vhuimo, khamusi muraḓo wa muṱa o bviswaho tshivhidzoni u kha ḓi dzula hayani. Samusi u bviswa hawe tshivhidzoni zwi sa ambi uri mbofho ya muṱani yo fhela, mishumo yo ḓoweleaho ya muṱani ya ḓuvha ḽiṅwe na ḽiṅwe na tshumisano zwi ḓo ḓi bvela phanḓa. Naho zwo ralo, nga zwe a zwi ita, onoyo muthu o khetha u pfuvhisa vhushaka ha muya he a vha e naho ha u shumela Mudzimu na muṱa. Nga zwenezwo, miraḓo ya muṱa i fulufhedzeaho a i tsha ḓo ṱanganela nae kha zwithu zwa muya. Sa tsumbo, arali e hone musi muṱa wo fara pfunzo ya Bivhili, ha nga ṱanganeli kha yeneyo pfunzo. Naho zwo ralo, arali muthu o bviswaho tshivhidzoni e ṅwana, vhabebi vha kha ḓi vha na vhuḓifhinduleli ha u mu gudisa na u mu laya. Nga zwenezwo, vhabebi vha re na lufuno vha nga dzudzanya u fara pfunzo ya Bivhili na onoyo ṅwana. *Mirero 6:20-22; 29:17.

Kha vhuṅwe vhuimo, muthu o bviswaho tshivhidzoni a nga vha e muraḓo wa muṱa, fhedzi a sa dzuli hayani. Naho hu tshi nga ṱoḓea uri ni kwamane nae nga zwiṅwe zwifhinga nga ha mafhungo a muṱa, u ṱangana honoho hu fanela u vha ha tshifhinganyana. Miraḓo ya muṱa i fulufhedzeaho ya Vhakriste a i ṱoḓi zwiitisi zwa u shumisana na miraḓo ya muṱa yo bviswaho tshivhidzoni,  ine ya sa dzule hayani. Nṱhani hazwo, u fulufhedzea kha Yehova na ndangulo yawe zwi vha sudzulusela u farelela kha ndugiselelo ya Maṅwalo nga ha vhathu vho bviswaho tshivhidzoni. U fulufhedzea havho zwi ḓo vhuyedza muitazwivhi nahone zwi nga mu thusa uri a vhuyelwe nga ndayo ye a i wana. *Vha-Heberu 12:11.

^ phar. 1 Maitele a Bivhili nga ha enea mafhungo a shuma na kha vhathu vho ḓifhambanyaho na tshivhidzo.

^ phar. 2 U itela mafhungo o engedzeaho nga ha vhana vho bviswaho tshivhidzoni vhane vha kha ḓi dzula hayani, sedzani Tshiingamo tsha ḽa 1 October 2001, masiaṱari 16-17, na tsha ḽa 1 November 1988, siaṱari 31.

^ phar. 3 U itela mafhungo o engedzeaho nga ha nḓila ine ra nga fara ngayo mashaka o bviswaho tshivhidzoni, sedzani nyeletshedzo ya Maṅwalo yo haseledzwaho kha Tshiingamo tsha ḽa 1 April 1988, masiaṱari 27-31, na tsha ḽa 15 September 1981 (nga Luisimane), masiaṱari 26-31.