Pfukelani kha mafhungo

Pfukelani kha zwi re ngomu

 NDIMA YA 7

Naa Ni Dzhia Vhutshilo Vhu Ha Ndeme U Fana Na Mudzimu?

Naa Ni Dzhia Vhutshilo Vhu Ha Ndeme U Fana Na Mudzimu?

“Ngauri tshisima tsha vhutshilo tshi ha Iwe.”—PSALME YA 36:9.

1, 2. Ndi tshifhiwa tshifhio tshi bvaho ha Mudzimu tshine tsha vha tsha ndeme vhukuma ṋamusi nahone ndi ngani?

KHOTSI ashu wa ṱaḓulu o ri ṋea tshifhiwa tsha ndeme vhukuma—tshenetsho tshifhiwa ndi vhutshilo nahone samusi ro sikwa nga tshifanyiso tshawe, ri a kona u edzisa pfaneleo dzawe dzavhuḓi. (Genesi 1:27) Nga ṅwambo wa tshenetshi tshifhiwa tshavhuḓi, ri a kona u pfesesa nḓila ine maitele a Bivhili a ri vhuyedza ngayo. Arali ra a shumisa, ri nga kona u vha vhathu vho vhibvaho muyani vhane vha funa Yehova na vhane “vha vha na ṱhalukanyo yo ḓowelaho u khethekanya vhuḓi na vhuvhi.”—Vha-Heberu 5:14.

2 Vhukoni ha u shumisa maitele a Bivhili ndi ha ndeme nga maanḓa ṋamusi, nga uri shango ḽo tshinyala lune a hu na maitele ane a nga kona u langa vhuimo vhuṅwe na vhuṅwe vhune ha nga vha hone vhutshiloni. Yeneyi mbuno i vhonala nga maanḓa kha mafhungo a zwa ngalafho, zwihuluhulu malugana na mishonga na maalafhele a katelaho malofha. Enea ndi mafhungo a ndeme kha vhathu vhoṱhe vhane vha thetshelesa Yehova. Naho zwo ralo, arali ri tshi pfesesa maitele a Bivhili a tshimbidzanaho na enea mafhungo, ri ḓo kona u ita phetho dza vhuṱali dzine dza ḓo ita uri ri vhe na luvalo lwavhuḓi na u ri ita uri ri ḓivhulungele lufunoni lwa Mudzimu. (Mirero 2:6-11) Ṱhogomelani maṅwe a enea maitele.

VHUTSHILO NA MALOFHA NDI ZWIKHETHWA

3, 4. Ndi lini he Maṅwalo a amba nga ha vhukhethwa ha malofha lwa u tou thoma nahone zwo thewa kha maitele afhio?

3 Musi Kaini o no vhulaha murathu wawe Abele, Yehova o zwi  bvisela khagala lwa u thoma uri vhutshilo na malofha ndi zwikhethwa. Mudzimu o vhudza Kaini a ri: “Malofha a murathu wau a khou nṱavhela mukosi e mavuni.” (Genesi 4:10) U ya nga mavhonele a Yehova, malofha a Abele o vha a tshi imela vhutshilo hawe, he ha kaṱudzwa nga nḓila ya tshiṱuhu. Hu nga ambiwa uri malofha a Abele o vha a tshi khou vhidzelela Mudzimu uri a lifhedze.—Vha-Heberu 12:24.

4 Nga murahu ha Maḓi Mahulu a misini ya Noaxe, Mudzimu o tendela vhathu uri vha ḽe ṋama ya zwipuka, fhedzi vho vha vha songo fanela u ḽa malofha. Mudzimu o ri: “Hone ni songó ḽa ṋama ine ya kha ḓi vha na vhutshilo malofhani ayo. Nga ngoho, aṋu malofha, a re hone vhutshilo haṋu, ndi ḓo a lifhedzela.” (Genesi 9:4, 5) Yeneyi ndaela i a shuma na kha vhaḓuhulu vhoṱhe vha Naoxe u swika na kha riṋe ṋamusi. I khwaṱhisedza zwe Mudzimu a zwi vhudza Kaini uri vhutshilo ha zwivhumbiwa zwoṱhe vhu kha malofha. Yeneyo ndaela i dovha ya sumbedza uri Yehova, Tshisima tsha vhutshilo, u ḓo haṱula vhathu vhoṱhe vhane vha sa ṱhonifhe vhutshilo na malofha.—Psalme ya 36:9.

5, 6. Mulayo wa Mushe wo sumbedza hani uri malofha ndi makhethwa nahone ndi a ndeme? (Dovhani ni sedze  bogisi ḽi re kha siaṱari 78.)

5 Dzenedzi pfunzo mbili dza ndeme dzi dovha dza vhonala kha Mulayo wa Mushe. Levitiko 17:10, 11 i vhalea nga heyi nḓila: “Nnyi na nnyi . . . ane a ḽa malofha, ndi ḓo mu ṱhavha nga maṱo anga, ndi ḓo mu bvisa kha lushaka lwa hawe. Ngauri vhutshilo ha ṋama vhu kha malofha. Huno Nṋe ndo ni ṋea malofha uri a vhe a aletare, uri a vhe a u pfumelela vhutshinyi haṋu; ngauri enea malofha a pfumelela muthu.” *—Sedzani bogisi  “Maanḓa A Malofha A Pfumelelaho,” kha siaṱari 76.

6 Arali malofha a tshipuka tsho vhulahwaho a sa shumiswa alatereni, o vha a tshi fanela u shululelwa fhasi. Nga zwenezwo, nga lwa pfanyisedzo, vhutshilo ho vha vhu tshi vhuyelela kha Muṋe  waho. (Doiteronomio 12:16; Hesekiele 18:4) Naho zwo ralo, ṱhogomelani uri ho vha hu sa ṱoḓei uri Vhaisiraele vha shumise nḓila dzo kalulaho u itela u bvisa shotha ḽiṅwe na ḽiṅwe ḽa malofha kha ṋama ya tshipuka ine vha khou ṱoḓa u i ḽa. Muisiraele o vha a tshi nga ḽa ṋama ya tshipuka nga luvalo lwo kunaho arali fhedzi tsho vhulahwa zwavhuḓi nahone tsha bviswa malofha, ngauri u bviswa honoho ha malofha ho vha hu tshi sumbedza u ṱhonifha Muṋei wa Vhutshilo.

7. Davida o sumbedza hani u ṱhonifha vhukhethwa ha malofha?

 7 Davida, “munna ané mbilu ya [Mudzimu] ya mu takalela,” o pfesesa maitele a mulayo wa Mudzimu nga ha malofha. (Mishumo 13:22) Nga tshiṅwe tshifhinga musi o farwa nga ḓora, vhanna vhawe vhararu vho mbo ḓi dzhena mishashani ya maswina avho, vha ka maḓi tshisimani, vha mbo ḓi mu ṋea one. Davida o ita mini? O ri: “Maḓi haya ndi a malofha a avha vhanna, vhe vha ya fhaḽa vhó tou ḓi-laṱa.” Nga maṅwe maipfi, kha Davida enea maḓi o vha a tshi imela malofha a vhenevha vhanna. Ngauralo hu sa londwi uri o vha o farwa nga ḓora, o “a tevhulela Yehova.”—2 Samuele 23:15-17.

8, 9. Naa mavhonele a Mudzimu nga ha vhutshilo na malofha o shanduka musi hu tshi vhumbiwa tshivhidzo tsha Vhukriste? Ṱalutshedzani.

8 Nga murahu ha miṅwaha ya 2400 Noaxe o ṋewa ndaela ya u ṱhonifha malofha na nga murahu ha miṅwaha i ṱoḓaho u vha 1500 ho no vhofhiwa mulanga wa Mulayo, Yehova o hevhedza tshigwada tshi langaho tsha tshivhidzo tsha u thoma tsha Vhukriste uri tshi ṅwale uri: “Ngauri hu funa Muya mukhethwa na riṋe uri inwi ni si dovhe na hwesiwa muṅwe muhwalo. Tshiné tsha funa u itwa ndi u ri: Ni laṱe zwidzimu zwa u itela midzimu i sili, na u ḽa malofha, na zwo faho nga u tshipiwa, na vhupombwe.”—Mishumo 15:28, 29.

9 Vhukuma, tshigwada tshi langaho tsha u thoma tsho ṱhogomela uri malofha ndi makhethwa nahone u a shumisa luvhi zwo khakhea u fana na u gwadamela midzimu i sili kana vhupombwe. Ṋamusi Vhakriste vha ngoho vha tendelana na zwenezwo. Zwiṅwe hafhu, nga ṅwambo wa uri vha humbula na u shumisa maitele a Bivhili, vha a kona u takadza Yehova musi vha tshi ita phetho dza malugana na u shumisa malofha.

U SHUMISWA HA MALOFHA KHA ZWA NGALAFHO

Ndi nga ṱalutshedza hani dokotela nga ha phetho yanga ya malugana na u shumisa zwipiḓa zwa malofha?

10, 11. (a) Ṱhanzi dza Yehova vha dzhia hani u shelwa malofha mavhisi na zwipiḓa zwihulwane zwa malofha? (b) Ndi kha masia afhio a malugana na malofha hune Vhakriste vha nga vha na mavhonele a sa fani?

10 Ṱhanzi dza Yehova vha a zwi ḓivha uri ‘u sa ḽa malofha’ zwi amba u sa shelwa malofha na u sa a ṋekedza kana u a vhulunga u itela uri vha a shelwe. Nga ṅwambo wa uri vha ṱhonifha mulayo  wa Mudzimu, a vha ṱanganedzi zwivhumbi zwiṋa zwihulwane zwa malofha: tsiki tswuku, tsiki tshena, dzi-platelet, na plasma.

11 Ṋamusi, madokotela manzhi vha a kona u fhandekanya zwivhumbi zwa malofha u itela uri zwi vhe zwipiḓa zwine zwa shumiswa nga nḓila dzo fhamba-fhambanaho. Naa Mukriste a nga ṱanganedza zwenezwo zwipiḓa? Naa u zwi dzhia zwi “malofha”? Muṅwe na muṅwe u fanela u ḓiitela phetho kha enea mafhungo. Zwo tou ralo na kha maalafhele a nga ho hemodialysis, hemodilution, na cell salvage hune ha shumiswa malofha aṋu tenda a songo thoma a vhulungwa ni sa athu itwa muaro.—Sedzani Ṱhumetshedzo kha siaṱari 215-18.

12. Ri fanela u dzhia na u sedza hani mafhungo a kwamaho luvalo?

12 Naa mafhungo ane muthu a fanela u ḓiitela phetho a si a ndeme kha Yehova? Ndi a ndeme nga uri ú na dzangalelo kha zwine ra zwi humbula na zwine zwa ri ṱuṱuwedza. (Mirero 17:3;  21:2; 24:12) Nga murahu ha u ita ṱhoḓisiso nga lwa thabelo malugana na mishonga kana maitele a zwa ngalafho, ri fanela u thetshelesa luvalo lwashu lwo gudiswaho nga Bivhili. (Vha-Roma 14:2, 22, 23) Vhukuma, vhaṅwe a vho ngo fanela u ri itela phetho kana u ri kombetshedza uri ri ite zwine vha zwi ṱoḓa nahone a ro ngo fanela u vha vhudzisa uri, “No vha ni tshi nga ita mini arali no vha ni vhuimoni hanga?” Kha mafhungo o raloho, Mukriste muṅwe na muṅwe u fanela u ‘hwala maputu awe ene muṋe.’ *Vha-Galata 6:5; Vha-Roma 14:12; sedzani bogisi  “Naa Ndi Dzhia Malofha E Makhethwa?” kha siaṱari 81.

MILAYO YA YEHOVA I SUMBEDZA URI NDI KHOTSI WA LUFUNO

13. Milayo na maitele zwa Yehova zwi dzumbulula mini nga hae? Ṋeani tsumbo.

13 Milayo na maitele zwine zwa wanala Bivhilini zwi dzumbulula uri Yehova ndi Muṋei wa Mulayo wa vhuṱali na Khotsi wa lufuno ane a vhilaelela vhukuma mutakalo wa vhana vhawe. (Psalme ya 19:7-11) Naho ndaela ya u ‘sa ḽa malofha’ yo vha i sa tshimbidzani na zwa mutakalo, i a ri tsireledza kha malwadze ane a tshimbidzana na u shelwa malofha. (Mishumo 15:20) Zwi re zwone ndi uri madokotela manzhi vha amba uri u alafhiwa hu sa shumiswi malofha ndi nḓila yavhuḓi nga maanḓa kha zwa ngalafho ṋamusi. Kha Vhakriste vha ngoho, enea mafhungo a sumbedza uri Yehova u na vhuṱali vhuhulwane nahone ndi Khotsi ane a ri funa.—Yesaya 55:9; Yohane 14:21, 23.

14, 15. (a) Ndi ifhio milayo ine ya sumbedza uri Mudzimu u funa vhathu vhawe? (b) Ni nga shumisa hani maitele a tikedzaho dzenedzi ndaela dza u ḓitsireledza?

14 Milayo minzhi ye Mudzimu a i ṋea Vhaisiraele vha kale i sumbedza uri o vha a tshi kwamea nga vhathu vhawe. Sa tsumbo, o laedza uri nnḓu dza Vhaisiraele dzi vhe na mupfunda wo tangaho ṱhanga u itela u thivhela khombo, ngauri vhunzhi ha zwithu zwo vha zwi tshi itwa ṱhangani. (Doiteronomio 22:8; 1 Samuele 9:25, 26; Nehemia 8:16; Mishumo 10:9) Mudzimu o  dovha a laedza uri phulu dzi re na vhuhali dzi londiwe u itela uri dzi si runge vhathu dza vha vhaisa. (Ekisodo 21:28, 29) U nyadza dzenedzi ndaela zwo vha zwi tshi sumbedza u sa ṱhonifha mutakalo wa vhaṅwe nahone zwo vha zwi tshi nga ita uri muthu a vhe na mulandu wa malofha.

15 Ni nga shumisa hani maitele a yeneyi milayo? Zwi ḓo vha zwavhuḓi uri ni humbule nga vhuimo ha goloi yaṋu, nḓila ine na reila ngayo, zwifuwo zwaṋu, haya haṋu, hune na shuma hone na nḓila ine na ḓimvumvusa ngayo. Kha maṅwe mashango, vhaswa ndi vhone vhane vha ita khombo dza badani ngauri a vha reili nga vhulondi. Naho zwo ralo, vhaswa vhane vha ṱoḓa u dzula lufunoni lwa Mudzimu vha dzhia vhutshilo vhu ha ndeme nahone a vha ṱoḓi u ḓitakadza nga zwithu zwi re na khombo. A vha ḓifhuri nga u ḓivhudza uri samusi vha tshi kha ḓi vha vhaswa, vha nga si welwe nga khombo. Nṱhani hazwo, vha ḓiphina nga vhuswa havho nga u iledza khombo dzi sa ṱoḓei.—Muhuweleli 11:9, 10.

16. Ndi afhio maitele a Bivhili ane a shuma kha mafhungo a u reḓula thumbu? (Dovhani ni sedze na ṱhaluso i re magumoni a siaṱari.)

16 Na vhutshilo ha ṅwana a sa athu bebiwaho ndi ha ndeme phanḓa ha Mudzimu. Kha ḽa Isiraele ḽa kale, arali muthu a vhaisa mufumakadzi o vhifhaho muvhilini nahone arali ene kana ṅwana a fa nga ṅwambo wa zwenezwo, Mudzimu o vha a tshi dzhia onoyo muthu sa muvhulahi nahone o vha a tshi fanela u lifha ‘vhutshilo nga vhutshilo.’ * (Ekisodo 21:22, 23) Edzani u humbula uri Yehova u ḓipfa hani musi a tshi vhona vhathu vhanzhi-vhanzhi vha tshi khou reḓula thumbu nga khole ṅwaha muṅwe na muṅwe, vhunzhi havho vha ita nga u ralo u itela uri vha bvele phanḓa na mikhwa yavho ya u ḓifara luvhi.

17. Ni nga khuthadza hani muthu we a reḓula thumbu a sa athu guda nga ha zwilinganyo zwa Mudzimu?

17 Naho zwo ralo, hu pfi mini nga mufumakadzi we a reḓula thumbu a sa athu guda mafhungo-ngoho a Bivhilini? Naa  zwenezwi zwi amba uri Yehova ha nga ḓo mu khathutshela? A zwo ngo tou ralo! Zwi re zwone ndi uri muthu o rembuluwaho zwi tshi bva mbiluni a nga fulufhela u hangwelwa nga Yehova kha mutheo wa malofha a Yesu o shululwaho. (Psalme ya 103:8-14; Vha-Efesa 1:7) Vhukuma Kristo o ri: “A tho ngo ḓa u  vhidza vho lugaho, ndo ḓa u vhidza vha-ita-zwivhi uri vha shanduke.”—Luka 5:32.

NI SONGO VHENGA VHAṄWE!

18. Bivhili i amba uri tshithu tshine tsha ita uri vhathu vha shulule vhunzhi ha malofha ndi mini?

18 Yehova u ṱoḓa uri ri iledze u vhaisa vhaṅwe nahone zwihuluhulu ri litshe u vha na vengo ngauri ndi ḽone ḽine ḽa ita uri hu vhe na u shululwa hunzhi ha malofha. Muapostola Yohane o ṅwala uri: “Muthu ané a vhénga murathu wawe ndi phondi [kana muvhulahi].” (1 Yohane 3:15) Muthu o raloho ha sokou vhenga wahawe fhedzi, fhedzi u ṱoḓa uri a fe. Nḓila ine a vhenga ngayo wahawe i vhonala nga nḓila ine a mu pomoka ngayo, lune arali enea mafhungo ane a khou mu pomoka one e ngoho, Mudzimu o vha a tshi ḓo mu fhelisa. (Levitiko 19:16; Doiteronomio 19:18-21; Mateo 5:22) Ndi zwa ndeme lungafhani uri ri fhelise vengo naho ḽi ḽifhio ḽine ḽa nga vha hone mbiluni dzashu!—Yakobo 1:14, 15; 4:1-3.

19. Muthu ane a langiwa nga zwilinganyo zwa Bivhili u dzhia hani maṅwalo a ngaho Psalme ya 11:5 na Vha-Filipi 4:8, 9?

19 Vhane vha dzhia vhutshilo vhu ha ndeme u fana na Yehova na vhane vha ṱoḓa u ḓivhulungela lufunoni lwawe vha dovha vha iledza mifuda yoṱhe ya vhuvemu. Psalme ya 11:5 i ri: “Mbilu yawe [Yehova] yo sinyutshela mudzia-vhutshinyi [“naho e nnyi a funaho vhuvemu,” NW].” Yeneyi ndimana a i ri vhudzi zwine Mudzimu a vha zwone fhedzi, fhedzi i ri vhudza maitele ane a kwama nḓila ine ra fanela u tshila ngayo. I ṱuṱuwedza vhane vha funa Mudzimu uri vha iledze mifuda yoṱhe ya u ḓimvumvusa hune ha nga ṱuṱuwedza vhuvemu. Nga hu fanaho, maipfi ane a ri Yehova ndi “Mudzimu wa mulalo” a ṱuṱuwedza vhatevheli vhawe uri vha ḓadze mihumbulo na mbilu dzavho nga zwithu zwi funwaho, zwivhuya, na zwi khoḓwaho, zwine zwa ita uri hu vhe na mulalo.—Vha-Filipi 4:8, 9.

ḒIFHAMBANYENI NA MADZANGANO A RE NA MULANDU WA MALOFHA

20-22. Vhakriste vha dzhia hani shango nahone ndi ngani?

20 Shango ḽoṱhe ḽa Sathane ḽi na mulandu wa malofha phanḓa  ha Mudzimu. Maitele aḽo a politiki, ane Maṅwaloni a imelwa nga zwivhanda zwi re na khombo, o vhulaha vhathu vha dzimilioni u katela na vhashumeli vhanzhi vha Yehova. (Daniele 8:3, 4, 20-22; Ndzumbululo 13:1, 2, 7, 8) Vhoramabindu na vhorasantsi vha tshi shumisana na mivhuso ine ya fana na zwivhanda, vho ita zwihali zwine zwa ofhisa vhukuma na tshelede nnzhi nga u rengisa zwenezwo zwihali. Ndi a ngoho lungafhani maipfi ane a ri “shango ḽoṱhe ḽo vhumbulutshela kha Muvhi!”—1 Yohane 5:19.

21 Nga ṅwambo wa uri vhatevheli vha Yesu “a si vha shango ḽino” a vha dzhii sia na luthihi kha mafhungo a politiki na kha dzinndwa, zwenezwo zwi ita uri vha iledze mulandu wa malofha. * (Yohane 15:19; 17:16) Nahone musi vhaṅwe vha tshi vha tovhola vha edzisa Kristo nga u sa ḓilifhedzela nga tshiṱuhu. Vha funa maswina avho nahone vha ita na u a rabelela.—Mateo 5:44; Vha-Roma 12:17-21.

22 Zwa ndeme vhukuma ndi uri Vhakriste vha ngoho vha  iledza u ṱanganela kha “Babele Ḽihulu,” muvhuso wa shango ḽoṱhe wa vhurereli ha mazwifhi na une wa vha na mulandu muhulwane wa malofha. Ipfi ḽa Mudzimu ḽi ri: “Kha wone muḓi uyo ho wanala vhunzhi ha malofha a vhaporofita na vhakhethwa na a vhoṱhe vho vhulahwaho shangoni.” Nga zwenezwo, ri sevhiwa uri: “Ibvani khaḽo’ vhathu vhanga!”—Ndzumbululo 17:6; 18:2, 4, 24.

23. U bva Babele Ḽihulu zwi amba mini?

23 U bva Babele Ḽihulu a zwi ambi u ita uri dzina ḽau ḽi thuthiwe buguni ya kereke fhedzi. Zwi dovha zwa katela u vhenga zwithu zwivhi zwine vhurereli ha mazwifhi ha zwi ṱanganedza kana ha zwi tikedza—zwi ngaho u ḓifara luvhi, u ṱanganela kha zwa politiki na u tovhola lupfumo nga vhupangwa. (Psalme ya 97:10; Ndzumbululo 18:7, 9, 11-17) Kanzhi zwenezwi ndi zwone zwine zwa ita uri hu vhe na dzinndwa!

24, 25. (a) Mudzimu a nga sumbedza tshilidzi muthu o rembuluwaho a re na mulandu wa malofha zwo thewa kha mini? (b) Zwenezwi zwi ri humbudza ndugiselelo ifhio zwifhingani zwa Bivhilini?

24 Musi ri sa athu ḓivha vhurereli ha ngoho, roṱhe ro tikedza maitele mavhi a Sathane nahone ro vha ri na mulandu wa malofha. Naho zwo ralo, nga ṅwambo wa uri ro shandula nḓila dzashu, ra ṱahulela lutendo kha tshiṱhavhelo tshi rengululaho tsha Kristo nahone ra ḓiṋekedza kha Mudzimu, ro tondwa nga Mudzimu na u tsireledzwa nga lwa muya. (Mishumo 3:19) Yeneyo tsireledzo i ri humbudza miḓi ya vhushavhelo zwifhingani zwa Bivhili.—Numeri 35:11-15; Doiteronomio 21:1-9.

25 Yeneyo ndugiselelo yo vha i tshi shuma hani? Arali Muisiraele a vhulaha muthu a songo ḓiimisela, o vha tshi fanela u shavhela kha muṅwe wa miḓi ya vhushavhelo. Musi vhahaṱuli vha faneleaho vho no ita phetho nga ha enea mafhungo, muthu we a vhulaha a songo ḓiimisela o vha a tshi fanela u dzula muḓini wa vhushavhelo u swikela tshifhe muhulu a tshi fa. Nga murahu ha zwenezwo, o vha a tshi nga ṱuwa a ya u dzula huṅwe na huṅwe. Yeneyo ndi tsumbo yavhuḓi lungafhani ya tshilidzi tsha Mudzimu na nḓila ine a dzhia vhutshilo ha vhathu vhu ha ndeme ngayo! Yeneyo miḓi ya kale ya vhushavhelo i a fana na ndugiselelo ya Mudzimu ṋamusi, yo thewaho kha tshiṱhavhelo  tshi rengululaho tsha Kristo, ine ya ri tsireledza uri ri sa pfuke mulayo wa Mudzimu ri songo ḓiimisela malugana na vhukhethwa ha vhutshilo na malofha. Naa ni a dzhiela nṱha yeneyi ndugiselelo? Ni nga sumbedza hani uri ni a i dzhiela nṱha? Iṅwe nḓila ndi nga u ramba vhaṅwe uri vha ṱanganedze ndugiselelo ya Mudzimu ya u tsireledza, zwihuluhulu nga ṅwambo wa uri ‘maṱungu mahulu’ a tsini.—Mateo 24:21; 2 Vha-Korinta 6:1, 2.

DZHIANI VHUTSHILO VHU HA NDEME NGA U HUWElLELA MULAEDZA WA MUVHUSO

26-28. Vhuimo hashu ṋamusi vhu fana hani na ha muporofita Hesekiele nahone ri nga ḓivhulungela hani lufunoni lwa Mudzimu?

26 Vhuimo ha vhathu vha Mudzimu misini yashu vhu ri humbudza muporofita wa kale ane a pfi Hesekiele, we Yehova a mu ṋea mushumo wa u vha mulindi wa muya wa lushaka lwa Isiraele. Mudzimu o ri: “Fhungo ḽine wa ḽi pfa ḽi tshi bva mulomoni wanga, U vha sevhele U tshi itela Nṋe.” Arali Hesekiele a litshelele wonoyu mushumo, o vha a tshi ḓo vha na mulandu wa malofha wa vhe vha vha vha tshi ḓo fheliswa musi hu tshi lozwiwa muḓi wa Yerusalema. (Hesekiele 33:7-9) Fhedzi Hesekiele o thetshelesa nahone a sa vhe na mulandu wa malofha.

27 Ṋamusi ro sedzana na u fheliswa ha shango ḽoṱhe ḽa Sathane. Nga zwenezwo Ṱhanzi dza Yehova vha zwi dzhia zwi vhuḓifhinduleli na ndugelo u ḓivhadza nga ha “ḓuvha ḽa ndifhedzo” na u huwelela mulaedza wa Muvhuso. (Yesaya 61:2; Mateo 24:14) Naa ni a ṱanganela nga vhuḓalo kha wonoyu mushumo wa ndeme? Muapostola Paulo o vha a tshi dzhiela nṱha mushumo wawe wa u huwelela. Ndi ngazwo o ri: “A thi tshee na mulandu kha malofha a vhoṱhe; Ngauri a tho ngo ni dzima tshithu; ndo ni vhudza oṱhe a maitele a Mudzimu.” (Mishumo 20:26, 27) Ndi tsumbo yavhuḓi lungafhani ine ra tea u i edzisa!

28 Vhukuma, u itela u ḓivhulungela lufunoni lwa khotsi ashu Yehova, a ro ngo fanela u sokou dzhia vhutshilo na malofha nga nḓila ine Yehova a zwi dzhia ngayo. Ri fanela u dovha ra dzula ro kuna kana ri vhakhethwa phanḓa hawe, samusi ri tshi ḓo zwi vhona kha ndima i tevhelaho.

^ phar. 5 Malugana na maipfi a Mudzimu ane a ri “vhutshilo ha ṋama vhu kha malofha,” muṅwe magazini une wa pfi Scientific American u ri: “Naho zwi zwa vhukuma uri nga zwiṅwe zwifhinga malofha a nga shumiswa nga lwa pfanyisedzo u itela u fanyisela zwiṅwe zwithu, enea maipfi ndi a ngoho: tsiki iṅwe na iṅwe ine ya vha kha malofha ndi ya ndeme ngauri i ita uri muthu a tshile.”

^ phar. 12 Sedzani Awake! ya August 2006, masiaṱari 3, 5, 10 yo gandiswaho nga Ṱhanzi dza Yehova.

^ phar. 16 Vhaṅwali vha ṱhalusamaipfi ya Bivhili vha amba uri maipfi a yeneyi ndimana ya Luheberu “zwi vhonala a sa ambeli kha u vhaisala ha onoyo musadzi fhedzi.” Dovhani ni ṱhogomele uri Bivhili a i ambi tshithu nga ha uri Yehova u haṱula muthu musi lushie lwa hone lu na maḓuvha mangana.

^ phar. 70 Sedzani Ṱhumetshedzo i re kha masiaṱari 215-16 u itela mafhungo o engedzeaho.